ഇസ്ലാമബാദ്: പാകിസ്ഥാനില്‍ പുതിയ പ്രവിശ്യകള്‍ രൂപീകരിക്കുന്നതുമായി ബന്ധപ്പെട്ട ചര്‍ച്ചകള്‍ക്കിടെ സിന്ധ് പ്രവിശ്യ വിഭജിക്കാനുള്ള ഏത് നീക്കത്തെയും ശക്തമായി എതിര്‍ക്കുമെന്ന് പാകിസ്ഥാന്‍ പീപ്പിള്‍സ് പാര്‍ട്ടി (പിപിപി). സിന്ധിന്റെ ഭരണഘടനാപരമായ പദവിയിലും പ്രവിശ്യാ സ്വയംഭരണത്തിലും പാക് ഭരണകൂടം ഇടപെടരുതെന്ന് പിപിപി മുന്നറിയിപ്പ് നല്‍കി.
സിന്ധ് വിഭജിക്കുന്നതുമായി ബന്ധപ്പെട്ട് ഉയരുന്ന ആവശ്യങ്ങള്‍ക്കെതിരെ പാക് പ്രസിഡന്റ് ആസിഫ് അലി സര്‍ദാരിയും പിപിപി അധ്യക്ഷന്‍ ബിലാവല്‍ ഭൂട്ടോ സര്‍ദാരിയും നിലപാട് ആവര്‍ത്തിച്ചു. ലണ്ടനില്‍ ഇരുവരും നടത്തിയ അഞ്ച് മണിക്കൂര്‍ കൂടിക്കാഴ്ചയ്‌ക്ക് പിന്നാലെയാണ് സിന്ധിന്റെ അഖണ്ഡത സംരക്ഷിക്കാനുള്ള പാര്‍ട്ടി നിലപാട് വീണ്ടും വ്യക്തമാക്കിയത്.
സപ്തംബര്‍ മൂന്നിന് സിന്ധ് നിയമസഭ ഏകകണ്ഠമായി പ്രവിശ്യ വിഭജിക്കുന്നതിനും അതിര്‍ത്തിയില്‍ മാറ്റം വരുത്തുന്നതിനുമെതിരെ പ്രമേയം പാസാക്കിയിരുന്നു. സിന്ധുമായി ബന്ധപ്പെട്ട ഏതൊരു ഭൂപ്രദേശിക മാറ്റത്തിനും നിയമസഭയുടെ അനുമതി നല്‍കില്ലെന്നും പ്രമേയം വ്യക്തമാക്കുന്നു.
പുതിയ പ്രവിശ്യകളും ഭരണപരമായ യൂണിറ്റുകളും രൂപീകരിക്കണമെന്ന ആവശ്യങ്ങള്‍ ഉയരുന്നതിനിടെയാണ് സിന്ധിലെ രാഷ്‌ട്രീയ പോര് ശക്തമാകുന്നത്. കേന്ദ്രമന്ത്രിമാരുടെ പ്രസ്താവനകളെ പിപിപി വിമര്‍ശിച്ചു. പുതിയ പ്രവിശ്യകള്‍ രൂപീകരിക്കുന്നതുമായി ബന്ധപ്പെട്ട് ഭരണഘടനാ ഭേദഗതി കൊണ്ടുവരണമെങ്കില്‍ ആവശ്യമായ പാര്‍ലമെന്ററി ഭൂരിപക്ഷം വേണമെന്നും പിപിപി വ്യക്തമാക്കി.
പതിനെട്ടാം ഭരണഘടനാ ഭേദഗതി, പ്രവിശ്യാ സ്വയംഭരണം, സിന്ധിന്റെ ഭൂപ്രദേശിക അഖണ്ഡത എന്നിവയില്‍ വിട്ടുവീഴ്ചയുണ്ടാകില്ലെന്നാണ് പിപിപിയുടെ നിലപാട്. പാക് ഭരണകൂടം ഇത്തരം വിഷയങ്ങളില്‍ ഇടപെടുന്നത് ജനാധിപത്യ സംവിധാനത്തെയും പ്രവിശ്യകളുടെ അവകാശങ്ങളെയും ദുര്‍ബലപ്പെടുത്തുമെന്ന് പാര്‍ട്ടി നേതൃത്വം ആരോപിച്ചു.
സിന്ധ് വിഭജിക്കണമെന്ന ആവശ്യത്തെ അനുകൂലിക്കുന്നവരും ഇത് പുതിയ ഭരണപരമായ യൂണിറ്റുകള്‍ സൃഷ്ടിക്കുന്നതിനുള്ള നീക്കം മാത്രമാണെന്നും പ്രവിശ്യ വിഭജിക്കുന്നതല്ലെന്നും വാദിക്കുന്നു. എന്നാല്‍ പിപിപി ഇതിനെ സിന്ധിന്റെ ഭൂപ്രദേശിക അഖണ്ഡതയ്‌ക്കുള്ള വെല്ലുവിളിയായാണ് കാണുന്നത്.
