ന്യൂദല്‍ഹി: ഭാരതത്തിന്റെ നയതന്ത്ര കരുത്തിന്റെ പ്രതീകമായി പതിനെട്ടാമത് ബ്രിക്‌സ് ഉച്ചകോടി ന്യൂദല്‍ഹിയിലെ ഭാരത് മണ്ഡപത്തില്‍ ഇന്ന് തുടങ്ങും. ലോകത്തിന്റെ 49.5 ശതമാനം ജനസംഖ്യയും 40 ശതമാനം ജിഡിപിയും 26 ശതമാനം വ്യാപാരവും കൈകാര്യം ചെയ്യുന്ന രാജ്യങ്ങളുടെ കൂട്ടായ്‌മയിലേക്ക് 10 രാജ്യങ്ങളെക്കൂടി പങ്കാളികളാക്കിയ ബ്രിക്‌സ് ഉച്ചകോടിയിലെ ഭാരതത്തിന്റെ അദ്ധ്യക്ഷ പദവിയും നയതന്ത്ര നീക്കങ്ങളും ലോകം ഉറ്റുനോക്കുകയാണ്. ഉച്ചകോടിയില്‍ പങ്കെടുക്കാന്‍ റഷ്യന്‍ പ്രസിഡന്റ് വ്‌ളാഡിമിര്‍ പുടിന്, ചൈനീസ് പ്രസിഡന്റ് ഷി ജിന്‍പിങ്്, ദക്ഷിണാഫ്രിക്കന്‍ പ്രസിഡന്റ് സിറില്‍ റാമാഫോസ തുടങ്ങിയവര്‍ എത്തിത്തുടങ്ങിയതോടെ രാജ്യതലസ്ഥാനം അതീവ സുരക്ഷയിലാണ്.
ഉച്ചകോടിക്കിടെ പ്രധാനമന്ത്രി നരേന്ദ്ര മോദി 17 ഉഭയകക്ഷി കൂടിക്കാഴ്ചകള്‍ ഒരുക്കിയിട്ടുണ്ട്. ഇന്നലെ പുടിനുള്‍പ്പെടെ മൂന്ന് രാഷ്‌ട്രത്തലവന്മാരുമായി ചര്‍ച്ച നടത്തി. ചൈനീ
സ് പ്രസിഡന്റ് ഷി ജിന്‍പിങ്ങുമായി ഇന്ന് വൈകിട്ട് 5.45ന് കൂടിക്കാഴ്ച നടത്തും.
ഇന്ന് ആരംഭിക്കുന്ന ബ്രിക്‌സ് ഉച്ചകോടിയില്‍ റഷ്യന്‍ പ്രസിഡന്റ് വ്ളാദിമിര് പുടിന്, ചൈനീസ് പ്രസിഡന്റ് ഷി ജിന്‍പിങ്, ദക്ഷിണാഫ്രിക്കന്‍ പ്രസിഡന്റ് സിറില്‍ റാമാഫോസ, ഈജിപ്ഷ്യന്‍ പ്രസിഡന്റ് അബ്ദുല്‍ ഫത്താഹ് എല്‍-സിസി, ഇന്തോനേഷ്യന്‍ പ്രസിഡന്റ് പ്രഭവ് സുബിയാന്തോ, ഇറാന്‍ പ്രസിഡന്റ് മസൂദ് പെസെഷ്‌കിയാന്‍, അബുദാബി കിരീടാവകാശി ഷെയ്ഖ് ഖാലിദ് ബിന്‍ മുഹമ്മദ് ബിന്‍ സായിദ് അല്‍ നഹ്യാന്‍, എത്യോപ്യ പ്രധാനമന്ത്രി അബി അഹമ്മദ് അലി തുടങ്ങിയ ലോക നേതാക്കള്‍ പങ്കെടുക്കും.
