കോട്ടയം: വാര്ത്താചിത്രങ്ങളുടെ വിസ്മയം തീര്ക്കുകയാണ് സൈലന്സ് 2013. കോട്ടയം ബസേലിയസ് കോളേജ് ഓഡിറ്റോറിയത്തിലാണ് വേറിട്ട ഈ ഫോട്ടോപ്രദര്ശനം നടന്നുവരുന്നത്. ജില്ലയിലെ പത്രഫോട്ടോഗ്രാഫര്മാരുടെ കൂട്ടായ്മയായ ഫോട്ടോ ജേര്ണലിസ്റ്റ് ഫോറത്തിന്റെ ആഭിമുഖ്യത്തിലാണ് പ്രാഥമിക വാര്ത്താചിത്രപ്രദര്ശനമായ സൈലന്സ് 2013 നടക്കുന്നത്. പ്രദര്ശനം സന്ദര്ശകര്ക്ക് വിസ്മയവും കൗതുകവും വാര്ത്താചിത്രങ്ങളുടെ മനോഹാരിതയും സമ്മാനിക്കുന്നു. കോട്ടയത്തെ 25 പത്രഫോട്ടോഗ്രാഫര്മാരുടെ 125 വാര്ത്താ ചിത്രങ്ങളാണ് ഉള്ക്കൊള്ളിച്ചിരിക്കുന്നത്.
രാഷ്ട്രീയ, സാംസ്കാരിക, കലാ-കായിക, ആരോഗ്യ, വിദ്യാഭ്യാസരംഗം തുടങ്ങി വിവിധ മേഖലകളിലെ സംഭവവികാസങ്ങള് ഇടംപിടിച്ച പ്രദര്ശനത്തില് കേരളം ചര്ച്ചചെയ്ത വാര്ത്തകളുടെ ചിത്രങ്ങള് പ്രായഭേദവ്യത്യാസമില്ലാതെ സന്ദര്ശകര്ക്ക് പുത്തന് അനുഭവം നല്കുന്നു. പ്രദര്ശനത്തില് ന്യൂസ് ഫോട്ടോഗ്രഫി രംഗത്ത് അമ്പതു വര്ഷം പിന്നിട്ട എം.കെ.വര്ഗ്ഗീസിന്റെ ചിത്രങ്ങളും വിക്ടര് ജോര്ജ്ജിന്റെ അനശ്വരചിത്രങ്ങളും ഉള്പ്പെടുന്നു. പ്രദര്ശനത്തോടനുബന്ധിച്ച് പ്രായഭേദമെന്യേ ആര്ക്കും പങ്കെടുക്കാവുന്ന ഫോട്ടോഗ്രഫി മത്സരവും സന്ദര്ശകര്ക്കായി ഒരുക്കിയിട്ടുണ്ട്. പ്രദര്ശനം നാളെ സമാപിക്കും.
