ന്യൂദല്‍ഹി: ഡോളറ് ഉപയോഗിച്ചുള്ള വ്യാപാരങ്ങള്‍ക്ക് ബദലയായി പ്രദേശിക കറന്‍സിയിലൂടെ വ്യാപാരം ശക്തമാക്കാനുള്ള ചടുലനീക്കവുമായി ബ്രിക്സ് ഉച്ചകോടി. ഇതിനായി ക്രോസ്-ബോര്‍ഡര്‍ പേയ്‌മെന്റ് സംവിധാനങ്ങള്‍ക്കായുള്ള പ്രായോഗിക പരിഹാരങ്ങള്‍ പര്യവേക്ഷണം ചെയ്യുന്നതിനുള്ള ബ്രിക്സ് പേയ്‌മെന്റ് ടാസ്‌ക് ഫോഴ്‌സ് (ബിപിടിഎഫ്) രൂപീകരിക്കാന്‍ ഉച്ചകോടിയില്‍ അംഗീകാരം. ഇതോടെ ഡോളറിലുള്ള വ്യാപാരത്തിന് പകരം ബ്രിക്സ് രാജ്യങ്ങളുടെ കറന്‍സിയില്‍ തന്നെ വ്യാപാരവും നിക്ഷേപവും നടത്തുകയാണ് ലക്ഷ്യം.
2024ലെ കസാന്‍, 2025ലെ റിയോ പ്രഖ്യാപനങ്ങളിലൂടെ മുന്നോട്ടുവച്ച അതിര്‍ത്തി കടന്നുള്ള പണമിടപാട് സംരംഭത്തിന്റെ തുടര്‍ച്ചയായാണ് പുതിയ നീക്കം. ഭാരതത്തിന്റെ യുപിഐ, ബ്രസീലിന്റെ പിക്‌സ്, ചൈനയുടെ സിഐപിഎസ് തുടങ്ങിയ ദേശീയ പേയ്‌മെന്റ് സംവിധാനങ്ങള്‍ പരസ്പരം ബന്ധിപ്പിക്കാനാണ് നീക്കം. റഷ്യയുടെ എസ്പിഎഫ്എസ് ഉള്‍പ്പെടെയുള്ള പണമിടപാട് സന്ദേശവിനിമയ സംവിധാനങ്ങളും ഇതിന്റെ ഭാഗമാക്കി പണമിടപാട് നടത്താനാണ് ലക്ഷ്യം.
ഇക്കാര്യത്തില്‍, പേയ്‌മെന്റ്, മെസേജിങ് ചാനലുകളുടെ അതിര്‍ത്തി കടന്നുള്ള പരസ്പര പ്രവര്‍ത്തനക്ഷമത പഠിക്കുന്നതിനും ദേശീയ മുന്‍ഗണനകളെ മാനിക്കുകയും എല്ലാത്തിനും അനുയോജ്യമായ സമീപനമില്ലെന്ന് അംഗീകരിച്ചുള്ള സംവിധാനമാണ് ഒരുങ്ങുന്നത്. ബ്രിക്സ് പ്രാദേശിക കറന്‍സികള്‍ ഉപയോഗിച്ച് വ്യാപാര സെറ്റില്‍മെന്റുകളും നിക്ഷേപങ്ങളും പ്രോത്സാഹിപ്പിക്കുന്നതിന് ഉച്ചകോടി അംഗീകാരം നല്‍കി. ബ്രിക്സ് രാജ്യങ്ങള്‍ക്കിടയില്‍ അതിര്‍ത്തി കടന്നുള്ള പേയ്‌മെന്റുകള്‍ക്കുള്ള പ്രായോഗിക പരിഹാരങ്ങള്‍ സുഗമമാക്കുക, നിലവിലുള്ള പ്രവര്‍ത്തനങ്ങളെ അടിസ്ഥാനമാക്കി ചര്‍ച്ചകള്‍ തുടരാനും ബിപിടിഎഫിനെ ചുമതലപ്പെടുത്തിയിട്ടുണ്ട്.
ഒരു രാജ്യത്തെ ഉപഭോക്താവിനോ വ്യാപാരിക്കോ മറ്റൊരു ബ്രിക്സ് രാജ്യത്തെ പണമിടപാട് സംവിധാനവുമായി നേരിട്ട് ഇടപെടാന്‍ കഴിയുന്ന തരത്തില്‍ സംവിധാനങ്ങള്‍ പരസ്പരം പ്രവര്‍ത്തിപ്പിക്കാനുള്ള സാധ്യതയാണ് പരിശോധിക്കുന്നത്. അതിര്‍ത്തി കടന്നുള്ള ഇടപാടുകള്‍ കൂടുതല്‍ വേഗത്തിലും കുറഞ്ഞ ചെലവിലും സുരക്ഷിതമായും നടത്താനുള്ള പ്രായോഗിക മാര്‍ഗങ്ങള്‍ കണ്ടെത്താനാണ് ബി.പി.ടി.എഫിനോട് നിര്‍ദേശിച്ചിരിക്കുന്നത്. പ്രാദേശിക കറന്‍സിയിലൂടെയുള്ള വിനിമയം ചെലവ് കുറയ്‌ക്കുകയും കാര്യക്ഷമവും സുതാര്യവും, സുരക്ഷിതവുമാണെന്നും ഉച്ചകോടി വിലയിരുത്തി. പ്രാദേശിക കറന്‍സിയില്‍ വ്യാപാര വിനിമയം വേണമെന്ന് കഴിഞ്ഞ ദിവസം ഇറാന്‍ ആവശ്യപ്പെട്ടിരുന്നു.
