ബൈസണ്‍വാലി: വര്‍ഷങ്ങളിലായി ബൈസണ്‍വാലിക്കാരുടെ ഉറക്കം കെടുത്തുന്ന ഭീമന്‍ ആഫ്രിക്കന്‍ ഒച്ചുകള്‍ക്കെതിരെ പ്രതിരോധ പ്രവര്‍ത്തനങ്ങള്‍ക്ക് നേരിട്ടിറങ്ങാന്‍ ഒരുങ്ങി ജനകീയ കൂട്ടായ്‌മ. വ്യക്തിഗതമായി നടത്തിയ പ്രതിരോധ പ്രവര്‍ത്തനങ്ങളെല്ലാം ഫലപ്രദമാകാതെ വന്ന സാഹചര്യത്തിലാണ് ഗ്രാമവാസികളെ അണിനിരത്തി പ്രതിരോധ സംവിധാനത്തിന് രൂപം നല്‍കാനുള്ള ആശയമുണര്‍ന്നത്.
കേരള കാര്‍ഷിക സര്‍വകലാശാലയുടെ വിജ്ഞാന വ്യാപന ഡയറക്ടറേറ്റിന്റെ ആഭിമുഖ്യത്തില്‍ ”കര്‍ഷകര്‍ക്കൊപ്പം കെ.എ.യു.” പരിപാടിയുടെ ഭാഗമായി ശാസ്ത്രജ്ഞന്‍ ഡോ. ഗവാസ് രാഗേഷിന്റെ നേതൃത്വത്തില്‍ നടത്തിയ ‘ഭീമന്‍ ആഫ്രിക്കന്‍ ഒച്ചിന്റെ നിയന്ത്രണം’ ബോധവത്കരണ ക്യാമ്പയിനില്‍ നടന്ന ചര്‍ച്ചകളാണ് പുതിയ ഇടപെടലിന് വഴിതെളിച്ചത്.
ആഫ്രിക്കന്‍ ഒച്ച് നിവാരണത്തിനായി ഇതുവരെ സ്വീകരിച്ച വിവിധ മാര്‍ഗങ്ങള്‍ പ്രതീക്ഷിച്ച ഫലം നല്‍കാത്ത സാഹചര്യത്തില്‍, കൃഷി ഓഫീസറുടെയും കര്‍ഷകരുടെയും ആവശ്യങ്ങള്‍ ഏകോപിപ്പിച്ച് ജനകീയ കൂട്ടായ്‌മ രൂപീകരിക്കണമെന്ന ആശയം ചര്‍ച്ചയില്‍ ഉയര്‍ന്നുവരികയായിരുന്നു. ഇതിന്റെ ഭാഗമായി പഞ്ചായത്ത് പ്രസിഡന്റ് ശാലുമോള്‍ സാബുവിന്റെ രക്ഷാധികാരിയായ കൂട്ടായ്‌മയില്‍, കൃഷി ഓഫീസര്‍ സ്മിത എസ്. കുമാര്‍ ഏകോപന ചുമതലയിലും, കേരള കാര്‍ഷിക സര്‍വകലാശാല ഏലം ഗവേഷണ കേന്ദ്രം മേധാവി ഡോ. നിമിഷ മാത്യൂസ് സാങ്കേതിക പിന്തുണയുമായും പ്രവര്‍ത്തിക്കുന്ന ജനകീയ കൂട്ടായ്‌മയുടെ കരട് നിര്‍ദേശത്തിന് രൂപം നല്‍കി.
