കോട്ടയം: വീണ്ടും ഇതാ കര്‍ക്കിടകമാസം വിരുന്നെത്തി. രാമായണ മാസാചരണത്തിന് വീടുകളും ക്ഷേത്രങ്ങളുമൊരുങ്ങി. 17മുതല്‍ ആഗസ്റ്റ് 16 വരെ വീടുകളിലും ക്ഷേത്രങ്ങളിലും രാമായണ പാരായണ തരംഗങ്ങള്‍ മാത്രം. കര്‍ക്കിടകം പുലര്‍ന്നാല്‍ പ്രാത, മദ്ധ്യാഹ്ന, സായാഹ്ന സന്ധ്യകളില്‍ നാമജപത്തിന്റെയും കീര്‍ത്തനാലാപനങ്ങളുടെയും ഒപ്പം പ്രാധാന്യത്തോടെ രാമായണപാരായണവും നടക്കും. കുടാതെ മനസിനും ശരീരത്തും സുഖചികിത്സാകാലംകൂടിയാണ് കര്‍ക്കിടകം. കോട്ടയം തിരുനക്കര മഹാദേവക്ഷേത്രം, കിടങ്ങൂര്‍ സുബ്രഹ്മണ്യസ്വാമി ക്ഷേത്രം, പാലാ കടപ്പാട്ടൂര്‍ മഹാദേവക്ഷേത്രം, കൊങ്ങാണ്ടൂര്‍ ശ്രീകൃഷ്ണസ്വാമിക്ഷേത്രം, മറ്റക്കര തുരുത്തിപ്പള്ളി ഭഗവതീക്ഷേത്രം, പള്ളിപ്പുറത്തുകാവ് ഭഗവതീക്ഷേത്രം, ഏറ്റുമാനൂര്‍ മഹാദേവക്ഷേത്രം, വൈക്കം മഹാദേവക്ഷേത്രം, കടുത്തുരുത്തി മഹാദേവക്ഷേത്രം, പാലാ ളാലം മഹാദേവക്ഷേത്രം തുടങ്ങിയ എല്ലാ ക്ഷേത്രങ്ങളും രാമായണമാസാചരണത്തിനൊരുങ്ങി.
രാമായണമാസാചരണത്തിനായി ചങ്ങനാശേരിയില്‍ ക്ഷേത്രങ്ങളൊരുങ്ങി. കര്‍ക്കിടക മാസം 1മുതല്‍ ക്ഷേത്രങ്ങളില്‍ രാമായണ പാരായണവും വിശേഷാല്‍ പൂജകളും നടക്കും. വാഴപ്പള്ളി മഹാദേവക്ഷേത്രം, തൃക്കൊടിത്താനം മഹാക്ഷേത്രം, പെരുന്ന സുബ്രഹ്മണ്യസ്വാമി ക്ഷേത്രം, കാവില്‍ ഭഗവതിക്ഷേത്രം, കീഴ്‌ക്കുളങ്ങര മഹാദേവക്ഷേത്രം, തിരുമല ക്ഷേത്രം, കല്‍ക്കുളത്തു ഭഗവതീക്ഷേത്രം, ഇത്തിത്താനം ഇളങ്കാവ് ദേവീക്ഷേത്രം, പുഴവാത് സന്താനഗോപാലമൂര്‍ത്തിക്ഷേത്രം, തിരുവെങ്കിടപുരം മഹാവിഷ്ണുക്ഷേത്രം, തിരുമലക്ഷേത്രം, മാലൂര്‍ക്കാവ് ഭഗവതീക്ഷേത്രം, ശാസ്താംകോയിക്കല്‍ ധര്‍മ്മശാസ്താക്ഷേത്രം, മോര്‍ക്കുളങ്ങര ഭഗവതീക്ഷേത്രം, തെങ്ങണ മഹാദേവ ക്ഷേത്രം, മാടപ്പള്ളി ഭഗവതീക്ഷേത്രം, കോട്ടമുറി അയ്യപ്പക്ഷേത്രം എന്നിവിടങ്ങളില്‍ 17ന് രാവിലെ 6മുതല്‍ രാമായണ പാരായണവും വിശേഷാല്‍ പൂജകളും നടക്കും.
മാടപ്പാട്: മാടപ്പാട് മങ്കൊമ്പ് ശ്രീഭഗവതീ ക്ഷേത്രത്തില്‍ കര്‍ക്കിടകം 1 മുതല്‍ 31 വരെ രാമായണ മാസാചരണം നടക്കും. 22ന് അഷ്ടദ്രവ്യ മഹാഗണപതിഹോമവും ദേവീഭാഗവത പാരായണവും നാരായണീയ പാരായമവും നടക്കും. നാരങ്ങാവിളക്ക്, നീരാഞ്ജനം എന്നിവയും നടക്കും.
അമയന്നൂര്‍: അമയന്നൂര്‍ വാരിക്കാട്ട് ദേവീക്ഷേത്രത്തില്‍ കര്‍ക്കിടകം 1 മുതല്‍ 31 വരെ രാമായണ മാസാചരണം നടക്കും. സമാപദിവസം തന്ത്രി പള്ളിക്കര സുരേഷ് നമ്പൂതിരിപ്പാടിന്റെ മുഖ്യകാര്‍മ്മികത്വത്തില്‍ അഷ്ടദ്രവ്യമഹാഗണപതിഹോമവും ജന്മനക്ഷത്ര അര്‍ച്ചനയും നടക്കും.
കോട്ടയം: കേരളാ വൈശ്യ ക്ഷേമ സഭ സംസ്ഥാന കമ്മറ്റിയുടെയും വൈശ്യക്ഷേമ വനിതാ സഭ കോട്ടയം ജില്ലാ കമ്മറ്റിയുടെയും ആഭിമുഖ്യത്തില്‍ രാമായണ മാസാചരണം നടത്തും. 17ന് വൈകിട് 5ന് സംസ്ഥാന ജനറല്‍ സെക്രട്ടറി സുരേഷ് ബാബു എന്‍.വാഴൂരിന്റെ പുളിക്കല്‍ കവലയിലുള്ള വസതിയില്‍ രാമായണ പാരായണ ആരംഭം നടത്തും. തുടര്‍ന്നുള്ള ദിവസങ്ങളില്‍ കോട്യം ജില്ലയിലെ വിവിധ ശാഖകളില്‍ പാരായണം നടക്കും. പാരായണ ആരംഭചടങ്ങില്‍ സംസ്ഥാന വൈസ് പ്രസിഡന്റുമാരായ ഗോപിനാഥ് കാഞ്ചിയാര്‍, ഹരിക്കുട്ടന്‍ ചെട്ടിയാലര്‍, സംസ്ഥാന ട്രഷറര്‍ കൃഷ്ണന്‍ ചെട്ടിയാര്‍ അമയന്നൂര്‍, വനിതാ സഭാ കോട്ടയം ജില്ലാ പ്രസിഡന്റ് തങ്കമ്മാള്‍ മീനടം, സംസ്ഥാന കമ്മറ്റിയംഗങ്ങളായ ബിജു ഭരണങ്ങാനം, ഗോപാലകൃഷ്ണന്‍ ചെട്ടിയാര്‍, വിവിധ ശാഖാ ഭാരവാഹികള്‍, വനിതാ സഭാ ഭാരവാഹികള്‍ തുടങ്ങിയവര്‍ സംബന്ധിക്കും.
