ബാഗ്ദാദ്:നൂറുരൂപ മുതല്‍ കോടികള്‍ വിലമതിക്കുന്ന വാച്ചുകള്‍ വരെ ഇന്ന് വിപണിയില്‍ ലഭിക്കും. അത്തരത്തിലുള്ള മുന്തിയ വാച്ചുകള്‍ കയ്യില്‍ അലങ്കാരമാക്കുന്നവര്‍ ഏറെയുണ്ട്. എന്നാല്‍ ഇത്തരം മുന്തിയ വാച്ച് കെട്ടുന്നത് ഒരു ഭീകരവാദി നേതാവായാലോ? ഐഎസ്‌ഐഎസ് ഭീകരനേതാവ് അബൂബക്കര്‍ അല്‍ ബാഗ്ദാദിയുടെ കയ്യില്‍ കെട്ടിയ വാച്ചിന്റെ വിലയും ബ്രാന്റുമാണ് സോഷ്യല്‍ മീഡിയകളില്‍ ഇപ്പോഴത്തെ ചര്‍ച്ചാ വിഷയം.
ഇറാഖി സര്‍ക്കാരിനെതിരെ ആഭ്യന്തരയുദ്ധം നയിക്കുന്ന ഐഎസ്‌ഐഎസ് ഭീകരവാദ സംഘടനയെക്കുറിച്ച് വളരെ കുറച്ചു നാളുകളെ ആയുള്ളു നാം കേട്ടിട്ട്. അല്‍ഖ്വയ്ദ ബന്ധമുള്ള സുന്നി ഭീകരസംഘടനയെപ്പറ്റി കൂടുതല്‍ മലയാളികള്‍ അറിഞ്ഞു തുടങ്ങിയത് നഴ്‌സുമാരുടെ തടങ്കല്‍- മോചന സംഭവങ്ങളോടെയാണ്. അബൂബക്കര്‍ അല്‍ ബാഗ്ദാദിയെ ഐഎസ്‌ഐഎസ് ഭീകരര്‍ ഖലീഫയായി പ്രഖ്യാപിപ്പിച്ചിട്ട് അധികനാളായില്ല. ലോകത്തിലെ 1.2 ബില്യണ്‍ മുസ്ലിങ്ങളുടെയും നേതാവാണ് ബാഗ്ദാദിയെന്നാണ് സുന്നി ഭീകരര്‍ പ്രഖ്യാപിച്ചിരിക്കുന്നത്.
കഴിഞ്ഞ ദിവസം ബാഗ്ദാദിയുടെ വീഡിയോ ദൃശ്യങ്ങള്‍ ഐഎസ്‌ഐഎസ് ഭീകരര്‍ സോഷ്യല്‍ മീഡിയകളിലൂടെ പുറത്തുവിട്ടിരുന്നു. സുന്നി ഭീകരരുടെ പതാകയുടെ നിറമായ കറുത്ത കുപ്പായവും തലപ്പാവുമണിഞ്ഞാണ് വീഡിയോ ദൃശ്യങ്ങളില്‍ ബാഗ്ദാദി പ്രത്യക്ഷപ്പെട്ടത്. എന്നാല്‍ കൈയില്‍ കെട്ടിയിരുന്ന വാച്ച് ഇത്രയധികം ചര്‍ച്ചാ വിഷയമാകുമെന്ന് ഒരു പക്ഷേ ബാഗ്ദാദി പോലും കരുതിയിട്ടുണ്ടാകില്ല. വെള്ളി നിറത്തിലുള്ള കറുത്തഡയലോടു കൂടിയ ഒമേഗ സീമാസ്റ്റര്‍. ഇന്ത്യന്‍ വിപണിയില്‍ മൂന്ന് കോടിയോളം വിലമതിക്കുന്ന ബ്രാന്റാണിത്. കൃത്യമായി പറയുകയാണെങ്കില്‍ 2.85341 കോടി രൂപ. ഇത്തരം വാച്ചുകള്‍ 1995 മുതലുള്ള