കൊട്ടാരക്കര: അമ്പത്തിമൂന്നാമത്‌ റവന്യൂ ജില്ലാ സ്കൂള്‍ കലോത്സവത്തിന്‌ ഇന്ന് വൈകിട്ട്‌ നാലിന്‌ കൊട്ടാരക്കര ഗവ. ബോയ്സ്‌ സ്കൂള്‍ ഗ്രൗണ്ടില്‍ തിരിതെളിയും. 12 ഉപജില്ലകളില്‍ നിന്നായി യുപി, എച്ച്‌എസ്‌, എച്ച്‌എസ്‌എസ്‌, വിഎച്ച്‌എസ്‌എസ്‌ വിഭാഗങ്ങളില്‍ നിന്നായി 6500ലധികം കലാപ്രതിഭകള്‍ പത്തുവേദികളിലായി നാല്‍ദിവസം നീണ്ടുനില്‍ക്കുന്ന മത്സരത്തില്‍ തങ്ങളുടെ കഴിവുകള്‍ തെളിയിക്കും.
ഇന്ന് വൈകിട്ട്‌ മൂന്നിന്‌ വിളംബരഘോഷയാത്രയോടെ പരിപാടികള്‍ക്ക്‌ തുടക്കമാകും. ഘോഷയാത്രയ്‌ക്ക്‌ ശേഷം നാലിന്‌ നടക്കുന്ന പൊതുസമ്മേളനത്തില്‍ വച്ച്‌ യുവജനോത്സവത്തിന്റെ ഔപചാരിക ഉദ്ഘാടനം കേന്ദ്ര തൊഴില്‍സഹമന്ത്രി കൊടിക്കുന്നില്‍ സുരേഷ്‌ നിര്‍വഹിക്കും. അയിഷാപോറ്റി എംഎല്‍എ അധ്യക്ഷയായിരിക്കും.
രണ്ടിന്‌ മത്സരങ്ങള്‍ ഉണ്ടായിരിക്കുന്നതല്ല. മൂന്നിന്‌ രാവിലെ ഒന്‍പത്‌ മുതല്‍ ബോയ്സ്‌ ഗ്രൗണ്ട്‌, ഗേള്‍സ്‌ ഗ്രൗണ്ട്‌, എംപി ബില്‍ഡിംഗ്‌, ബ്രാഹ്മണസമാജം ഹാള്‍, ബോയ്സ്‌ സ്കൂള്‍ മെയിന്‍ ഓഡിറ്റോറിയം, സെന്‍ട്രല്‍ ഹാള്‍, ടൗണ്‍ യുപിഎസ്‌, മാര്‍ത്തോമാ സ്കൂള്‍, വിമലാംബിക എല്‍പിഎസ്‌ എന്നിവിടങ്ങളിലാണ്‌ മത്സരങ്ങള്‍ നടക്കുന്നത്‌. ഇതോടനുബന്ധിച്ചുള്ള രജിസ്ട്രേഷന്‌ ഇന്നലെ തന്നെ തുടക്കമായി.
17 പുതിയ ഇനങ്ങള്‍ ആണ്‌ ഇത്തവണത്തെ സവിശേഷത. യുപി വിഭാഗത്തില്‍ 950, എച്ച്‌എസ്‌-2024, എച്ച്‌എസ്‌എസ്‌-2286, യുപി സംസ്കൃതം-466, എച്ച്‌എസ്‌-439, യുപി അറബി-216, എച്ച്‌എസ്‌-216 എന്നിങ്ങനെയാണ്‌ മത്സരാര്‍ത്ഥികള്‍. കൂടാതെ വിവിധ അപ്പീലുകളുമായി എത്തുന്നവര്‍ വേറെയും. നൃത്തഇനങ്ങള്‍ക്ക്‌ രണ്ട്‌ സ്റ്റേജ്‌ ഏര്‍പ്പെടുത്തി മത്സരങ്ങള്‍ സമയബന്ധിതമായി പൂര്‍ത്തീകരിക്കാനാണ്‌ സംഘാടകരുടെ ശ്രമം.
യുപി വിഭാഗത്തില്‍ പുതുതായി കൂട്ടിച്ചേര്‍ക്കപ്പെട്ട ഉറുദു കവിതാരചന, ഉറുദുക്വിസ്‌, ഉറുദു ഗ്രൂപ്പ്‌ സോംഗ്‌ ഉള്‍പ്പെടെ 33 ഇനങ്ങളും ഹൈസ്കൂള്‍ ജനറല്‍ വിഭാഗത്തില്‍ ഉറുദു ഗസല്‍ ആലാപനം, നങ്ങ്യാര്‍കൂത്ത്‌, ഉറുദുപ്രസംഗം, ചവിട്ടുനാടകം, വഞ്ചിപ്പാട്ട്‌, നാടന്‍പാട്ട്‌, ഉറുദു ഗ്രൂപ്പ്സോംഗ്‌ ഉള്‍പ്പെടെ 89 ഇനങ്ങളും ഹയര്‍സെക്കണ്ടറി വിഭാഗത്തില്‍ ഉറുദു ഗസല്‍ ആലാപനം, നങ്ങ്യാര്‍കൂത്ത്‌, അറബിപ്രസംഗം, ഉറുദുക്വിസ്‌, ചവിട്ടുനാടകം, വഞ്ചിപ്പാട്ട്‌, നാടന്‍പാട്ട്‌ എന്നിവയുള്‍പ്പെടെ 105 ഇനങ്ങളും ആണ്‌ മത്സരത്തിനുള്ളത്‌.
ഇത്തവണ ഹൈസ്കൂള്‍ വിഭാഗത്തില്‍ ഓടക്കുഴല്‍, നങ്ങ്യാര്‍കൂത്ത്‌, ഉപന്യാസം (ഉറുദു), ഉറുദു കഥാരചന, കവിതാരചന എന്നിവക്ക്‌ മത്സരാര്‍ത്ഥികള്‍ ഇല്ല. ഹയര്‍സെക്കണ്ടറി വിഭാഗത്തില്‍ നാദസ്വരം, മദ്ദളം, ഓടക്കുഴല്‍, ഉറുദു ഉപന്യാസം, കഥാരചന, ബാന്റ്മേളം, നങ്ങ്യാര്‍കൂത്ത്‌, ചവിട്ട്നാടകം എന്നിവയ്‌ക്കും മത്സരാര്‍ത്ഥികള്‍ ഇല്ല.
സംസ്കൃതോത്സവത്തിന്‌ യുപി, എച്ച്‌എസ്‌ വിഭാഗത്തില്‍ 19 വീതം ഇനങ്ങളില്‍ ആണ്‌ മത്സരം. അറബിക്‌ യുപി 13, എച്ച്‌എസ്‌ 19 ഇനങ്ങളില്‍ ആണ്‌ മത്സരം. ഭക്ഷണം ക്രമീകരിക്കുന്നത്‌ കൊട്ടാരക്കര മഹാഗണപതി ക്ഷേത്രത്തിന്‌ സമീപം ധന്യാഓഡിറ്റോറിയത്തില്‍ ആണ്‌.