ബ്രസീലിനെ വിദേശകാര്യ മന്ത്രി മൗറോ വിയേരയും സൗദി അറേബ്യയെ വിദേശകാര്യ മന്ത്രി പ്രിന്‍സ് ഫൈസല്‍ ബിന്‍ ഫര്‍ഹാന്‍ അല്‍ സൗദും പ്രതിനിധീകരിക്കും. മലേഷ്യന്‍ പ്രധാനമന്ത്രി അന്‍വര്‍ ഇബ്രാഹിം, വിയറ്റ്‌നാം പ്രധാനമന്ത്രി ലെ മിന്‍ ഹങ് എന്നിവരാണ് ഉച്ചകോടിയില്‍ പങ്കെടുക്കുന്ന മറ്റ് രാഷ്‌ട്രത്തലവന്മാര്‍. ഐക്യരാഷ്‌ട്രസഭ സെക്രട്ടറി ജനറല്‍ അന്റോണിയോ ഗുട്ടെറസ്, ലോകാരോഗ്യ സംഘടനയുടെ ഡയറക്ടര്‍ ജനറല്‍ ഡോ. ടെഡ്രോസ് അദാനം ഗെബ്രിയേസസ്, ന്യൂ ഡെവലപ്‌മെന്റ് ബാങ്ക് പ്രസിഡന്റ് ദില്‍മ റൂസെഫ് എന്നിവരും അന്താരാഷ്‌ട്ര സംഘടനകളെ പ്രതിനിധീകരിച്ച് എത്തിയിട്ടുണ്ട്.
ബ്രസീല്‍, ചൈന, ഈജിപ്ത്, ഏത്യോപ്യ, ഇന്തോനേഷ്യ, ഇറാന്‍, റഷ്യ, സൗദി അറേബ്യ, ദക്ഷിണാഫ്രിക്ക, യുഎഇ എന്നീ പതിനൊന്ന് രാജ്യങ്ങളാണ് അംഗങ്ങള്‍. ബെലാറസ്, ബൊളീവിയ, കസാഖിസ്ഥാന്‍, ക്യൂബ, മലേഷ്യ, നൈജീരിയ, തായ്ലന്‍ഡ്, ഉഗാണ്ട, ഉസ്‌ബെക്കിസ്ഥാന്‍, വിയറ്റ്‌നാം എന്നീ രാജ്യങ്ങള്‍ പങ്കാളികളും. പ്രതിരോധശേഷി, നവീകരണം, സഹകരണം, സുസ്ഥിരത എന്നിവ കെട്ടിപ്പടുക്കുക എന്നതാണ് ഈ വര്‍ഷത്തെ പ്രമേയം. 30,000ത്തോളം സുരക്ഷാ ഉദ്യോഗസ്ഥരെയാണ് ബ്രിക്‌സ് ഉച്ചകോടിയുടെ സുരക്ഷയ്‌ക്കായി വിന്യസിച്ചിട്ടുള്ളത്. ഇതില്‍ 15,000 പോലീസ് ഉദ്യോഗസ്ഥര്‍, 200 കമ്പനി പാരാമിലിട്ടറി സേനയും ഉണ്ട്.
രഹസ്യന്വേഷണ വിഭാഗം ഉള്‍പ്പെടെ വന്‍ സുരക്ഷാ കവചത്തിലാണ് ദല്‍ഹി. ഫേഷ്യല്‍ റെക്കഗ്നിഷന്‍, വാഹന നമ്പര്‍ പ്ലേറ്റ് പരിശോധനാ സംവിധാനങ്ങളുള്ള 500ലധികം സിസിടിവി ക്യാമറകള്‍ വഴി 24 മണിക്കൂറും നിരീക്ഷണം ആഴ്ചകള്‍ക്ക് മുമ്പ് തുടങ്ങി. വിമാനത്താവളം, ഹോട്ടലുകള്‍, ഭാരത് മണ്ഡപം എന്നിവയ്‌ക്ക് ചുറ്റും വന്‍ സുരക്ഷയിലാണ്. മഥുര റോഡ്, സര്‍ദാര്‍ പട്ടേല്‍ മാര്‍ഗ്, ശാന്തി പഥ്, ജന്‍പഥ്, അശോകാ റോഡ് ഉള്‍പ്പെടെ 35ലധികം പ്രധാന പാതകളില്‍ താത്കാലിക ഗതാഗത നിയന്ത്രണങ്ങള്‍ ഏര്‍പ്പെടുത്തിയിട്ടുണ്ട്.
ജന്മഭൂമി ഓണ്‍ലൈന്‍