മൂവാറ്റുപുഴ: കൃഷിഭവനു മുന്നില് അവശനിലയില് കണ്ട വൃദ്ധയെ പഞ്ചായത്ത് മെമ്പറുടെ നേതൃത്തില് ആശുപത്രിയിലാക്കി. രണ്ടാര്കര നെടുങ്കാട്ട് മോളേല് പുത്തന്പുരയില് ലക്ഷ്മി(70) ആണ് ചൊവ്വാഴ്ച ഉച്ചയോടെ ആവോലി കൃഷിഭവനു മുന്നില് കിടന്നിരുന്നത്. വൈകിട്ടായിട്ടും വൃദ്ധ ഉണരാതിരുന്നതിനാല് നാട്ടുകാര് പോലീസിനെ വിവരം അറിയിച്ചിരുന്നു. പൊലീസെത്തിയെങ്കിലും തുടര് നടപടികള് സ്വീകരിക്കാതെ മടങ്ങി. വൃദ്ധയെ ആശുപത്രിയിലേക്ക് മാറ്റാന് പരിസരവാസികളും തയ്യാറായില്ല.
കൊടും തണുപ്പിലും രാത്രിയില് തറയില് കിടന്ന വൃദ്ധയെ ഇന്നലെ ഉച്ചയോടെ കൃഷിവകുപ്പ് ഇടപെട്ടതിനെ തുടര്ന്നാണ് ആശുപത്രിയിലേക്ക് നീക്കാന് തയ്യാറായത്. പഞ്ചായത്ത് മെമ്പര് ശാന്ത കരുണാകരന്റെ നേതൃത്വത്തില് സമീപവാസിയായ അനന്തപത്മനാഭന്റെ വാഹനത്തില് ആശുപത്രിയിലെത്തിക്കുകയായിരുന്നു.
പതിവായി ക്ഷേത്ര ദര്ശനത്തിന് എത്തുന്ന ഇവര്ക്ക് ക്ഷേത്രത്തില് നിന്നുമാണ് ഭക്ഷണം നല്കിവരുന്നത്. ഏതാനും നാള് മുമ്പ് വാഹന അപകടത്തില് മുഖത്തിന് പരിക്കേറ്റ് ചികിത്സയിലായിരുന്നു.
ആരോരുമില്ലാത്ത ഇവരെ ഏറ്റെടുക്കാന് മനുഷ്യാവകാശ സംഘടനകള് ആരും തയ്യാറാകാത്തതോടെ ആശുപത്രിയില് തന്നെ തങ്ങിയിരിക്കുകയാണ് ഇവര്.
