കൊച്ചി: കാഴ്ചശക്തിയുള്ളവര് കാണേണ്ട കാഴ്ചയാണ് ഇന്നലെ ദര്ബാര്ഹാള് മൈതാനിയില് അരങ്ങേറിയത്. ലോക അന്ധദിനത്തില് കാഴ്ചയില്ലായ്മയെ അതിജീവിച്ചവരുടെ ഗംഭീര മെഗാഷോ. വൈക്കം വിജയലക്ഷ്മിയും ഋതിക് രാജനും കായങ്കുളം ബാബുവും ഗാനങ്ങളിലൂടെ ജനഹൃദയങ്ങള് കീഴടക്കി. ബംഗളുരു ആസ്ഥാനമായ ശ്രീ രമണ മഹര്ഷി അക്കാദമി ഫോര് ബ്ലൈന്ഡ് അവതരിപ്പിച്ച ഭരതനാട്യം ഏറെ ശ്രദ്ധേയമായി.
ലോകഅന്ധദിനത്തോടനുബന്ധിച്ച് പ്രത്യാശ ഫൗണ്ടേഷന് ജില്ല ഇന്ഫര്മേഷന് ഓഫീസിന്റെ സഹകരണത്തോടെയാണ് മെഗാഷോ സംഘടിപ്പിച്ചത്. അഞ്ചുമണിക്കൂര് നീണ്ട പരിപാടി കൊച്ചി നിവാസികള്ക്ക് വേറിട്ട ഒരനുഭൂതിയായി മാറി.
കീഴ്മാട് അന്ധവിദ്യാലയത്തിലെ കലാകാരന്മാരുടെ ബാന്റ് വാദ്യത്തോടെ ആരംഭിച്ച കലാപരിപാടിയില് ഋതിക് രാജന്റെ സിനോറിത്ത എന്ന ആദ്യഗാനത്തിലൂടെ തന്നെ ജനഹൃദയങ്ങള് കീഴടക്കി. തുടര്ന്ന് വന്ന ഭരതനാട്യം കണ്ണുള്ളവരെ പോലും അമ്പരപ്പിക്കുന്നതായി. മഹാദേവശിവ ശംഭോ എന്ന ഗാനത്തിനൊപ്പം നൃത്തച്ചുവടുകളുമായെത്തിയ രമണ മഹര്ഷി അക്കാദമിയംഗങ്ങള് മൈതാനിയിലെത്തിയ ഓരോരുത്തരേയും അക്ഷരാര്ഥത്തില് പുളകിതരാക്കി.
വൈക്കം വിജയലക്ഷ്മിയുടെ ‘ഏനുണ്ടോടീ അമ്പിളി ചന്തം’ എന്ന ഗാനം നഗരവാസികള് ഹൃദയത്തോട് ചേര്ത്തുവച്ചു. പിന്നാലെ വിജയലക്ഷ്മിയുടെ ഹിറ്റ് ഗാനം ‘കാറ്റേ കാറ്റേ നീ പൂക്കാമരത്തിലും’ ശ്രോതാക്കളെ തഴുകിയുണര്ത്തി കടന്നുപോയി. ഇതിനിടെ അക്കാദമി കലാകാരന്മാരുടെ കുച്ചുപ്പുടി വിശിഷ്ടാതിഥികള് ഉള്പ്പെടെയുള്ള ഏവരെയും വിസ്മയിപ്പിച്ചു. ഓരോ നൃത്തച്ചുവടുകള്ക്കു ശേഷവും എഴുന്നേറ്റ് നിന്ന് കയ്യടിച്ചു പ്രോല്സാഹിപ്പിച്ച കൊച്ചിയിലെ ജനങ്ങളും അവരോടുള്ള ഐക്യദാര്ഢ്യം മറച്ചുവച്ചില്ല.
നേരത്തെ കേന്ദ്രമന്ത്രി കെ.വി.തോമസ്, എക്സൈസ് മന്ത്രി കെ.ബാബു, ജില്ല പഞ്ചായത്ത് പ്രസിഡന്റ് എല്ദോസ് കുന്നപ്പിള്ളി, ജില്ലാ കളക്ടര് പി.ഐ. ഷെയ്ക്പരീത്, ഗായകരായ വൈക്കം വിജയലക്ഷ്മി, കായങ്കുളം ബാബു, ഋതിക് രാജന്, അക്കാദമി വിദ്യാര്ഥികള്, പ്രത്യാശ ചെയര്മാര് സൈമണ് ജോര്ജ് എന്നിവര് ചേര്ന്ന് ദീപം തെളിയിച്ച് ഇന്സൈറ്റ് 2013 ഉദ്ഘാടനം ചെയ്തു.
വൈക്കം വിജയലക്ഷ്മി, ഋതിക് രാജന്, ഐഡിയ സ്റ്റാര് സിങ്ങര് പരിപാടിയില് പങ്കെടുത്ത കലാകാരന്മാര്, വിദേശങ്ങളില് നൃത്തപരിപാടികള് അവതരിപ്പിച്ച കലാകാരന്മാര്, വിവിധ ഭാഷകളില് ഗാനരംഗത്ത് കഴിവ് തെളിയിച്ചവര് തുടങ്ങിയവര് അണിനിരന്ന ഗാനമേള, നൃത്തനൃത്യങ്ങള്, ഭരതനാട്യം, സിനിമാറ്റിക് ഡാന്സ്, നാടോടിനൃത്തം തുടങ്ങിയവ അരങ്ങേറി.
നൂറോളം കലാകാരന്മാരാണ് മെഗാഷോയില് അണിനിരന്നത്. കേരളത്തില് ആദ്യമായാണ് ഇത്തരമൊരു കലാവിരുന്ന്. ബംഗളൂരു ആസ്ഥാനമായ ശ്രീരാമ മഹര്ഷി അക്കാദമി ഫോര് ദ ബ്ലൈന്ഡ്, ദല്ഹിയില് നിന്നുള്ള ടി.വി.ഷോ അവതാരകനും ഗായകനുമായ ദിവാകര് ശര്മ, തമിഴ്നാട്ടില് നിന്നുള്ള അരുണ, കെ.കാശി, ടി.മാധവന് ഉള്പ്പെടെയുള്ള കലാകാരന്മാര് മെഗാഷോയെ ധന്യമാക്കി. സംഗീതജ്ഞന് ജെര്സന് ആന്റണി ഓര്ക്കസ്ട്ര നയിച്ചു.
