തിരുവനന്തപുരം: പോത്തന്കോട് പൊലീസ് സ്റ്റേഷനില് അതിക്രമം നടത്തിയ പ്രായപൂര്ത്തിയാകാത്ത പെണ്കുട്ടിയുടെ ദൃശ്യങ്ങള് സാമൂഹ്യമാധ്യമത്തില് പ്രചരിപ്പിച്ചവര്ക്കെതിരെ കേസെടുക്കുമെന്ന് പൊലീസ്. വീഡിയോ വ്യാപകമായി പ്രചരിച്ചതോടെയാണ് നടപടി.
ബുധനാഴ്ച രാത്രി 11ഓടെയായിരുന്നു പോത്തന്കോട് പൊലീസ് സ്റ്റേഷനില് സംഭവം ഉണ്ടായത്.പോത്തന്കോട് മൊണാക്ക് ബാറില് മദ്യപിച്ച് ബഹളം വച്ച കൊയ്ത്തൂര്ക്കോണം കുന്നുവിള സ്വദേശി മുരുകനെ (28),വിട്ടയയ്ക്കണമെന്നാവശ്യപ്പെട്ടാണ് 16കാരി സ്റ്റേഷനിലെത്തിയത്.
പെണ്കുട്ടിയുടെ ആണ്സുഹൃത്താണ് മുരുകന്. റൗഡി ലിസ്റ്റില് ഉള്പ്പെട്ട പ്രതിയെ ഉടന് വിട്ടയയ്ക്കാനാകില്ലെന്ന പൊലീസ് അറിയിച്ചതോടെ പെണ്കുട്ടി അക്രമാസക്തയായി.
തുടര്ന്ന് പൊലീസിന് നേരെ അസഭ്യവര്ഷം നടത്തുകയും കല്ലെറിയുകയും ചെയ്തു പെണ്കുട്ടി. പൊലീസുകാരെ കൈയേറ്റം ചെയ്യാനും ശ്രമിച്ചു. പെണ്കുട്ടിയെ ബന്ധുക്കളുടെ സാന്നിദ്ധ്യത്തില് പേരൂര്ക്കട മാനസിക ആരോഗ്യകേന്ദ്രത്തിലെ ലഹരി മുക്ത കേന്ദ്രത്തിലേക്ക് മാറ്റി.
