ഹൈദരാബാദ്: സോഷ്യൽ മീഡിയ അക്കൗണ്ടുകൾക്ക് നിയന്ത്രണം ഏർപ്പെടുത്തിയതിൽ പ്രതിഷേധിച്ച് ഹൈദരാബാദിലെ മെറ്റ ഓഫീസിൽ കോൺഗ്രസ് പ്രവർത്തകരുടെ അക്രമം. വെള്ളിയാഴ്ച ഗച്ചിബൗളിയിലെ ഓഫീസിൽ എത്തിയ യൂത്ത് കോൺഗ്രസ് പ്രവർത്തകർ പൂച്ചട്ടികൾ തകർക്കുകയും ഓഫീസ് പരിസരത്ത് നാശനഷ്ടങ്ങൾ വരുത്തുകയും ചെയ്തു. സംഭവത്തിന്റെ ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചു.
യൂത്ത് കോൺഗ്രസ് സംസ്ഥാന അധ്യക്ഷൻ ജക്കിടി ശിവചരൺ റെഡ്ഡിയുടെ നേതൃത്വത്തിലായിരുന്നു ആക്രമണം. മെറ്റയ്ക്കും കേന്ദ്രത്തിലെ ബിജെപി സർക്കാരിനുമെതിരെ മുദ്രാവാക്യങ്ങളുയർത്തിയ പ്രവർത്തകർ നിയന്ത്രണം ഏർപ്പെടുത്തിയ അക്കൗണ്ടുകളും പോസ്റ്റുകളും പുനഃസ്ഥാപിക്കണമെന്ന് ആവശ്യപ്പെട്ടു. രാഷ്ട്രീയ ഇടപെടലാണ് നിയന്ത്രണങ്ങൾക്ക് പിന്നിലെന്നും അവർ ആരോപിച്ചു.
മുംബൈയിലും മെറ്റയുടെ ഓഫീസിന് മുന്നിൽ യൂത്ത് കോൺഗ്രസ് പ്രതിഷേധം സംഘടിപ്പിച്ചു. ബികെസിയിലെ വേൾഡ് വൺ ഓഫീസിന് മുന്നിൽ മുംബൈ യൂത്ത് കോൺഗ്രസ് അധ്യക്ഷ സീനത്ത് ഷബ്രിന്റെ നേതൃത്വത്തിലായിരുന്നു പ്രതിഷേധം. കേന്ദ്രമന്ത്രി അശ്വിനി വൈഷ്ണവിന്റെ പോസ്റ്റർ കത്തിച്ച പ്രതിഷേധക്കാർ, ബിജെപിയെ വിമർശിക്കുന്ന ശബ്ദങ്ങളെ അടിച്ചമർത്താനാണ് അക്കൗണ്ടുകൾ നിയന്ത്രിച്ചതെന്ന് ആരോപിച്ചു.
സമാജ്വാദി പാർട്ടി നേതാവ് അഖിലേഷ് യാദവും മെറ്റയുടെ നടപടിയെ വിമർശിച്ചു. വിദേശ കമ്പനികൾ ഇന്ത്യയിൽ ബിസിനസ് നടത്തുകയാണ് വേണ്ടതെന്നും രാഷ്ട്രീയത്തിൽ ഇടപെടരുതെന്നും അദ്ദേഹം പ്രതികരിച്ചു. അതേസമയം, ഓഫീസ് ആക്രമണത്തെ ബിജെപി ശക്തമായി അപലപിച്ചു. കോൺഗ്രസ് ഗുണ്ടകളുടെ പാർട്ടിയാണെന്ന് ബിജെപി വക്താവ് പ്രദീപ് ഭണ്ഡാരി ആരോപിച്ചു. ബിആർഎസ് നേതാവ് കെ.ടി. രാമറാവുവും അക്രമത്തെ വിമർശിച്ചു. ഹൈദരാബാദിന്റെ വ്യവസായ സൗഹൃദ പ്രതിച്ഛായയ്ക്ക് സംഭവം തിരിച്ചടിയാണെന്നും അദ്ദേഹം പറഞ്ഞു.


















