പമ്പ: ശബരിമല തീർത്ഥാടകരുമായി എത്തിയ സ്വകാര്യ ട്രാവലർ ഡ്രൈവർക്ക് നേരെ നിലയ്ക്കലിൽ പോലീസ് അതിക്രമം. പറവൂർ സ്വദേശി പ്രശാന്തിനാണ് മർദ്ദനമേറ്റത്. സംഭവത്തിൽ എ.എസ്.ഐ ജിജോയെ അന്വേഷണവിധേയമായി സസ്പെൻഡ് ചെയ്യാൻ എ.ഡി.ജി.പി പി. വിജയൻ നിർദ്ദേശം നൽകി.
നിലയ്ക്കൽ പാർക്കിങ് ഗ്രൗണ്ടിൽ തീർത്ഥാടകരെ ഇറക്കുന്നതിനിടെ വാഹനം പാർക്ക് ചെയ്യുന്നതിനെച്ചൊല്ലിയുണ്ടായ തർക്കമാണ് മർദ്ദനത്തിൽ കലാശിച്ചത്. തർക്കത്തിനിടെ പ്രകോപിതനായ ഉദ്യോഗസ്ഥൻ വാഹനത്തിന്റെ താക്കോൽ ഊരിയെടുക്കുകയായിരുന്നു. അസഭ്യം പറയുകയും പലതവണ കൈയേറ്റം ചെയ്യുകയും ചെയ്തതായും പരാതിയുണ്ട്.
താക്കോൽ ഊരിയെടുത്തത് ഡ്രൈവർ മൊബൈൽ ഫോണിൽ പകർത്താൻ ശ്രമിച്ചതോടെ ഉദ്യോഗസ്ഥൻ മുഖത്തടിക്കുകയും പിടിച്ചുതള്ളുകയുമായിരുന്നു. പോലീസ് ഉദ്യോഗസ്ഥൻ ഭീഷണിപ്പെടുത്തുന്നതിന്റെയും കൈയേറ്റം ചെയ്യുന്നതിന്റെയും ദൃശ്യങ്ങൾ പുറത്തുവന്നിട്ടുണ്ട്. ബഹളം കേട്ട് മറ്റ് തീർത്ഥാടകരും പോലീസുകാരും ഓടിയെത്തിയതോടെയാണ് രംഗം ശാന്തമായത്.
മർദ്ദനമേറ്റ പ്രശാന്ത് ഉന്നത പോലീസ് ഉദ്യോഗസ്ഥർക്ക് പരാതി നൽകിയിരുന്നു. കൈയേറ്റ ദൃശ്യങ്ങൾ മാധ്യമങ്ങളിലൂടെ പുറത്തുവന്നതോടെ സംഭവം വിവാദമായി. തുടർന്ന് നിലയ്ക്കൽ സ്പെഷ്യൽ ഓഫീസർ പ്രാഥമിക അന്വേഷണം പ്രഖ്യാപിക്കുകയും, ഇതിന് പിന്നാലെ ഉദ്യോഗസ്ഥനെ സസ്പെൻഡ് ചെയ്യാൻ എ.ഡി.ജി.പി ഉത്തരവിടുകയുമായിരുന്നു.


















