മട്ടാഞ്ചേരി: ബിനാലെയില് പ്രാദേശിക കലാകാരന്മാരെ അവഗണിച്ചതില് പ്രതിഷേധിച്ച് ചിത്രം വരച്ച് കലാകാരന്മാര് രംഗത്തെത്തി. ഫോര്ട്ടുകൊച്ചി, മട്ടാഞ്ചേരി ഭാഗങ്ങളിലെ പ്രാദേശിക ചിത്രകാരന്മാരാണ് ബിനാലെക്കെതിരെ രംഗത്തെത്തിയത്. ബിനാലെയില് പങ്കെടുക്കുന്നതിന് തങ്ങള്ക്ക് അവസരം നല്കണമെന്ന അഭ്യര്ത്ഥനയുമായി ബിനാലെ ഓഫീസില് എത്തിയ ചിത്രകാരനായ നാസറിനെ അവഹേളിച്ച് വിട്ടതില് പ്രതിഷേധിച്ചായിരുന്നു ചിത്രം.
ഫോര്ട്ടുകൊച്ചി, മട്ടാഞ്ചേരി ഭാഗങ്ങളിലെ വിവിധ മതിലുകള് കേന്ദ്രീകരിച്ച് ചിത്രരചന നടന്നു. ബിനാലെ വെറും ചൂഷണമാണെന്നും ജനങ്ങള്ക്ക് മനസ്സിലാകാത്ത വിധത്തില് കലയെ നശിപ്പിക്കുകയാണെന്നും ഇവര് ആരോപിച്ചു. അതുകൊണ്ടാണ് തങ്ങളെപ്പോലെയുള്ള പ്രാദേശിക കലാകാരന്മാരെ ഇവര് അവഗണിക്കുന്നതെന്നും കൂട്ടിച്ചേരത്തു.
ബിനാലെ കാണുന്നതിന് വലിയ തുക ജനങ്ങളില് നിന്നും ഈടാക്കുന്നതിനെതിരെയും പ്രതിഷേധമുയര്ന്നിട്ടുണ്ട്. ചിത്രകാരനായ നാസര് വരച്ച ആയിരത്തോളം ചിത്രങ്ങളാണ് വിദേശികള്ക്കിടയില് വിറ്റ് പോയിട്ടുള്ളത്. ഫോര്ട്ടുകൊച്ചി, ഭാഗങ്ങളിലെ എല്ലാ ഹോട്ടലുകളിലും ഹോംസ്റ്റേകളിലെ വിവിധതരത്തിലുള്ള ചിത്രങ്ങള് വരക്കുന്നതും നാസറാണ്. കഴിഞ്ഞ ബിനാലെയിലും നാസര് അവസരം ആവശ്യപ്പെട്ടെങ്കിലും സംഘടാകര് നിരസിച്ചിരുന്നു. പ്രാദേശിക കലാകാരന്മാര്ക്ക് ബിനാലെകൊണ്ട് യാതൊരു പ്രയോജനവുമില്ലെന്നാണ് നാസറിന്റെ പക്ഷം.
