മരട്: വെബ്സൈറ്റ് വഴി പെണ്വാണിഭം നടത്തിവന്ന ആളെ ബന്ദിയാക്കി പണം പിടുങ്ങിയ സംഭവത്തില് കൂടുതല് അറസ്റ്റുണ്ടാകുമെന്ന് സൂചന. പണവും സ്വര്ണ്ണാഭരണങ്ങളും കാറും കൈക്കലാക്കിയ സംഘത്തിലെ അഞ്ചുപേരെ ബുധനാഴ്ച മരട് പോലീസ് അറസ്റ്റുചെയ്തിരുന്നു. ഇവരുടെ കൂട്ടാളികളായ ആറോളം പേരെ പിടിയിലാകാനുണ്ടെന്നാണ് പോലീസ് നല്കുന്ന സൂചന. ഇവര്ക്കുവേണ്ടിയുള്ള അന്വേഷണം ഊര്ജ്ജിതമാക്കിയിരിക്കുകയാണ്. ഇവര് തമിഴ്നാട്ടിലേക്കു കടന്നതായി കരുതുന്നു.
മരട് ചമ്പക്കര തുടങ്ങിയ പ്രദേശങ്ങളിലെ ക്രിമിനല്, ക്വട്ടേഷന് സംഘത്തില്പ്പെട്ടവാണ് മോചന ദ്രവ്യം ആവശ്യപ്പെട്ട് നെട്ടൂരില് താമസിക്കുന്ന നസീറിനെ ബന്ധിയാക്കിയത്. വെബ്സൈറ്റ് വഴി പെണ്വാണിഭം നടത്തുന്ന സംഘത്തിലെ പ്രധാനിയായിരുന്നു ഇയാള്. സീരിയല് നടിമാരെ ആവശ്യപ്പെട്ട് ഇടപാടുകാരുടെ ഭാവത്തിലാണ് ക്രിമിനല് സംഘം നസീറിനെ വലയിലാക്കിയത്. സംഘം ആവശ്യപ്പെട്ടതു പ്രകാരം സീരിയില് നടിമാരെയും ഒപ്പം കൂട്ടിയാണ് സ്വന്തം കാറില് നസീര് പൊന്നുരുന്നിയിലെത്തിയതും അവിടെവച്ചാണ് ബന്ദിയാക്കപ്പെട്ടതും. നസീറിനെ കാറില്കയറ്റി തട്ടിക്കൊണ്ടുപോയ സംഘത്തില് പത്തോളം പേരുണ്ടായിരുന്നുവത്രെ. സീരിയല് നടികളേയും ഒപ്പം കൂട്ടി ഇവര് സംസ്ഥാനം വിട്ടതായാണ് സൂചന. മൊബെയില് ഫോണ് സിഗ്നല് പിന്തുടര്ന്നുനടത്തുന്ന അന്വേഷണത്തില് ഇവര് ചെന്നയിലൊ, പരിസരത്തോ ഉണ്ടെന്നാണ് നിഗമനം. കേസുമായിബന്ധപ്പെട്ട് അന്വേഷണം ഊര്ജ്ജിതമാക്കിയതായും വരും ദിവസങ്ങളില് കൂടുതല് അറസ്റ്റുണ്ടായേക്കുമെന്നും കരുതുന്നു. അറസ്റ്റിലായവരെ ചോദ്യം ചെയ്തതില് നിന്നും കൂടുതല് വിവരങ്ങള് ലഭ്യമായിട്ടുണ്ടെന്നും പോലീസ് പറഞ്ഞു.
