മെക്‌സിക്കോ സിറ്റി: മെക്‌സിക്കോയില്‍ നിയന്ത്രണം വിട്ട യാത്രാബസ് മലയടിവാരത്തിലേക്കു മറിഞ്ഞ് 14 പേര്‍ മരിച്ചു. 25 പേര്‍ക്കു പരിക്കേറ്റു. മരണസംഖ്യ ഉയരാന്‍ സാധ്യതയുണെ്ടന്ന് പോലീസ് അറിയിച്ചു. ടൊലൂക്ക നഗരത്തിലേക്കു പോകുകയായിരുന്ന ബസാണ് അപകടത്തില്‍ പെട്ടത്.
ഹൈവേയിലേക്കു കടക്കുന്നതിനു തൊട്ടു മുമ്പായി മലയോരപാതയിലൂടെ സഞ്ചരിക്കുകയായിരുന്നു ബസ്. റോഡില്‍ നിന്നു തെന്നി മാറിയ ബസ് നിയന്ത്രണം വിട്ട് 120 മീറ്റര്‍ താഴ്ചയിലേക്കു പതിക്കുകയായിരുന്നുവെന്ന് മെക്‌സിക്കന്‍ അറ്റോര്‍ണി ജനറല്‍ മിഗ്വല്‍ എയ്ഞ്ചല്‍ കോണ്‍ട്രെറാസ് അറിയിച്ചു.
അപകടകാരണം വ്യക്തമല്ലെന്നും അദ്ദേഹം കൂട്ടിച്ചേര്‍ത്തു. സംഭവസ്ഥലത്തെത്തിയ രക്ഷാപ്രവര്‍ത്തകര്‍ ബസിന്റെ ജനാലകള്‍ തകര്‍ത്താണ് അകത്തു കുടുങ്ങിക്കിടന്നവരെ പുറത്തെത്തിച്ചത്.
അമിത വേഗതയാണ് അപകടകാരണമെന്ന് മെക്‌സിക്കോയിലെ വാഹന വകുപ്പ് പറഞ്ഞു. എന്നാല്‍ ഇതു സംബന്ധിച്ച അന്വഷണം നടന്നു വരുന്നതേയുള്ളു. മെക്‌സിക്കോയില്‍ പ്രതിവര്‍ഷം ഏകദേശം നാല് ദശലക്ഷം ട്രാഫിക്ക് അപകടങ്ങളിലായി 24,000 ജീവനുകള്‍ പൊലിയുന്നുണ്ടെന്നാണ് ഹൈവേ സുരക്ഷാ വിദഗ്ധരുടെ കണക്കുകള്‍ പറയുന്നത്.
