മൂവാറ്റുപുഴ: സ്വകാര്യ സ്ഥാപനത്തിലെ ജീവനക്കാരിയെ സംഘം ചേര്‍ന്ന്‌ പീഡിപ്പിച്ച കേസില്‍ ഒരാള്‍ അറസ്റ്റില്‍. രണ്ട്‌ പേരെ പോലീസ്‌ തെരയുന്നു.
എറണാകുളത്ത്‌ ജോലിചെയ്യുന്ന വയനാട്‌ സ്വദേശിനി ഓഫീസ്‌ ആവശ്യത്തിനായി കോലഞ്ചേരിയില്‍ എത്തിയപ്പോള്‍ മൂന്നംഗ സംഘം ബലം പ്രയോഗിച്ച്‌ ഓട്ടോറിക്ഷയില്‍ കയറ്റികൊണ്ടുവന്ന്‌ പീഡിപ്പിച്ചുവെന്നാണ്‌ കേസ്‌. മൂവാറ്റുപുഴ മാറാടി പാറത്തട്ട നടുത്തോട്ടത്തില്‍ വിജോ (26)യാണ്‌ അറസ്റ്റിലായത്‌. സംഘത്തില്‍ ഉള്‍പ്പെട്ട മാറാടി സ്വദേശികളായ ജില്‍സണ്‍ (ലുട്ടാപ്പി-30) രഞ്ജിത്‌ (30) എന്നിവരെ പോലീസ്‌ അന്വേഷിച്ച്‌ വരുന്നു.
കോലഞ്ചേരിയില്‍ നിന്ന്‌ ബലംപ്രയോഗിച്ച്‌ കൊണ്ടുവന്ന സ്ത്രീയെ മാറാടിയില്‍ എത്തിച്ച്‌ സ്കൂള്‍ വളപ്പിലും കനാല്‍ റോഡിലും വച്ച്‌ പീഡിപ്പിച്ചുവെന്നാണ്‌ കേസ്‌. മൂവാറ്റുപുഴ പോലീസ്‌ രജിസ്റ്റര്‍ ചെയ്ത കേസിലാണ്‌ ഒരാള്‍ അറസ്റ്റിലായത്‌. ഓട്ടോ ഡ്രൈവറാണ്‌ അറസ്റ്റിലായ വിജോ.
കഴിഞ്ഞ മാസം 22നാണ്‌ സംഭവം എന്ന്‌ പോലീസ്‌ പറഞ്ഞു. സ്ത്രീ ഓഫീസ്‌ ആവശ്യംകഴിഞ്ഞ്‌ കോലഞ്ചേരിയില്‍ നില്‍ക്കുമ്പോള്‍ വൈകിട്ട്‌ 6 ഓടെ ഓട്ടോറിക്ഷയില്‍ എത്തിയ സംഘം ഇവരെ ബലം പ്രയോഗിച്ച്‌ കടത്തികൊണ്ട്‌ വരികയായിരുന്നുവെന്ന്‌ പോലീസ്‌ പറഞ്ഞു. തുടര്‍ന്ന്‌ രാത്രിയോടെ സ്കൂള്‍ വളപ്പിലും പിന്നീട്‌ കനാല്‍ വഴിയിലും സംഘം പീഡിപ്പിക്കുകയും ഉപദ്രവിക്കുകയും ചെയ്തു. രാത്രി ഒരു മണിയോടെ ഇതേ ഓട്ടോറിക്ഷയില്‍ മൂവാറ്റുപുഴ കെഎസ്‌ആര്‍ടിസി ബസ്സ്റ്റാന്റില്‍ എത്തിച്ച്‌ ഇറക്കിവിടുകയും സ്ത്രീയുടെ ഒന്നര പവന്‍ സ്വര്‍ണ്ണമാല കാണാതാവുകയും ചെയ്തതായി പോലീസ്‌ പറഞ്ഞു. സ്ത്രീനല്‍കിയ പരാതിയെ തുടര്‍ന്ന്‌ ഓട്ടോറിക്ഷയുടെ നമ്പരും ഒരു മൊബെയില്‍ നമ്പരും പിന്‍തുടര്‍ന്നാണ്‌ പ്രതികളെ പോലീസ്‌ കണ്ടെത്തിയത്‌. പിടികിട്ടാനുള്ളവര്‍ മറ്റ്‌ കേസുകളില്‍ ഉള്‍പെട്ടവരാണെന്നും സിഐ ഫെയ്‌മസ്‌ വര്‍ഗീസ്‌ പറഞ്ഞു.
