മരട്‌: ഏഴാംതരം വിദ്യാര്‍ത്ഥിനിയെ ചായക്കടയില്‍ വച്ച്‌ പീഡനത്തിനിരയാക്കിയ സംഭവത്തില്‍ കേസ്‌ അട്ടിമറിക്കാന്‍ നീക്കം നടക്കുന്നതായി ആരോപണം. മരടില്‍ വാടകക്ക്‌ താമസിച്ചുവരികയായിരുന്നു പെണ്‍കുട്ടിയും കുടുംബവും. സമീപത്തെ ചായക്കടയില്‍ ഭക്ഷണം വാങ്ങാനെത്തിയപ്പോഴാണ്‌ പീഡനം നടന്നതായി പെണ്‍കുട്ടി പോലീസിന് നല്‍കിയ മൊഴിയില്‍ പറയുന്നത്‌. ഇതുപ്രകാരം ചായക്കട ഉടമ പ്രഭാകര(65)നെതിരെ കേസെടുത്ത പോലീസ് ഇയാളെ അറസ്റ്റ്‌ ചെയ്തിരുന്നു. പ്രതി ഇപ്പോഴും ജയിലിലാണ്‌.
പ്രതിയുടെ കുടുംബത്തിലെ ചിലര്‍ക്ക്‌ പോലീസുമായുള്ള അടുപ്പം ഉപയോഗിച്ച്‌ കേസ്‌ അട്ടിമറിക്കാന്‍ നീക്കം നടന്നുവരുന്നതായാണ്‌ ആക്ഷേപം ഉയര്‍ന്നിരിക്കുന്നത്‌. പീഡിപ്പിക്കപ്പെട്ടതായി പറയപ്പെടുന്ന പെണ്‍കുട്ടിയെ വൈദ്യപരിശോധനക്ക്‌ വിധേയയാക്കിയിരുന്നു. ലൈംഗിക പീഡനം നടന്നതായി സ്ഥിരീകരിക്കുന്ന റിപ്പോര്‍ട്ടാണ്‌ പോലീസിന് ലഭിച്ചത്‌. ഇതേത്തുടര്‍ന്നാണ്‌ പ്രഭാകരനെ പ്രതി ചേര്‍ത്ത്‌ പോലീസ് കേസെടുത്തതും ഇയാള്‍ അറസ്റ്റിലായതും.
തന്നെ മാനഭംഗപ്പെടുത്തിയതായി പെണ്‍കുട്ടി വീട്ടില്‍ അറിയിച്ചിരുന്നു. തുടര്‍ന്നാണ്‌ വിവരം പുറത്തറിഞ്ഞ്‌ നാട്ടുകാര്‍ സംഘടിച്ച്‌ പ്രതിഷേധവുമായി രംഗത്തുവന്നത്‌. ചായക്കട മരടില്‍ പ്രവര്‍ത്തിപ്പിക്കരുതെന്ന ആവശ്യവുമായി ചിലര്‍ ആവശ്യപ്പെട്ടെങ്കിലും ഉടമ വഴങ്ങിയില്ല. തുടര്‍ന്ന്‌ പീഡന വിവരം സ്ഥിരീകരിച്ചതോടെ പ്രദേശത്തുകാരായ നിരവധി പേരെത്തി കട അടിച്ചു തകര്‍ക്കുകയായിരുന്നു. വിവരം ലഭിച്ച്‌ സ്ഥലത്തെത്തിയ പനങ്ങാട്‌ പോലീസ് ജീപ്പ്പില്‍ കയറ്റി നാട്ടുകാരുടെ മര്‍ദ്ദനം ഏല്‍ക്കാതെ പ്രതിയെ രക്ഷപ്പെടുത്തുകയായിരുന്നു.
പെണ്‍കുട്ടിയുടെ മൊഴിയും വൈദ്യപരിശോധനാ റിപ്പോര്‍ട്ടുമാണ്‌ പ്രഭാകരനെതിരെ ശക്തമായ വകുപ്പുകള്‍ ഉള്‍പ്പെടുത്തി ആദ്യം കേസെടുക്കുവാന്‍ പോലീസിനെ നിര്‍ബന്ധിതമാക്കിയത്‌. എന്നാല്‍ പിന്നീട്‌ കേസ്‌ ദുര്‍ബലമാക്കുവാന്‍ ചില ഗൂഢാലോചനകള്‍ നടന്നതായും പറയപ്പെടുന്നു. പീഡിപ്പിക്കപ്പെട്ട പെണ്‍കുട്ടിയുടെ അടുത്ത ബന്ധുവിനെ കഞ്ചാവ്‌ കൈവശംവച്ചു എന്ന കുറ്റത്തിന്‌ പോലീസ് പിടികൂടിയിരുന്നു. ഇതിനിടെ ചിലരുടെ ഭീഷണിയെത്തുടര്‍ന്നാണെന്ന്‌ പറയപ്പെടുന്നു പെണ്‍കുട്ടിയും കുടുംബവും നാട്ടില്‍നിന്നും അപ്രത്യക്ഷരായി. ഇവര്‍ ഇപ്പോള്‍ എവിടെയാണെന്ന്‌ ആര്‍ക്കും അറിയില്ല. കേസ്‌ കോടതിയിലെത്തുമ്പോള്‍ മൊഴിമാറ്റി പറഞ്ഞ്‌ പ്രതിയെ രക്ഷപ്പെടുത്തുവാന്‍ ഇവരുടെമേല്‍ സമ്മര്‍ദ്ദം ചെലുത്തിവരികയാണെന്നാണ്‌ ഇപ്പോള്‍ ആക്ഷേപം ഉയര്‍ന്നിരിക്കുന്നത്‌. ഇതിന്റെ ഭാഗമായാണ്‌ പെണ്‍കുട്ടിയുടെ ബന്ധുവിനെ കഞ്ചാവ്‌ കേസില്‍പ്പെടുത്തിയതെന്നും പറയപ്പെടുന്നു.
പ്രതി പ്രഭാകരന്‍ അറസ്റ്റിലായതിന്റെ നാലാം ദിവസമാണ്‌ പീഡനത്തിനിരയായ പെണ്‍കുട്ടിയുടെ അമ്മാവനെ പോലീസ് പിടികൂടിയത്‌. കഞ്ചാവ്‌ കൈവശംവെച്ചെന്നായിരുന്നു ഇയാള്‍ക്കെതിരെയുള്ള കേസ്‌. എന്നാല്‍ ഇത്‌ കെട്ടിച്ചമച്ചതാണെന്നും പെണ്‍കുട്ടിയുടെ മൊഴിമാറ്റുന്നതിന്‌ വീട്ടുകാരെ സമ്മര്‍ദ്ദത്തിലാക്കാനുള്ള ഗൂഢാലോചനയുടെ ഭാഗമാണെന്നുമാണ്‌ ഇപ്പോള്‍ ഉയര്‍ന്നുവരുന്ന ആരോപണം.
