വൈറ്റില: മദ്യപിച്ച് ലക്കുകെട്ട് ബസ് ഓടിച്ച കെഎസ്ആര്ടിസി ഡ്രൈവര് അറസ്റ്റിലായി. വൈറ്റില ജംഗ്ഷനിലായിരുന്നു സംഭവം. തൊടുപുഴയില്നിന്നും എറണാകുളത്തേക്ക് വന്ന ലിമിറ്റഡ് സ്റ്റോപ്പ് ബസ്സിലെ ഡ്രൈവര് പാലക്കാട് ആലത്തൂര് സ്വദേശി പുത്തൂര്ക്കുളം രാമന്കുട്ടിയുടെ മകന് എ.പ്രീത് കുമാര് (38) ആണ് അറസ്റ്റിലായത്.
ബസ് തൊടുപുഴയില്നിന്നും പുറപ്പെട്ടപ്പോള്തന്നെ ഡ്രൈവര് മദ്യപിച്ചിരുന്നതായി സംശയമുണ്ടായിരുന്നുവെന്ന് ബസ്സിലെ യാത്രക്കാര് പറഞ്ഞു. വൈറ്റിലക്ക് സമീപത്തുവച്ച് കെഎസ്ആര്ടി ബസ് ഒരു സ്വകാര്യ ബസ്സുമായി ഉരസി. ഇതാണ് വാക്കേറ്റത്തിലേക്കും ഒടുവില് ഡ്രൈവര് പ്രീത്കുമാറിന്റെ അറസ്റ്റിലും കലാശിച്ചത്. യാത്രക്കാരും നാട്ടുകാരും അറിയിച്ചതിനെത്തുടര്ന്ന് ട്രാഫിക് എസ്ഐ അബൂബക്കറിന്റെ നേതൃത്വത്തില് പോലീസ് സ്ഥലത്തെത്തി ഡ്രൈവറെ അറസ്റ്റ് ചെയ്യുകയും ബസ് കസ്റ്റഡിയിലെടുക്കുകയുമായിരുന്നു. ഡ്രൈവര് പ്രീത്കുമാറിനെതിരെ മദ്യപിച്ച് വാഹനമോടിച്ചതിനും മറ്റും കേസെടുത്തു. ഇതേ കുറ്റത്തിന് ഇയാള് പാലക്കാടുവച്ച് നടപടിക്ക് വിധേയനായിട്ടുണ്ടെന്ന് എറണാകുളം എടിഒ പറഞ്ഞു. അറസ്റ്റിലായ ഡ്രൈവറുടെ ലൈസന്സ് സസ്പെന്റ് ചെയ്യാന് നടപടിയെടുക്കുമെന്ന് ട്രാഫിക് പോലീസ് അറിയിച്ചു.
