ന്യൂദല്‍ഹി: അറബിക്കടലില്‍ പാകിസ്ഥാന്‍ ആദ്യത്തെ ചൈനീസ് നിര്‍മ്മിത മുങ്ങിക്കപ്പലായ ഹംഗോര്‍ വിന്യസിച്ചിരിക്കുകയാണ്. ഇന്ത്യയുടെ നാവിക നീക്കങ്ങള്‍ നിരീക്ഷിച്ച് രഹസ്യവിവരങ്ങള്‍ ശേഖരിക്കുന്ന ഈ മുങ്ങിക്കപ്പല്‍ ഇന്ത്യയ്ക്ക് ഭീഷണിയാണെന്ന് റിട്ട. വൈസ് അഡ്മിറല്‍ സഞ്ജയ് മഹീന്ദ്രു ഈയിടെ എന്‍ഡിടിവിയ്‌ക്ക് നല്‍കിയ ഒരു അഭിമുഖത്തില്‍ പറഞ്ഞിരുന്നു.
കാരണം ചൈനയുടെ ഈ മുങ്ങിക്കപ്പലിന് ദീര്‍ഘകാലം വെള്ളത്തിനടയില്‍ മുങ്ങിക്കിടക്കാനുള്ള കഴിവുണ്ട്. വെള്ളത്തില്‍ നിന്നും മുകളിലേക്ക് വന്ന് അന്തരീക്ഷത്തില്‍ നിന്നും ഓക്സിജന്‍ വലിച്ചെടുക്കേണ്ട ആവശ്യമില്ല. അല്ലാതെ തന്നെ ഇതിന് കുതിക്കാനുള്ള വൈദ്യുതോര്‍ജ്ജം ബാറ്ററിയില്‍ നിന്നും ലഭിക്കും. 21 ദിവസം വരെ തുടര്‍ച്ചയായി വെള്ളത്തിനടിയില്‍ മുങ്ങിക്കിടക്കാന്‍ ഈ മുങ്ങിക്കപ്പലിന് സാധിക്കും.
പക്ഷെ ഇതിന്റെ ദീര്‍ഘകാലം ഒളിഞ്ഞിരിക്കാനുള്ള കഴിവിനെ ഇന്ത്യ മറികടക്കുന്ന പസൈഡന്‍ പി-8ഐ എന്ന എയര്‍ക്രാഫ്റ്റാണ്. ഇതിന് വെള്ളത്തനടിയിലെ മുങ്ങിക്കപ്പലിന്റെ നീക്കങ്ങള്‍ പിടിച്ചെടുക്കാനുള്ള കഴിവുണ്ട്. നിരന്തരം അറബിക്കടലിന് മുകളില്‍ നിരീക്ഷണപ്പറക്കല്‍ നടത്തുന്ന പസൈഡന്‍ പി-8ഐ കൃത്യമായി പാകിസ്ഥാന്റെ ചൈനയില്‍ നിര്‍മ്മിച്ച ഹംഗോര്‍ മുങ്ങിക്കപ്പലിന്റെ ചലനങ്ങള്‍ ഒപ്പിയെടുക്കുന്നുണ്ട്. അക്കൗസ്റ്റിക് ചലനങ്ങള്‍ നോക്കിയാണ് മുങ്ങിക്കപ്പലിന്റെ സ്ഥാനം കണ്ടുപിടിക്കുന്നത്.
ഇതുകൂടാതെ ഇന്ത്യയുടെ കമോര്‍ത്ത ക്ലാസില്‍പ്പെട്ട കോര്‍വെറ്റുകളും നിരീക്ഷണം ശക്തമാക്കിയിട്ടുണ്ട്. മുങ്ങിക്കപ്പലുകളെ പ്രത്യേകം നിരീക്ഷിക്കാനുള്ള സാങ്കേതികവിദ്യയുള്ളതാണ് കമോര്‍ത്ത കോര്‍വെറ്റുകള്‍. ഡീസല്‍-ഇലക്ട്രികില്‍ കുതിക്കുന്ന ഹംഗോര്‍ മുങ്ങിക്കപ്പലിന്റെ സ്ഥാനം നിര്‍ണ്ണയിക്കാന്‍ ഈ കോര്‍വെറ്റുകള്‍ക്ക് സാധിക്കും.
എംക്യ 9ബി സീഗാര്‍ഡിയന്‍ ഡ്രോണുകളും കടലില്‍ രഹസ്യനിരീക്ഷണം ശക്തമാക്കിയിട്ടുണ്ട്. അറബിക്കടലിലെയും ഇന്ത്യന്‍ മഹാസമുദ്രത്തിലെയും രഹസ്യവിവരങ്ങള്‍ ശേഖരിക്കാനും നിരീക്ഷിക്കാനും ആകാശത്ത് ഏറെ ഉയരത്തില്‍ പറക്കാന്‍ കഴിവുള്ള അമേരിക്കയില്‍ നിന്നും വാങ്ങിയ ഈ എംക്യ 9ബി സീഗാര്‍ഡിയന്‍ ഡ്രോണുകള്‍ക്ക് സാധിക്കും.
ചൈനയില്‍ നിന്നും എട്ട് ഹംഗോര്‍ ശ്രേണിയില്‍പ്പെട്ട മുങ്ങിക്കപ്പലുകള്‍ക്കാണ് പാകിസ്ഥാന്‍ ഓര്‍ഡര്‍ നല്‍കിയിരിക്കുന്നത്. ഇതില്‍ ആദ്യത്തേതാണ് ഇപ്പോള്‍ എത്തിയിരിക്കുന്നത്. ഇനി ഏഴ് മുങ്ങിക്കപ്പലുകള്‍ കൂടി എത്തും. ഇതിനെ ലാക്കാക്കി ഇന്ത്യന്‍ നാവിക സേന മുന്‍കരുതല്‍ നടപടികള്‍ എടുത്തുവരികയാണ്.
