മലപ്പുറം: കേരളത്തിലുള്പ്പെടെ ദക്ഷിണേന്ത്യന് സംസ്ഥാനങ്ങളിലേക്ക് കോടിക്കണക്കിന് രൂപയുടെ എംഡിഎംഎ കടത്തുന്നതിലെ മുഖ്യകണ്ണികളായ നൈജീരിയന് പൗരനെയും ഭാര്യയെയും മുംബയില് നിന്ന് കേരള പൊലിസ് പിടികൂടി.നൈജീരിയക്കാരനായ ഇക്കേചുക്വു പോള് ഒഗ്ബോണ്ണ, ഭാര്യ മുംബയ് സ്വദേശിനി ആരതി എന്നിവരെയാണ് കൊണ്ടോട്ടി പൊലിസ് മുംബയ് ഉള്വെയില്നിന്ന് അറസ്റ്റ് ചെയ്തത്.
കഴിഞ്ഞ 15 വര്ഷമായി ഇന്ത്യയില് താമസിച്ച് ചില്ലറ വിതരണക്കാര്ക്ക് ലഹരിമരുന്ന് എത്തിക്കുന്നയാളാണ് പോള് ഒഗ്ബോണ്ണ. എട്ട് വര്ഷം മുന്പ് ആരതിയെ വിവാഹം കഴിച്ച ശേഷം ഇരുവരും ചേര്ന്നാണ് ദക്ഷിണേന്ത്യന് സംസ്ഥാനങ്ങളിലെ ലഹരി വ്യാപാരം നിയന്ത്രിച്ചിരുന്നത്.
കഴിഞ്ഞ ജൂണ് 26-ന് കൊണ്ടോട്ടി അരൂരില്നിന്ന് രതീഷിനെ 780 ഗ്രാം എംഡിഎംഎയുമായി പിടികൂടിയതാണ് ഇക്കേചുക്വു പോള് ഒഗ്ബോണ്ണയിലേക്കും ഭാര്യ ആരതിയിലേക്കും അന്വേഷണം എത്തിച്ചത്. രതീഷിന് ലഹരിമരുന്ന് ലഭിച്ച ഉറവിടം തേടിയുള്ള അന്വേഷണത്തില് പത്തോളം പേരെ പൊലിസ് നേരത്തെ അറസ്റ്റ് ചെയ്തിരുന്നു. ഇവരുടെ ബാങ്ക് അക്കൗണ്ട് വിവരങ്ങള് പരിശോധിച്ചപ്പോഴാണ് ഇടനിലക്കാരനായി പ്രവര്ത്തിക്കുന്ന പോള് ഒഗ്ബോണ്ണയെക്കുറിച്ച് പൊലിസിന് സൂചന ലഭിച്ചത്.
കേരളത്തിലെ പ്രധാന കണ്ണികള് പിടിയിലായതോടെ, സമ്പാദിച്ച പണം നൈജീരിയയിലേക്ക് കടത്തിയ ശേഷം രാജ്യം വിടാന് ശ്രമിക്കവെയാണ് പ്രതികള് പിടിയിലായത്.


