ഇതോടൊപ്പം ഓരോ വാര്‍ഡിലും വാര്‍ഡ് മെമ്പറുടെയും തൊഴിലുറപ്പ് മേറ്റുമാരുടെയും നേതൃത്വത്തില്‍ പ്രത്യേക കര്‍മ്മസേനകള്‍ രൂപീകരിക്കുന്നതിനുള്ള നിര്‍ദേശവും ഉള്‍പ്പെടുത്തിയിട്ടുണ്ട്. പഞ്ചായത്ത് ഭരണസമിതിയുടെ പരിഗണനയ്‌ക്കായി സമര്‍പ്പിക്കുന്ന കരടിന് അംഗീകാരം ലഭിക്കുന്നതോടെ വാര്‍ഡ് തല കര്‍മ്മസേനകളെ ഉള്‍പ്പെടുത്തി പ്രവര്‍ത്തനങ്ങള്‍ ആരംഭിക്കും. പഞ്ചായത്ത് പദ്ധതിയില്‍ ഉള്‍പ്പെടുത്തി ലഭ്യമാകുന്ന ഫണ്ടും മറ്റ് അനുയോജ്യമായ ഫണ്ടുകളും പ്രയോജനപ്പെടുത്തി വാര്‍ഡ് തലത്തിലുള്ള കര്‍മ്മസേനകള്‍ മുഖേന ആഫ്രിക്കന്‍ ഒച്ച് നിവാരണ പ്രവര്‍ത്തനങ്ങള്‍ വ്യാപകമായി നടപ്പാക്കാനാണ് ലക്ഷ്യമിടുന്നത്.
കര്‍ഷകരുടെ വ്യക്തിഗത ശ്രമങ്ങളില്‍ മാത്രം ഒതുങ്ങാതെ, ജനപ്രതിനിധികള്‍, കൃഷി വകുപ്പ് ഉദ്യോഗസ്ഥര്‍, കുടുംബശ്രീ പ്രവര്‍ത്തകര്‍, തൊഴിലുറപ്പ് അംഗങ്ങള്‍, കര്‍ഷകര്‍ തുടങ്ങിയവരെല്ലാം ഒരുമിച്ച് അണിനിരന്നാണ് പ്രതിരോധ പ്രവര്‍ത്തനങ്ങള്‍ക്ക് തുടക്കം കുറിക്കാന്‍ ഉദ്ദേശിക്കുന്നത്. വര്‍ഷങ്ങളായി വിളകള്‍ തിന്നുതീര്‍ത്ത് ലക്ഷക്കണക്കി ന് രൂപയുടെ നഷ്ടമുണ്ടാക്കിയ ഭീമാകാരന്‍ ഒച്ചിനെ കൂട്ടായ പ്രവര്‍ത്തനത്തിലൂടെ നേരിടാമെന്ന ആത്മവിശ്വാസത്തിലാണ് ഇപ്പോള്‍ ബൈസണ്‍വാലിക്കാര്‍.
കൃഷിയിടങ്ങളില്‍ മാത്രമല്ല, ജനവാസ മേഖലകളിലേക്കും വ്യാപിച്ചുകൊണ്ടിരിക്കുന്ന ആഫ്രിക്കന്‍ ഒച്ച് ശല്യത്തിനെതിരെ ജനകീയ പങ്കാളിത്തത്തോടെ നടത്തുന്ന ഈ ഇടപെടല്‍ സമീപ പ്രദേശങ്ങള്‍ക്കും മാതൃകയാകുമെന്ന പ്രതീക്ഷയിലാണ് അധികൃതരും നാട്ടുകാരും. വാര്‍ഡ് മെമ്പര്‍ റോയിച്ചന്‍ ജോര്‍ജിന്റെ അധ്യക്ഷതയില്‍ നടന്ന ക്യാംപെയ്ന്‍, ബൈസണ്‍വാലി പഞ്ചായത്ത് പ്രസിഡണ്ട് ശാലുമോള്‍ സാബു ഉദ്ഘാടനം ചെയ്തു, കൃഷി അസിസ്റ്റന്റുമാരായ ഷിബു ഇ.കെ., ശ്രീദേവി പി.എസ്., ഏലം ഗവേഷണ കേന്ദ്രം അസിസ്റ്റന്റ് പ്രൊഫസ്സര്‍ ജയസൂര്യ കെ എന്നിവര്‍ പങ്കെടുത്തു. നിയന്ത്രണ ഉപാധികള്‍ അടങ്ങിയ മാനേജ്‌മെന്റ് കിറ്റിന്റെ വിതരണോദ്ഘാടനവും ലഘുലേഖ വിതരണവും നടന്നു.
