ന്യൂദല്‍ഹി: കാന്തപുരം എപി അബൂബക്കര്‍ മുസ്ലിയാരുടെ സ്ത്രീകള്‍ക്കെതിരായ നിലപാടിനോട് യോജിപ്പില്ലെന്ന് ഇന്ത്യയില്‍ എത്തിയ മലേഷ്യന്‍ പ്രധാനമന്ത്രി അന്‍വര്‍ ഇബ്രാഹിം. മലേഷ്യയില്‍ സ്ത്രീകള്‍ക്ക് തുല്യ അവകാശങ്ങള്‍ ഉറപ്പുനല്‍കുന്നുണ്ടെന്നും ഇക്കാര്യം താന്‍ കോഴിക്കോട് വെച്ച് കാന്തപുരത്തെ കാണുമ്പോള്‍ പറയുമെന്നും അന്‍വര്‍ ഇബ്രാഹിം പറഞ്ഞു.
ന്യൂദല്‍ഹിയില്‍ നടക്കുന്ന ബ്രിക്‌സ് ഉച്ചകോടിയില്‍ പങ്കെടുക്കാന്‍ എത്തിയ അന്‍വര്‍ ഇബ്രാഹിം ഒരു ടിവി ചാനലിന് നല്‍കിയ അഭിമുഖത്തിലാണ് ഇക്കാര്യം പറഞ്ഞത്. സ്ത്രീകള്‍ വീട്ടില്‍ അടച്ചിരിക്കണമെന്ന കാന്തപുരം അബൂബക്കര്‍ മുസ്ല്യാര്‍ ഈയിടെ നടത്തിയ വിവാദ പ്രസ്താവനയെക്കുറിച്ച് മാധ്യമപ്രവര്‍ത്തകര്‍ ദല്‍ഹിയില്‍ ചോദിച്ചിരുന്നു. കാന്തപുരവുമായി നാളെ (സെപ്തംബര്‍ 13 ഞായറാഴ്ച) അന്‍വര്‍ ഇബ്രാഹിം കോഴിക്കോട്ട് കൂടിക്കാഴ്ച നടത്തും.
“കാന്തപുരം മതഗ്രന്ഥമായ ഖുറാനെക്കുറിച്ചും പ്രവാചകനെക്കുറിച്ചും പഠിച്ചിട്ടുള്ള മതപണ്ഡിതനാണ്. പക്ഷെ അദ്ദേഹത്തിന്റെ എല്ലാ കാഴ്ചപ്പാടുകളും നമ്മള്‍ സ്വീകരിക്കേണ്ടതില്ല. “- അന്‍വര്‍ ഇബ്രാഹിം പറഞ്ഞു.
“മലേഷ്യയില്‍ ഞങ്ങള്‍ സ്ത്രീകള്‍ക്ക് തുല്യ അവകാശങ്ങള്‍ നല്‍കുന്നുണ്ട്. ഞങ്ങളുടെ സര്‍വകലാശാലകളില്‍ കൂടുതല്‍ പെണ്‍കുട്ടികളാണ് പഠിക്കുന്നത്. എന്റെ ഭാര്യ ഒരു ഡോക്ടറാണ്. എന്റെ പെണ്‍മക്കള്‍ക്ക് പഠിക്കാനും സ്വാതന്ത്ര്യം നേടാനുമുള്ള എല്ലാ അവസരങ്ങളും നല്‍കിയിട്ടുണ്ട്”.- അദ്ദേഹം പറഞ്ഞു.
