മുണ്ടക്കയം: മുല്ലപെരിയാര് സംരക്ഷണ സമിതി ആഹ്വാനം ചെയ്ത സംസ്ഥാന ഹര്ത്താല് കാര്ഷിക മേഖലയെ ബാധിച്ചില്ല. മുണ്ടക്കയം, കൂട്ടിക്കല്, കോരുത്തോട്, എരുമേലി പഞ്ചായത്തുകളില് സ്വകാര്യ കെഎസ്ആര്ടിസി ബസ്സുകള് പതിവുപോലെ സര്വീസ് നടത്തി. എവിടെയും വാഹന തടസ്സമുണ്ടായിരുന്നില്ല. വ്യാപാര സ്ഥാപനങ്ങല് പതിവുപോലെ തുറന്നെങ്കിലും ഉപഭോക്താക്കള് തീരെ കുറവായിരുന്നു. സംസ്ഥാന ഹര്ത്താല് പ്രഖ്യാപിച്ചിരുന്നതിനാല് യാത്രക്കാര് ടൗണുകളില് കാര്യമായി എത്തിയിരുന്നില്ല. എന്നാല് കോട്ടയം ജില്ലയോട് ചേര്ന്നു കിടക്കുന്ന ഇടുക്കി ജില്ലയില്പെട്ട കൊക്കയാര്, പെരുവന്താനം പഞ്ചായത്തുകളിലെ വിവിധ ഗ്രാമങ്ങളിലേക്കു പോകാനായി മുണ്ടക്കയം പട്ടണത്തിലെത്തിയവര് ഓട്ടോ റിക്ഷകളെ അഭയം തേടുകയായിരുന്നു.
ഈരാറ്റുപേട്ട: മുല്ലപ്പെരിയാര് വിഷയത്തില് കേരളത്തിനു ഹാനികരമായ രീതിയില് സുപ്രീംകോടതി വിധിയില് പ്രതിഷേധിച്ച് നടന്ന സമരം ഈരാറ്റുപേട്ടയിലും പരിസരപഞ്ചായത്തുകളിലും കാര്യമായ പ്രതികരണം സൃഷ്ടിച്ചില്ല. ഈരാറ്റുപേട്ട – തൊടുപുഴ റൂട്ടില് ബസ് ഗതാഗതം ഭാഗീകമായി മുടങ്ങിയെന്നതൊഴിച്ചാല് വാഹനഗതാഗതത്തെ ഹര്ത്താല് ബാധിച്ചില്ല. കടകമ്പോളങ്ങളും ഓഫീസുകളും സാധാരണ നിലയില് പ്രവര്ത്തിച്ചു.
