ആലുവ: ബസ് കാത്തുനിന്ന യുവതിയുടെ കാലില് വഴിപോക്കന് കരിങ്കല്ലിട്ട് വിരലുകളൊടിച്ചു. തിരുവൈരാണിക്കുളം തട്ടമംഗലത്ത് വീട്ടില് ഗണേഷിന്റെ ഭാര്യ ലതാ ഗണേഷ് (20)ന്റെ ഇടതുകാലിന്റെ മൂന്ന് വിരലുകളാണ് ഒടിഞ്ഞത്.
സംഭവവുമായി ബന്ധപ്പെട്ട് പറവൂര് കൈതാരം മാരമുറ്റത്ത് പ്രസന്ന (36)നെ നാട്ടുകാര് പിടികൂടി പൊലീസിന് കൈമാറി. ഇന്നലെ രാവിലെ എട്ട് മണിയോടെ ആലുവ ബാങ്ക് കവലയിലാണ് സംഭവം. പുറയാറില് ഐ.ടി കമ്പനിയില് ജോലിക്ക് പോകുകയായിരുന്നു യുവതി. എളമക്കരയിലെ സ്വന്തം വീട്ടില് നിന്നാണ് യുവതിയെത്തിത്. ബൈപ്പാസില് ബസിറങ്ങി കാലടി ഭാഗത്തേക്കുള്ള ബസ് കാത്തു നില്ക്കുമ്പാഴാണ് പ്രതി ചാക്ക് ദേഹത്ത് തൂക്കി വന്നത്. യുവതിയുടെ അടുത്തെത്തിയയുടന് ചാക്ക് കാലിലിടുകയായിരുന്നു.
സ്റ്റോപ്പിലുണ്ടായിരുന്നവര് ഇയാളെ പിടികൂടിയപ്പോള് മാനസീക രോഗിയായി അഭിനയിച്ച് രക്ഷപ്പെടാന് ശ്രമിച്ചു. തുടര്ന്ന് പൊലീസിനെ വിളിച്ച് വരുത്തി കൈമാറി. യുവതിയെ ആലുവ ആരോഗ്യാലയം ആശുപത്രിയില് പ്രവേശിപ്പിച്ചിരിക്കുകയാണ്. സെക്ഷന് 326 പ്രകാരം പ്രതിക്കെതിരെ പൊലീസ് കേസെടുത്തു. കോടതി റിമാന്ഡ് ചെയ്തു.
