ന്യൂദൽഹി: ഇന്ത്യൻ ക്രിക്കറ്റ് താരം യുസ്വേന്ദ്ര ചഹൽ രാഷ്ട്രീയത്തിലേക്ക് പ്രവേശിച്ചു. ബിജെപിയിൽ ചേർന്ന ചഹലിനെ പാർട്ടിയുടെ പിന്നാക്ക വിഭാഗ സംഘടനയായ ഒബിസി മോർച്ചയുടെ പുതുക്കിയ ദേശീയ കമ്മിറ്റിയിൽ അംഗമായി നിയമിച്ചു. ബിജെപി ദേശീയ അധ്യക്ഷൻ നിതിൻ നബിനാണ് ഇതുസംബന്ധിച്ച പ്രഖ്യാപനം നടത്തിയത്.
ഒബിസി മോർച്ചയുടെ ദേശീയ ടീമിലേക്കുള്ള വിപുലമായ പുനഃസംഘടനയുടെ ഭാഗമായാണ് യുസ്വേന്ദ്ര ചഹലിനെ ഉൾപ്പെടുത്തിയത്. ദേശീയ ഒബിസി മോർച്ചയിൽ പ്രത്യേക ക്ഷണിതാവായാണ് ചഹലിന് ചുമതല നൽകിയിരിക്കുന്നതെന്നും റിപ്പോർട്ടുകളുണ്ട്.
ബിജെപി ദേശീയ അധ്യക്ഷൻ നിതിൻ നബിന്റെ നിർദ്ദേശപ്രകാരമാണ് പുതിയ ഭാരവാഹികളെയും അംഗങ്ങളെയും നിയമിച്ചത്. കായിക രംഗത്തുനിന്ന് രാഷ്ട്രീയത്തിലേക്ക് കടന്നുവരുന്ന പ്രമുഖ താരങ്ങളുടെ പട്ടികയിലേക്കാണ് ഇതോടെ യുസ്വേന്ദ്ര ചഹലും ഇടംപിടിച്ചിരിക്കുന്നത്. വിഷയത്തിൽ കൂടുതൽ വിശദാംശങ്ങൾ പുറത്തുവരാനിരിക്കുന്നതേയുള്ളൂ.


















