അഫ്ഗാനിസ്ഥാന് ക്രിക്കറ്റ് ബോര്ഡ് പുറത്തിറക്കിയ പ്രമോഷണല് വീഡിയോയിലെ ഭാരതത്തിന്റെ ഭൂപടം
കാബൂള്: ക്രിക്കറ്റ് പരമ്പര തുടങ്ങുംമുമ്പേ പാകിസ്ഥാനെ വെട്ടിലാക്കി അഫ്ഗാനിസ്ഥാന്. ഭാരതം-അഫ്ഗാനിസ്ഥാന് ടി20 പരമ്പരയ്ക്കു മുന്നോടിയായി അഫ്ഗാനിസ്ഥാന് ക്രിക്കറ്റ് ബോര്ഡ് (എസിബി) പുറത്തിറക്കിയ പ്രമോഷണല് വീഡിയോയില് പാക് അധിനിവേശ കശ്മീരും (പിഒകെ) ഗില്ഗിത്ബാള്ട്ടിസ്ഥാനും ഭാരത ഭൂപട ഭാഗമായി ചിത്രീകരിച്ചതാണ് പാകിസ്ഥാനെ പ്രകോപിപ്പിച്ചത്. പാകിസ്ഥാന് ക്രിക്കറ്റ് ബോര്ഡ് (പിസിബി) വിദേശകാര്യ ഓഫീസിനു മുന്നില് പരാതിയുന്നയിച്ചു.
സപ്തംബര് ആറിനാണ് എസിബി ഔദ്യോഗിക സോഷ്യല് മീഡിയ അക്കൗണ്ടിലൂടെ ടി20 പരമ്പര പ്രമോ പുറത്തുവിട്ടത്. ഭാരതവും അഫ്ഗാനിസ്ഥാനും തമ്മിലെ ചരിത്രപരവും സാംസ്കാരികവുമായ ബന്ധവും ക്രിക്കറ്റിനോടുള്ള പൊതുവായ ആവേശവും വീഡിയോയില് ഉയര്ത്തിക്കാട്ടുന്നു. പ്രമോയിലെ ഭാരത ഭൂപടത്തില് പിഒകെയും ഗില്ഗിത്ബാള്ട്ടിസ്ഥാനും ഉള്പ്പെടുത്തിയതോടെ പാകിസ്ഥാനില് പ്രതിഷേധമുയര്ന്നു.
വിഷയം ക്രിക്കറ്റ് മൈതാനത്തിനു പുറത്തേക്കും നീളുകയാണ്. ഔദ്യോഗികമായി എസിബി ഇതുവരെ മാപ്പു സംബന്ധിച്ചു വിശദീകരിച്ചിട്ടില്ല.
അഫ്ഗാനിസ്ഥാനും പാകിസ്ഥാനും തമ്മിലെ ബന്ധം ഇതിനകം തന്നെ സംഘര്ഷഭരിതമാണ്. അതിര്ത്തി സുരക്ഷാ വിഷയങ്ങളില് ഇരുരാജ്യങ്ങളും തമ്മില് രൂക്ഷമായ തര്ക്കങ്ങള് തുടരുന്നതിനിടെയാണ് ക്രിക്കറ്റ് പരമ്പര പ്രമോയില് പ്രത്യക്ഷപ്പെട്ട ഭൂപടം പുതിയ വിവാദത്തിനു വഴിവച്ചിരിക്കുന്നത്. തെഹ്രീക്-ഇ-താലിബാന് പാകിസ്ഥാനുമായി (ടിടിപി) ബന്ധപ്പെട്ട വിഷയങ്ങളിലും പാകിസ്ഥാന് അഫ്ഗാനിസ്ഥാനെതിരേ ആരോപണങ്ങളുന്നയിച്ചു വരുന്നു.
ഇതിനിടെ ഭാരതം-അഫ്ഗാനിസ്ഥാന് മൂന്നു മത്സര ടി20 പരമ്പര സപ്തംബര് 13ന് ദല്ഹിയില് ആരംഭിക്കും. സപ്തംബര് 15നും 17നുമാണ് ശേഷിക്കുന്ന മത്സരങ്ങള്. പരമ്പരയുടെ ആതിഥേയ അവകാശം അഫ്ഗാനിസ്ഥാന് ക്രിക്കറ്റ് ബോര്ഡിനാണെങ്കിലും മത്സരങ്ങളെല്ലാം ദല്ഹിയിലെ അരുണ് ജെയ്റ്റ്ലി സ്റ്റേഡിയത്തിലാണ്.
ക്രിക്കറ്റ് പരമ്പരയ്ക്ക് ദിവസങ്ങള് മാത്രം ശേഷിക്കേ അഫ്ഗാന് ക്രിക്കറ്റ് ബോര്ഡ് പ്രമോ പാകിസ്ഥാന് പുതിയ തലവേദനയായി. മൈതാനത്ത് ഭാരതം-അഫ്ഗാനിസ്ഥാന് പോരാട്ടം തുടങ്ങുംമുമ്പേ ഭൂപടത്തില്ത്തന്നെ പാകിസ്ഥാനെതിരേ മത്സരം തുടങ്ങി.
