പാലാ: അദ്ധ്യാപികമാരുടെ മാനസികപീഡനത്തില് മനംനൊന്ത് ഒമ്പതാംക്ലാസ് വിദ്യാര്ത്ഥിനി ആത്മഹത്യയ്ക്കു ശ്രമിച്ചു. ഇടമറ്റം കെടിജെഎം ഹൈസ്കൂള് വിദ്യാര്ത്ഥിനി ആര്യ ഹരിദാസ് ആണ് ഗുരുതരാവസ്ഥയില് കോട്ടയം മെഡിക്കല് കോളേജ് ആശുപത്രയില് ചികിത്സയില് കഴിയുന്നത്. ഇത് സംബന്ധിച്ച് കുട്ടിയുടെ പിതാവ് ഹരിദാസ് സ്കൂള് ഹെഡ്മിസ്ട്രസിനും ഡിഇഒയ്ക്കും പരാതി നല്കി.
കഴിഞ്ഞ വെള്ളിയാഴ്ചയാണ് സംഭവം. സ്കൂളില് നടന്ന കലോത്സവത്തില് ഒപ്പന, ഡാന്സ് ഇനങ്ങളില് ആര്യ പങ്കെടുത്തിരുന്നു. നൃത്തത്തിന് ആര്യ ധരിച്ചിരുന്ന വേഷത്തില് അപാകതയുണ്ടെന്നും മോശമായിരുന്നെന്നും പറഞ്ഞ് മറ്റുകുട്ടികളുടെ മുമ്പിലും പിന്നീട് മറ്റൊരു മുറിയിലേക്ക് വിളിച്ചുവരുത്തിയും മിനി ആന്റണി, സിസ്റ്റര് ആന്സി എന്നീ അദ്ധ്യാപികമാര് ഒരു മണിക്കൂറോളം കുട്ടിയെ മാനസികമായി പീഡിപ്പിക്കുകയും അപമാനിക്കുകയും ചെയ്തതായും ഇത് മൂലമുള്ള മനോവേദനയില് കുട്ടി വീട്ടിലെത്തി ആത്മഹത്യയ്ക്ക് ശ്രമിക്കുകയുമായിരുന്നു എന്നു പരാതിയില് പറയുന്നു.
തന്നെ രണ്ട് അദ്ധ്യാപികമാര് ഏറെ പരിഹസിക്കുകയും മാനസികമായി തകര്ക്കുകയും ചെയ്തതായും തനിക്കിനി സ്കൂളില് പോകേണ്ട എന്നും വീട്ടിലെത്തിയകുട്ടി അമ്മയോട് പറഞ്ഞിരുന്നതായി പറയുന്നു. സ്കൂളില് പടിക്കുന്ന കുട്ടികളുടെ രക്ഷിതാക്കളും പൊതുപ്രവര്ത്തകരും എത്തിയാണ് ഇന്നലെ പരാതി നല്കിയത്. അദ്ധ്യാപികമാര് അവധിയിലാണെന്നും അന്വേഷിക്കാമെന്നുമുള്ള മൃദു സമീപമനമായിരുന്നു സ്കൂളിലെ പ്രധാന അദ്ധ്യാപികയുടെ ഭാഗത്തുനിന്നുണ്ടായതെന്നും രക്ഷിതാക്കള് പറയുന്നു. കുറ്റക്കാരായ അധ്യാപികമാര്ക്കെതിരെ നടപടി സ്വീകരിക്കണമെന്ന് പരാതിയില് ആവശ്യപ്പെട്ടു.
