ന്യൂഡൽഹി ; ശബരിമല തീർഥാടകർക്ക് വിമാനത്തിൽ ഇരുമുടിക്കെട്ട് കൊണ്ടുപോകാന് അനുമതി . കേന്ദ്ര വ്യോമയാന മന്ത്രി കെ. റാം മോഹൻ നായിഡുവാണ് ഇക്കാര്യം അറിയിച്ചത്. തുടർച്ചയായ മൂന്നാം വർഷമാണ് അനുമതി നൽകുന്നത്. ഇതിന്റെ ഉത്തരവും മന്ത്രി എക്സിൽ പങ്കുവച്ചു. അയ്യപ്പഭക്തർക്ക് സുഗമമായി തീർഥാടനം നടത്തുന്നതിനായി ബിസിഎഎസ്, സിഐഎസ്എഫ്, വിമാനത്താവള നടത്തിപ്പുകാർ എന്നിവരുൾപ്പെടെ എല്ലാവർക്കും നിർദേശങ്ങൾ നൽകിയതായും മന്ത്രി പറഞ്ഞു
‘ സ്വാമിയേ ശരണം അയ്യപ്പാ!
ശബരിമല തീർത്ഥാടകർ ‘ഇരുമുടി കെട്ട്’ വഹിക്കുന്നത് നൂറ്റാണ്ടുകൾ പഴക്കമുള്ളതും, അഗാധമായ വിശ്വാസവും ഭക്തിയും നിറഞ്ഞതുമായ ഒരു ആചാരമാണ്. ഭക്തരുടെ ഈ വികാരങ്ങളെ മാനിച്ചുകൊണ്ട്, വിമാനത്തിനുള്ളിൽ (എയർക്രാഫ്റ്റ് ക്യാബിനിൽ) ഇരുമുടി കെട്ട് കൊണ്ടുപോകാൻ ഭക്തർക്ക് നൽകിയിരുന്ന അനുമതി, തുടർച്ചയായ മൂന്നാം വർഷവും അനുവദിച്ചിരിക്കുന്നു എന്ന സന്തോഷവാർത്ത അറിയിക്കുന്നു.
അയ്യപ്പ ഭക്തർക്ക് യാതൊരു ബുദ്ധിമുട്ടും കൂടാതെ, സുഗമമായി തങ്ങളുടെ തീർത്ഥാടനം പൂർത്തിയാക്കാൻ സാധിക്കുന്നതിനായി, BCAS, CISF, എയർപോർട്ട് അധികൃതർ ഉൾപ്പെടെ ബന്ധപ്പെട്ട എല്ലാ വിഭാഗങ്ങൾക്കും ആവശ്യമായ നിർദ്ദേശങ്ങൾ നൽകിയിട്ടുണ്ടെന്ന് ഉറപ്പുവരുത്തിയിട്ടുണ്ട്.‘ എന്നാണ് റാം മോഹൻ നായിഡുവിന്റെ എക്സ് പോസ്റ്റ്.


















