കൊട്ടിയം: കണ്ണനല്ലൂര്‍-കൊല്ലം റൂട്ടില്‍ സ്വകാര്യ ബസുകളുടെ മത്സരയോട്ടം വര്‍ധിച്ചിട്ടും അധികൃതര്‍ മൗനത്തില്‍. സ്വകാര്യ ബസുകളും കെഎസ്‌ആര്‍ടിസി ബസുകളും തമ്മിലാണ്‌ ഇവിടെ പ്രധാനമത്സരം. നൂറിലേറെ സ്വകാര്യ ബസുകള്‍ക്കിടയില്‍ ഇരുപതോളം ട്രാന്‍സ്പോര്‍ട്ട്‌ ബസുകളാണ്‌ റൂട്ടില്‍ സര്‍വീസ്‌ നടത്തുന്നത്‌.
സംസ്ഥാനപാതയായ ഇവിടെ കേസ്‌ രജിസ്റ്റര്‍ ചെയ്യത്തക്ക വലിയ അപകടങ്ങള്‍ ഉണ്ടാകാത്തതാണ്‌ പരിശോധനകള്‍ ശുഷ്കമാകാന്‍ കാരണമാകുന്നത്‌. ചെമ്മാംമുക്ക്‌ കഴിഞ്ഞാല്‍ വാഹന പരിശോധനയില്ലാത്തതാണ്‌ സ്വകാര്യ ബസുകളടക്കമുള്ള വാഹനങ്ങളെ നിയമലംഘനം നടത്താന്‍ പ്രേരിപ്പിക്കുന്നത്‌. പരിശോധന കൂടുതലും ചെമ്മാംമുക്ക്‌ കേന്ദ്രീകരിച്ച് നടക്കുന്ന പിഴയിടീലില്‍ ഒതുങ്ങുകയാണ്‌. അതും പോലീസിന്റെ ടാര്‍ജറ്റ്‌ തികയ്‌ക്കാന്‍ വേണ്ടിയാണത്രെ. അയത്തില്‍, പുന്തലത്താഴം, കണ്ണനല്ലൂര്‍ ഭാഗങ്ങളില്‍ പരിശോധനാ സംഘങ്ങളെ കണ്ടിട്ട്‌ തന്നെ മാസങ്ങള്‍ ആയി. ട്രാഫിക്‌ പോലീസോ കൊട്ടിയം, ഇരവിപുരം പോലീസോ ഈ ഭാഗങ്ങളില്‍ യാതൊരു പരിശോധനയും നടത്താറില്ലെന്ന്‌ യാത്രക്കാര്‍ പറയുന്നു. പുന്തലത്താഴത്തെ ബിവറേജസ്‌ മദ്യഷോപ്പും ചില ബാറുകളും കേന്ദ്രീകരിച്ച് സ്വകാര്യ ബസ് ജീവനക്കാര്‍ മദ്യം വാങ്ങിയ ശേഷം ചില പ്രത്യേക സ്ഥലങ്ങളില്‍ ബസ് ഒതുക്കിയിട്ട്‌ ഉച്ചയോടെ മദ്യപിക്കുന്നതായും പരാതിയുണ്ട്‌. ഉച്ചസമയത്തെ ഒരു ട്രിപ്പ്‌ ക്യാന്‍സല്‍ ചെയ്താണ്‌ ഇത്തരത്തില്‍ മദ്യപാനം നടത്തുന്നതത്രെ. കെഎസ്‌ആര്‍ടിസി ബസ് ജീവനക്കാരെ സ്വകാര്യ ബസുകാര്‍ തടഞ്ഞ്‌ അസഭ്യവര്‍ഷം നടത്തുന്നതും പതിവാണ്‌. എന്നാല്‍ സ്ത്രീകളടക്കമുള്ള ട്രാന്‍സ്പോര്‍ട്ട്‌ ബസിലെ കണ്ടക്ടര്‍മാര്‍ പരാതിക്കൊന്നും പോകാറില്ല.
