കൊച്ചി: നോര്ത്ത് പറവൂര് പള്ളിത്താഴം റോഡില് 24.01.14 തീയതി പുലര്ച്ചെ 6.15ന് പള്ളിയിലേക്ക് നടന്നുപോയ കന്യാസ്ത്രീയെ ബൈക്കിലെത്തി ആക്രമിക്കുകയും, കൈപിടിച്ച് വലിച്ച് മറിച്ചിടുകയും ചെയ്ത കേസ്സിലെ പ്രതിയായ പറവൂര് വെടിമറ കാഞ്ഞിരപറമ്പില് വീട്ടില് ഹമീദിന്റെ മകന് അന്ഷാദി(23) നെ ആലുവ ഡിവൈഎസ്പി വി.കെ. സനില് കുമാറിന്റെ നേതൃത്വത്തിലുള്ള അന്വേഷണസംഘം അറസ്റ്റ് ചെയ്തു. സംഭവസ്ഥലത്തുനിന്ന് ലഭിച്ച സൂചനകളുടെയും പ്രതി കൃത്യത്തിന് ഉപയോഗിച്ച വാഹനത്തെയും കുറിച്ച് ലഭിച്ച രഹസ്യ വിവരത്തിന്റെയും അടിസ്ഥാനത്തില് നടത്തിയ അന്വേഷണത്തിലാണ് പ്രതിയെ അറസ്റ്റ് ചെയ്തത്.
എറണാകുളം റൂറല് ജില്ലാ പോലീസ് മേധാവി സതീഷ് ബിനോയുടെ നിര്ദ്ദേശാനുസരണം രൂപീകരിച്ച പ്രത്യേക അന്വേഷണസംഘാംഗങ്ങളായ പറവൂര് സിഐ എസ്. ജയകൃഷ്ണന്, പറവൂര് എസ്ഐ പി. ശ്രീകുമാരന് നായര്, സിവില് പോലീസ് ഓഫീസര്മാരായ സെബാസ്റ്റ്യന്, വിപിന് എന്നിവരാണ് പ്രതിയെ അറസ്റ്റ്ചെയ്ത സംഘത്തിലുണ്ടായിരുന്നത്.
പ്രായപൂര്ത്തിയാകാത്ത സ്കൂള് വിദ്യാര്ത്ഥിനിയെ പ്രണയം നടിച്ച് പലപ്രാവശ്യം പീഡിപ്പിച്ച കേസ്സിലും ഇയാള് പ്രതിയാണ്. അറസ്റ്റ് ചെയ്ത പ്രതിയെ ചോദ്യം ചെയ്തതില് പെരുമ്പാവൂര് ടൗണില് നിന്നും മോട്ടോര് സൈക്കിള് മോഷണം ചെയ്തതായി കണ്ടെത്താന് കഴിയുകയും വാഹനം പ്രതിയില് നിന്ന് കണ്ടെടുത്തിട്ടുള്ളതുമാണ്.
പ്രതിയെക്കുറിച്ച് ലഭിച്ച സൂചനകളുടെ അടിസ്ഥാനത്തില്തന്നെ തിരിച്ചറിയുമെന്ന് ഭയപ്പെട്ട പ്രതി താടിയും മുടിയും വെട്ടി തിരിച്ചറിയാന് സാധിക്കാത്ത വിധം ആള്മാറാട്ടം നടത്താന് ശ്രമിച്ചിരുന്നു.
