മൂന്നാര് : കടയില് സാധനങ്ങള് വാങ്ങാനെത്തിയ 14 വയസുകാരന്റെ പോക്കറ്റടിച്ച യുവതിയെ റിമാന്റ് ചെയ്തു. കന്നിമല ഫാക്ടറി ഡിവിഷനിലെ റോസിയെയാണ് നാട്ടുകാര് കഴിഞ്ഞ ദിവസം പിടികൂടി പോലീസില് ഏല്പ്പിച്ചത്.മാട്ടുപ്പെട്ടി റോഡില് പലചരക്ക് കടയില്നിന്ന് സാധനങ്ങള് വാങ്ങാനെത്തിയ കുട്ടിയുടെ പോക്കറ്റില് നിന്ന് 3500 രൂപയാണ് അപഹരിച്ചത്.
ഗൂഡാര്വിള എസ്റ്റേറ്റ് സ്വദേശികളായ രമണിയും പതിനാലുകാരനായ മകന് കൃപാകരനും കടയില് സാധനങ്ങള് വാങ്ങുകയായിരുന്നു. കൃപാകരന്റെ പോക്കറ്റിലാണ് പണമിരുന്നത്. സാധനങ്ങള് വാങ്ങിയശേഷം പണം നോക്കിയപ്പോള് കാണാത്തതിനെതുടര്ന്ന് കടക്കാരെ വിവരം അറിയിക്കുകയായിരുന്നു. കടയിലെ ജീവനക്കാരും മറ്റുള്ളവരും അപ്പോഴാണ് അതുവരെ അവിടെയുണ്ടായിരുന്ന യുവതിയെ കാണാതായത് ശ്രദ്ധിക്കുന്നത്.
പരിചയക്കാരില് ചിലര് യുവതിയെ തിരിച്ചറിയുകയും ചെയ്തു. കന്നിമല ഫാക്ടറി ഡിവിഷനിലെ റോസിയാണ് യുവതിയെന്ന് തിരിച്ചറിഞ്ഞതിനെതുടര്ന്ന് കടയിലെ ജീവനക്കാരും നാട്ടുകാരും തിരക്കി ഇറങ്ങുകയായിരുന്നു. ടൗണില് യുവതിയെ കണ്ടെത്തി ചോദ്യംചെയ്ത് പരിശോധിച്ചപ്പോള് കൈയില് സൂക്ഷിച്ചിരുന്ന പണം കണ്ടെത്തി.
