കൊച്ചി: ഫ്രിഡ്ജില് വെക്കാതെ മൂന്നു മാസംവരെ പാല് സൂക്ഷിക്കാവുന്ന രീതിയില് ടെട്രാ പാക്കില് പാല് വിതരണം ചെയ്യുന്ന പദ്ധതിക്ക് മില്മ തുടക്കം കുറിക്കുന്നു. പദ്ധതി ഉടന് തന്നെ ആരംഭിക്കുമെന്ന് മില്മ എറണാകുളം യൂണിയന് ചെയര്മാന് പി.എ. ബാലന് മാസ്റ്റര് വാര്ത്താസമ്മേളനത്തില് അറിയിച്ചു.
കേരളത്തിലെ എറ്റവും വലിയ ഡെയറിയായി വിപുലീകരിച്ച തൃപ്പൂണിത്തുറ ഡെയറിയുടെ 10ന് രാവിലെ ഒമ്പതിന് മുഖ്യമന്ത്രി ഉമ്മന്ചാണ്ടി നിര്വഹിക്കും.14 കോടി രൂപ മുതല് മുടക്കിലാണ് ഡെയറിയുടെ നവീകരണ ജോലികള് പൂര്ത്തിയാക്കിയത്. പ്രതിദിനം 3.5 ലക്ഷം ലിറ്ററാണ് സംസ്കരണശേഷി. കേന്ദ്രസര്ക്കാരിന്റെ നാഷണല് മിഷന് ഫൊര് പ്രോട്ടീന് സപ്ലിമെന്റ് എന്ന പദ്ധതിയില് ഉള്പ്പെടുത്തി ലഭിച്ച മൂന്നു കോടി രൂപയുടെ ഗ്രാന്റ് ഉപയോഗിച്ചാണ് 2012ല് ഡെയറിയുടെ വിപുലീകരണ പ്രവര്ത്തനങ്ങള്ക്ക് തുടക്കം കുറിച്ചത്. പിന്നീട് കേന്ദ്രഗവണ്മെന്റില് നിന്നും ലഭിച്ച ഗ്രാന്റും യൂനിയന് വിഹിതവും ബാങ്ക് ലോണും ഉപയോഗിച്ച് നവീകരണ ജോലികള് പൂര്ത്തിയാക്കുകയായിരുന്നു.
ഡെയറിയുടെ 25 ാം വാര്ഷികത്തില് ഇത്തരത്തില് വിപുലീകരണ പ്രവര്ത്തനങ്ങള് നടത്താന് സാധിച്ചത് സന്തോഷകരമാണെന്നും അദ്ദേഹം പറഞ്ഞു. മെട്രൊ നഗരമായി മാറികൊണ്ടിരിക്കുന്ന എറണാകുളത്തെ ഉപഭോക്താക്കള്ക്ക് മില്മയുടെ ഗുണമേന്മയുള്ള പാലും പാലുത്പന്നങ്ങളും യഥേഷ്ടം ലഭ്യമാക്കുന്നതിന് തൃപ്പൂണിത്തുറ ഡെയറിയുടെ വികസനത്തോടെ എളുപ്പത്തില് സാധ്യമാകുമെന്നും അദ്ദേഹം.
കേന്ദ്ര ഗവണ്മെന്റിന്റെ നാഷ്ണല് പ്ലാന് ഫൊര് ഡെയറി ഡെവലപ്മെന്റ് പദ്ധതിയില് നിന്നും ഈ വര്ഷം മേഖല യൂനിയനുകളുടെ നവീകരണങ്ങള്ക്ക് 11.25 കോടി രൂപയുടെ പദ്ധതികള് അനുവദിച്ചിട്ടുണ്ട്.. ഇതില് ഒമ്പതുകോടി രൂപ കേന്ദ്ര ഗവണ്മെന്റ് ഗ്രാന്റും 2.25 കോടി രൂപ മേഖലാ യൂനിയന്റെ വിഹിതവുമാണ്. മില്മ മേഖല യൂനിയന്റെ നാല് ഡെയറികളിലും ഇടപ്പള്ളി പ്രോഡക്റ്റ്സ് ഡെറിയിലും 75 കോടി രൂപയുടെ വികസനമാണ് നടക്കുന്നത്. വികസനപ്രവര്ത്തനങ്ങള് പൂര്ത്തിയാകുന്നതോടു കൂടി എറണാകുളം മേഖലാ യൂണിയന്റെ സംഭരണ സംസ്കരണശേഷി പ്രതിദിനം 6.25 ലക്ഷം ലിറ്ററാകുമെന്നും അദ്ദേഹം അറിയിച്ചു.
വാര്ത്താസമ്മേളനത്തില് മില്മ മാനേജിങ് ഡയറക്ടര് ബി. സുശീല്ചന്ദ്രന്, ടി.പി. മര്ക്കോസ്, ഡോ. മുരളീധര ദാസന്, വര്ഗീസ് അരിക്കല് എന്നിവരും പങ്കെടുത്തു.
