കൊച്ചി: ഫെബ്രുവരി 28ന്‌ നടക്കുന്ന അഖിലേന്ത്യാ പൊതുപണിമുടക്ക്‌ വിജയിപ്പിക്കാന്‍ ബഹുജനങ്ങളോടും തൊഴിലാളികളോടും സംയുക്ത ട്രേഡ്‌ യൂണിയന്‍ സംസ്ഥാന കണ്‍വെന്‍ഷന്‍ ആഹ്വാനം ചെയ്തു. വിലക്കയറ്റം തടയുക, വ്യവസായ സംരംഭകര്‍ക്ക്‌ വാഗ്ദാനം നല്‍കുന്ന ആനുകൂല്യങ്ങളെ തൊഴില്‍ സംരക്ഷണവുമായി ബന്ധപ്പെടുത്താന്‍ നടപടി സ്വീകരിക്കുക, തൊഴില്‍ നിയമങ്ങള്‍ കര്‍ശനമായി നടപ്പാക്കുക, അസംഘടിതമേഖലയിലെ എല്ലാ തൊഴിലാളികള്‍ക്കും സാമൂഹ്യസുരക്ഷ ഏര്‍പ്പെടുത്തുക, പൊതുമേഖലാ സ്ഥാപനങ്ങളുടെ ഓഹരി വിറ്റഴിക്കല്‍ നിര്‍ത്തലാക്കുക, കരാര്‍വല്‍ക്കരണം നിര്‍ത്തലാക്കുക തുടങ്ങിയ ആവശ്യങ്ങളുന്നയിച്ച്‌ നടക്കുന്ന പണിമുടക്ക്‌ വന്‍ വിജയമാക്കാന്‍ കണ്‍വെന്‍ഷന്‍ തീരുമാനിച്ചു.
പണിമുടക്കിന്റെ പ്രചാരണാര്‍ത്ഥം ഫ്രെബുവരി ഒന്ന്്‌ വൈകിട്ട്‌ അഞ്ചിന്‌ എറണാകുളം രാജേന്ദ്രമൈതാനത്ത്‌ നടക്കുന്ന പൊതുസമ്മേളനത്തില്‍ സിഐടിയു അഖിലേന്ത്യാ പ്രസിഡന്റ്‌ എ കെ പത്മനാഭന്‍, ഐഎന്‍ടിയുസി ദേശീയ പ്രസിഡന്റ്‌ ഡോ. സഞ്ജീവ റെഢീ, ബിഎംഎസ്‌ അഖിലേന്ത്യാ പ്രസിഡന്റ്‌ അഡ്വ. സി.കെ. സജി നാരായണന്‍, എഐടിയുസി നേതാവ്‌ ഗുരുദാസ്‌ ദാസ്ഗുപ്ത എന്നിവര്‍ പങ്കെടുക്കും. ജനുവരി 25 മുതല്‍ ഫ്രെബുവരി അഞ്ചിനുമിടയില്‍ ജില്ലാ കണ്‍വെന്‍ഷന്‍ നടത്തും. ഫെബ്രുവരി 21 മുതല്‍ 25 വരെ എല്ലാ ജില്ലകളിലും വാഹന പ്രചാരണയാത്രകളും ഫെബ്രുവരി 25ന്‌ പഞ്ചായത്ത്‌ കേന്ദ്രങ്ങളില്‍ സായാഹ്ന ധര്‍ണയും നടക്കും. ലഘുലേഖ അച്ചടിച്ച്‌ വിതരണം ചെയ്യും.
എറണാകുളം ടൗണ്‍ ഹാളില്‍ നടന്ന കണ്‍വെന്‍ഷനില്‍ സിഐടിയു സംസ്ഥാന പ്രസിഡന്റ്‌ കെ എന്‍ രവീന്ദ്രനാഥ്‌ അധ്യക്ഷനായി. ഐഎന്‍ടിയുസി സംസ്ഥാന പ്രസിഡന്റ്‌ ആര്‍. ചന്ദ്രശേഖരന്‍, സിഐടിയു സംസ്ഥാന ജനറല്‍ സെക്രട്ടറി കാനം രാജേന്ദ്രന്‍, എന്‍ കെ മോഹന്‍ദാസ്‌ എന്നിവര്‍ സംസാരിച്ചു. കെ ചന്ദ്രന്‍പിള്ള സ്വാഗതവും കെ ഒ ഹബീബ്‌ നന്ദിയും പറഞ്ഞു. പി കെ ഗോപാലന്‍(ഐഎന്‍ടിയുസി), വി രാധാകൃഷ്ണന്‍(ബിഎംഎസ്‌), സി എ കുര്യന്‍(എഐടിയുസി), ഫിലിപ്പ്‌ കെ തോമസ്‌(യുടിയുസി), ജി ബി ഭട്ട്‌(എന്‍എല്‍ഒ), ഉഴവൂര്‍ വിജയന്‍(എന്‍എല്‍സി), എം കെ തങ്കപ്പന്‍(ടിയുസിഐ), എം കെ കണ്ണന്‍(എച്ച്‌എംഎസ്‌), ഏ ഏ അബ്രഹാം(കെടിയുസി), ഡി രഘുനാഥ്‌ പനവേലി(എസ്ടിയു), സോണിയ ജോര്‍ജ്‌(സേവ), പി എം ദിനേശന്‍(എഐടിയുടിയുസി), കെ പി അനില്‍കുമാര്‍(ടിയുസിസി) എന്നിവര്‍ കണ്‍വെന്‍ഷനില്‍ പങ്കെടുത്തു.
പ്രതികരിക്കാൻ ഇവിടെ എഴുതുക: