കോട്ടയം: ലോക്സഭാ തെരഞ്ഞെടുപ്പിന്റെ കൗണ്ടിംഗ് മെയ് 16ന് ജില്ലയിലെ നാല് കേന്ദ്രങ്ങളില് നടക്കുമെന്ന് ജില്ലാ വരണാധികാരിയായ ജില്ലാ കളക്ടര് അജിത് കുമാര് അറിയിച്ചു. കളക്ടറുടെ ചേംബറില് നടന്ന സ്ഥാനാര്ത്ഥികളുടെ ഏജന്റുമാരുടെ യോഗത്തിലാണ് ഇക്കാര്യം അറിയിച്ചത്.
രാവിലെ എട്ടു മണി മുതല് കൗണ്ടിംഗ് ആരംഭിക്കും. മൗണ്ട് കാര്മല് എച്ച്എസ്എസ് ഓഡിറ്റോറിയം കിഴക്കുഭാഗം (പാലാ നിയോജക മണ്ഡലം), മൗണ്ട് കാര്മല് എച്ച്എസ്എസ് ഓഡിറ്റോറിയം പടിഞ്ഞാറുഭാഗം (കടുത്തുരുത്തി നിയോജകമണ്ഡലം), മൗണ്ട് കാര്മല് ബിഎഡ് കോളേജ് ഓഡിറ്റോറിയം (വൈക്കം നിയോജകമണ്ഡലം), ബിസിഎം കോളേജ് ഓഡിറ്റോറിയം (പിറവം നിയോജകമണ്ഡലം), ബസേലിയസ് കോളേജ് ഓഡിറ്റോറിയം (ഏറ്റുമാനൂര് നിയോജകമണ്ഡലം), എംഡി സെമിനാരി എച്ച്എസ്എസ് പ്രയര് ഹാള് (കോട്ടയം നിയോജകമണ്ഡലം), എംഡി സെമിനാരി എച്ച്എസ്എസ് ഓഡിറ്റോറിയം (പുതുപ്പള്ളി നിയോജകമണ്ഡലം) എന്നിവിടങ്ങളിലാണ് കൗണ്ടിംഗ് നടക്കുക.
ആര്ഡിഒയുടെ സാന്നിധ്യത്തില് കളക്ട്രേറ്റ് കോണ്ഫറന്സ് ഹാളില് പോസ്റ്റല് ബാലറ്റുകളുടെ എണ്ണം നടക്കും. രാഷ്ട്രീയ പാര്ട്ടികള് കൗണ്ടിംഗ് ഏജന്റിനെ ഏര്പ്പെടുത്താന് ഫോം നമ്പര് 18 പൂരിപ്പിച്ച് രണ്ടു കോപ്പി വരണാധികാരിക്ക് നല്കണം. ഇതില്നിന്ന് വരണാധികാരി നല്കുന്ന ഒരു കോപ്പി കൗണ്ടിംഗ് സെന്ററില് ഹാജരാക്കണം.
കൗണ്ടിംഗ് സെന്ററില് ഒബ്സര്വര്ക്കുമാത്രമേ മൊബൈല് ഫോണ് ഉപയോഗിക്കാനുള്ള അനുവാദമുള്ളൂ. ഓരോ കൗണ്ടിംഗ് ടേബിളിലും മൈക്രോ ഒബ്സര്വര് ഉണ്ടായിരിക്കുമെന്നും വരണാധികാരി പറഞ്ഞു.
യോഗത്തില് ആര്ഡിഒ കെ.എസ്. സാവിത്രി, ഇലക്ഷന് ഡെപ്യൂട്ടി കളക്ടര് പി.എസ്. ബഷീര്, സ്ഥാനാര്ത്ഥികള്, രാഷ്ട്രീയ പാര്ട്ടി പ്രതിനിധികള് എന്നിവര് പങ്കെടുത്തു.
