ലൂധിയാന: സ്വാതന്ത്ര്യസമയത്ത് സർക്കാരുകൾക്ക് പിഴവുകൾ സംഭവിച്ചിട്ടുണ്ടെങ്കിൽ, കർഷകരുടെയും രാജ്യത്തിന്റെയും ക്ഷേമത്തിനായി അവ തിരുത്തുകയും ആവശ്യമായ പരിഷ്കാരങ്ങൾ നടപ്പാക്കുകയും വേണമെന്ന് ഭാരതീയ കിസാൻ സംഘ് കേന്ദ സർക്കാരിനോട് ആവശ്യപ്പെട്ടു. കിസാൻ സംഘിന്റെ അഖിലേന്ത്യാ എക്സിക്യൂട്ടീവ് യോഗമാണ് വിവിധ ആവശ്യങ്ങൾ കേന്ദ്ര സർക്കാരിനുമുന്നിൽ വെച്ചത്.
പഞ്ചാബിലെ ലൂധിയാനയിൽ നടന്ന എക്സിക്യൂട്ടീവിൽ അംഗീകരിച്ച പ്രമേയങ്ങളിൽ,
സിന്ധു നദീതടത്തിലെ നദീജലം പ്രയോജനപ്പെടുത്തി പഞ്ചാബ്, ഹരിയാന, രാജസ്ഥാൻ, ജമ്മു കശ്മീർ എന്നീ സംസ്ഥാനങ്ങളിൽ ജലസേചന സംവിധാനം വികസിപ്പിക്കാൻ കേന്ദ്ര സർക്കാർ നടപടി സ്വീകരിക്കണമെന്ന് ആവശ്യപ്പെടുന്നു. പാകിസ്ഥാൻ പിന്തുണയോടെയുള്ള ഭീകരാക്രമണങ്ങളും അതിർത്തി കടന്നുള്ള അനധികൃത ലഹരിമരുന്ന് കടത്തും ഭാരതത്തിൽ തുടരുകയാണ്. കഴിഞ്ഞ വർഷം ആഗോളതലത്തിൽ ശ്രദ്ധ നേടിയ ‘ഓപ്പറേഷൻ സിന്ദൂർ’, പല വെല്ലുവിളിയെ അതിജീവിച്ച് ഭാരതം കഴിവും കരുത്തുമുള്ള രാഷ്ട്രമാണെന്ന് തെളിയിച്ചവെന്ന് വിലയിരുത്തുന്നു.
2047-ഓടെ വികസിത ഭാരതം എന്ന ദേശീയ ലക്ഷ്യം മുൻനിർത്തി ഭാരതീയ കിസാൻ സംഘം കേന്ദ്ര സർക്കാരിന് മുന്നിൽ ഉയർത്തിയ ആവശ്യങ്ങൾ ഇവയാണ്.
1. സിന്ധു നദീതടത്തിലെ നദികളെ പ്രയോജനപ്പെടുത്തി ജമ്മു കശ്മീർ, പഞ്ചാബ്, ഹരിയാന, രാജസ്ഥാൻ എന്നീ സംസ്ഥാനങ്ങളിൽ ജലസേചന സംവിധാനം വികസിപ്പിച്ച് ആവശ്യമായ ജലവിതരണം ഉറപ്പാക്കണം. ഇതിലൂടെ കർഷകരുടെ ദീർഘകാലമായുള്ള ആവശ്യം നിറവേറ്റുന്നതിനൊപ്പം ഭൂമിയുടെ ഉപയോഗക്ഷമതയും ഉൽപ്പാദനക്ഷമതയും വർധിപ്പിച്ച് രാജ്യം പുരോഗതിയുടെ പാതയിൽ മുന്നേറണം.
2. സിന്ധു നദീതടത്തിൽനിന്ന് ജലം ലഭ്യമാക്കുന്നതിനായി നദീസംയോജന പദ്ധതികളുടെ പ്രവർത്തനങ്ങൾ വേഗത്തിലാക്കണം. ജമ്മു, പഞ്ചാബ്, ഹരിയാന, രാജസ്ഥാൻ എന്നീ പ്രദേശങ്ങളിലെ ജലസേചന സൗകര്യം ലഭിക്കാത്ത കർഷകർക്ക് ആവശ്യമായ ജലവിതരണവും ലഭ്യതയും ഉറപ്പാക്കണം. ഇതിലൂടെ ഗ്രാമീണ മേഖലകളുടെ സമ്പദ്വ്യവസ്ഥയിലും സമൃദ്ധിയിലും അഭൂതപൂർവമായ മാറ്റമുണ്ടാകും.
.
3. എൽ നിനോ പ്രതിഭാസം, വരൾച്ച, മഴയെ ആശ്രയിച്ചുള്ള കൃഷി, കാലാവസ്ഥാ വ്യതിയാനത്തെ തുടർന്നുണ്ടാകുന്ന വെള്ളപ്പൊക്കം തുടങ്ങിയ പ്രശ്നങ്ങൾ നേരിടുന്നതിനും രാജ്യത്തെ കോടിക്കണക്കിന് കർഷകരെ ശാക്തീകരിക്കുന്നതിനുമായി സിന്ധു നദീതടത്തിലെ നദീജലം ഉപയോഗിച്ച് ജമ്മു കശ്മീർ, പഞ്ചാബ്, ഹരിയാന, രാജസ്ഥാൻ എന്നീ സംസ്ഥാനങ്ങളിൽ ജലസേചന സൗകര്യം വികസിപ്പിക്കുന്നതിന് ആവശ്യമായ ബജറ്റ് വിഹിതം അനുവദിക്കണം.
4. സിന്ധു നദീതട സംവിധാനത്തിൽനിന്ന് പഞ്ചാബ്, ഹരിയാന, രാജസ്ഥാൻ തുടങ്ങിയ സംസ്ഥാനങ്ങളിലെ ജലസേചന സംവിധാനങ്ങളിലേക്ക് ജലം എത്തിക്കുന്നതിലൂടെ ജലവിതരണവുമായി ബന്ധപ്പെട്ട് നിലവിലുള്ള തർക്കങ്ങൾക്കും പ്രശ്നങ്ങൾക്കും പരിഹാരം കാണാൻ സാധിക്കും.
കർഷകരോടുള്ള കിസാൻ സംഘിന്റെ അഭ്യർഥനകൾ ഇവയാണ്.
നദീസംയോജനം, കനാലുകൾ നിർമിക്കുന്നതിനാവശ്യമായ ഭൂമി ലഭ്യമാക്കൽ തുടങ്ങിയ വിഷയങ്ങളിൽ ക്രിയാത്മകമായും അനുകൂലമായും മുന്നോട്ടുവരാൻ ഈ മേഖലയിലെ കർഷകരോടും ഭാരതീയ കിസാൻ സംഘം അഭ്യർഥിക്കുന്നു.













