കോട്ടയം: നഗരത്തിലെ മാലിന്യപ്രശ്നം പരിഹരിക്കാന് നഗരസഭ വിജയപുരം ഗ്രാമപഞ്ചായത്തിന് നല്കിയ പദ്ധതി ഇന്നലെ നടന്ന പഞ്ചായത്ത് കമ്മറ്റി തള്ളി. 2014 ഡിസംബറോടെ വടവാതൂര് ഡമ്പിംഗ് യാര്ഡിലെ മാലിന്യ സംസ്കരണം അവസാനിപ്പിക്കുമെന്നും അതിനുള്ള പദ്ധതി നഗരസഭ തയ്യാറാക്കിയെന്നും ആയിരുന്നു ജില്ലാ കളക്ടര് വിളിച്ചുചേര്ത്ത ചര്ച്ചയില് നഗരസഭ മുന്നോട്ടുവച്ച വാദം. എന്നാല് ഈ വാദം അംഗീകരിക്കാന് വിജയപുരം ഗ്രാമപഞ്ചായത്തും സമരസമിതിയും തയ്യാറായില്ല.
പദ്ധതി എന്താണെന്ന് വിശദമായി രേഖാമൂലം തരണമെന്ന പഞ്ചായത്തിന്റെ ആവശ്യം പരിഗണിച്ച് പദ്ധതിയുടെ പൂര്ണ്ണരൂപം പഞ്ചായത്തിന് നല്കാന് കളക്ടര് നിര്ദ്ദേശിക്കുകയായിരുന്നു. ഇതേ തുടര്ന്ന് നഗരസഭ നല്കിയ പദ്ധതിയെക്കുറിച്ച് പഞ്ചായത്ത് കമ്മറ്റി വിശദമായി ചര്ച്ച ചെയ്താണ് പദ്ധതി തളളിയത്. പഞ്ചായത്തിനെയും സമരസമിതിയെയും കബളിപ്പിക്കാന് നഗരസഭ തട്ടിക്കൂട്ടിയ പദ്ധതിയാണിതെന്ന് പഞ്ചായത്ത് കമ്മറ്റി അഭിപ്രായപ്പെട്ടു.
വടവാതൂര് ഡമ്പിംഗ് യാര്ഡ് സമരക്കാര് അടച്ചുപൂട്ടിയിട്ട് ഇന്ന് 18 ദിവസം കഴിഞ്ഞു. ഡമ്പിംഗ് യാര്ഡ് പൂട്ടിയതോടെ നഗരത്തിലെ മാലിന്യ നീക്കം പൂര്ണ്ണമായും സ്തംഭിച്ചു. മാലിന്യം കുമിഞ്ഞുകൂടി നഗരം നാറാന് തുടങ്ങി. നഗരസഭയുടെ യാതൊരു ഉറപ്പും വിശ്വാസമില്ലെന്നും സര്ക്കാരുമായി മാത്രമേ ചര്ച്ചയുള്ളു എന്നുമാണ് പഞ്ചായത്തിന്റെയും സമരസമിതിയുടെയും നിലപാട്. യാതൊരു നടപടിയുമില്ലാതെ മാലിന്യപ്രശ്നം അനന്തമായി നീളുകയാണ്.