ജെയിംസ് ബോണ്ട് സിനിമകളില്‍ നായകന്‍ ഉപയോഗിക്കുന്നതാണ്. ജെയിംസ് ബോണ്ടായി അഭിനയിച്ച പൈര്‍സ് ബ്രോസ്‌നന്‍ 1995ല്‍ പുറത്തിറങ്ങിയ ‘ഗോള്‍ഡന്‍ ഐ’ യില്‍ ഒമേഗ സീമാസ്റ്റര്‍ ക്വാര്‍ട്ട്‌സ് പ്രൊഫഷണല്‍ വാച്ചാണ് ഉപയോഗിച്ചത്. തുടര്‍ന്നുള്ള ബോണ്ടിന്റെ മറ്റ് സീരിസുകളിലും ഒമേഗ സീമാസ്റ്റര്‍ ക്രോണോമീറ്റര്‍ തുടങ്ങിയ സീരീസുകളാണ് ഉപയോഗിച്ചത്. ഒമേഗ സീമാസ്റ്ററിന്റെ ഏറ്റവും പുതിയ സീരീസിലെ വാച്ചാണ് ബാഗ്ദാദി അണിഞ്ഞിരിക്കുന്നത്. വളരെ അപൂര്‍വം സമ്പന്നര്‍ മാത്രം ഉപയോഗിക്കുന്ന റിസ്റ്റ് വാച്ചാണ് ബാഗ്ദാദി ഉപയോഗിക്കുന്നതെന്ന വാര്‍ത്ത സോഷ്യല്‍ മീഡിയകളില്‍ വൈറസുപോലെ പരക്കുകയാണ്. ബാഗ്ദാദിയെ അനുകൂലിച്ചും പ്രതികൂലിച്ചും നിരവധി പോസ്റ്റുകളും ട്വിറ്ററുകളും പുറത്തുവരുന്നുണ്ട്.
സുന്നി ഭീകരര്‍ ഇറാഖ് സൈന്യത്തില്‍ നിന്നും പിടിച്ചെടുത്ത നഗരമായ മൊസൂളിലെ ആരാധനാലയത്തില്‍ ബാഗ്ദാദി പ്രസംഗം നടത്തിയ ദൃശ്യങ്ങളാണ് വീഡിയോയില്‍. ആദ്യമായാണ് ബാഗ്ദാദിയുടെ വീഡിയോ ദൃശ്യങ്ങള്‍ പുറത്തുവരുന്നത്. ഇതിന് മുമ്പ് ബാഗ്ദാദിയുടെ രണ്ട് ചിത്രങ്ങള്‍ മാത്രമേ പുറത്തുവന്നിട്ടുള്ളു. സ്വന്തം അനുയായികളുടെ മുന്നില്‍ പോലും മുഖം മൂടി ധരിച്ച് മാത്രമെ ഇയാള്‍ പ്രത്യക്ഷപ്പെടാറുള്ളു. 2011ല്‍ ഭീകരനേതാവ് ബാഗ്ദാദിയെ ജീവനോടെയോ അല്ലാതെയോ പിടിച്ച് നല്‍കുകയോ, വിവരം കൈമാറുകയോ ചെയ്താല്‍ 50 കോടിയോളം രൂപയാണ് അമേരിക്കന്‍ സര്‍ക്കാര്‍ വാഗ്ദാനം നല്‍കിയിരിക്കുന്നത്. സിറിയയിലും ഇറാഖിലുമായി നിരവധി എണ്ണപ്പാടങ്ങളുള്ള സമ്പന്ന ഭീകരസംഘടനയാണ് ഐഎസ്‌ഐഎസ്. 11,000 ഇറാഖികളും, 3,000 വിദേശികളും ഇതില്‍ 500 ഓളം ബ്രിട്ടണ്‍കാരും അടങ്ങുന്നതാണ് ഐഎസ്‌ഐഎസ് സുന്നി ഭീകരസംഘടനയുടെ പോരാളികള്‍.
