കൊല്ലം: സംസ്ഥാനത്ത് ഭര്‍തൃപീഡന പരാതികള്‍ ആശങ്കപ്പെടുത്തുന്ന നിലയില്‍ തുടരുന്നു. കേരള പോലീസ് പുറത്തുവിട്ട കണക്കുപ്രകാരം 2026 ജനുവരി മുതല്‍ ജൂലൈ വരെ ഭര്‍ത്താവിന്റെയോ ബന്ധുക്കളുടെയോ പീഡനം സംബന്ധിച്ച് 1,958 കേസുകളാണ് സംസ്ഥാനത്ത് രജിസ്റ്റര്‍ ചെയ്തത്. ഏഴ് മാസത്തിനിടെ ശരാശരി 280 കേസുകള്‍ വീതം റിപ്പോര്‍ട്ട് ചെയ്യപ്പെട്ടു.
കഴിഞ്ഞ വര്‍ഷവും ഭര്‍തൃപീഡന പരാതികളുടെ എണ്ണം ഉയര്‍ന്ന നിലയിലായിരുന്നു. 2025ല്‍ 3,986 കേസുകളാണ് ഈ വിഭാഗത്തില്‍ രജിസ്റ്റര്‍ ചെയ്തത്. 2024ല്‍ 4,515 കേസുകളും 2023ല്‍ 4,710 കേസുകളും റിപ്പോര്‍ട്ട് ചെയ്തിരുന്നു. കണക്കുകള്‍ പരിശോധിക്കുമ്പോള്‍ ആയിരക്കണക്കിന് പരാതികളാണ് ഓരോ വര്‍ഷവും പോലീസിന് മുന്നിലെത്തുന്നത്.
ഭര്‍ത്താവില്‍ നിന്നും ഭര്‍ത്താവിന്റെ ബന്ധുക്കളില്‍ നിന്നുമുള്ള ശാരീരികവും മാനസികവുമായ പീഡനം, നിരന്തരമായ ഉപദ്രവം തുടങ്ങിയവയാണ് പരാതികളുടെ സ്വഭാവം. കുടുംബപ്രശ്‌നങ്ങള്‍ക്കൊപ്പം സ്ത്രീധനം, സാമ്പത്തിക സമ്മര്‍ദം, കുടുംബത്തിനുള്ളിലെ അധികാര തര്‍ക്കങ്ങള്‍ തുടങ്ങിയവയും പലപ്പോഴും പീഡനത്തിന് കാരണമാകുന്നു. പരാതികള്‍ പോലീസ് സ്റ്റേഷനുകളില്‍ നേരിട്ട് നല്‍കുന്നതിന് പുറമെ വനിതാ പോലീസ് സംവിധാനങ്ങളിലൂടെയും വിവിധ സഹായകേന്ദ്രങ്ങളിലൂടെയും അധികൃതരുടെ ശ്രദ്ധയിലെത്തുന്നുണ്ട്. പരാതികളില്‍ സമയബന്ധിതമായി ഇടപെടുകയും നിയമപരമായ സംരക്ഷണം ഉറപ്പാക്കുകയും ചെയ്യേണ്ടതിന്റെ ആവശ്യകതയും കണക്കുകള്‍ വ്യക്തമാക്കുന്നു.
ഭര്‍തൃപീഡനം സംബന്ധിച്ച പരാതികള്‍ തുടര്‍ച്ചയായി റിപ്പോര്‍ട്ട് ചെയ്യുന്ന സാഹചര്യത്തില്‍ സ്ത്രീകള്‍ക്ക് നിയമപരമായ അവകാശങ്ങളെക്കുറിച്ചുള്ള ബോധവത്കരണവും കുടുംബതലത്തിലുള്ള ഇടപെടലുകളും ശക്തമാക്കേണ്ടതുണ്ട്. ഗാര്‍ഹിക പീഡനം മറച്ചുവയ്‌ക്കാതെ പരാതിപ്പെടാന്‍ കഴിയുന്ന സാഹചര്യം സൃഷ്ടിക്കുന്നതും ഇത്തരം കേസുകള്‍ ആവര്‍ത്തിക്കാതിരിക്കാന്‍ കര്‍ശന നടപടി ഉറപ്പാക്കുന്നതും നിര്‍ണായകമാണ്.
ജന്മഭൂമി ഓണ്‍ലൈന്‍