ബഡ്ഗാം: ബഡ്ഗാം ജില്ലയിലെ പീര്പഞ്ചല് വനമേഖലയില് സൈന്യവും സിആര്പിഎഫും സംയുക്തമായി നടത്തിയ ഓപ്പറേഷന് അഷ്ദറില് കൊല്ലപ്പെട്ട ഭീകരന് യാസിര് ആണെന്ന് തിരിച്ചറിഞ്ഞു. ലഷ്കര്-ഇ-തൊയ്ബയ്ക്കുവേണ്ടി പ്രവര്ത്തിക്കുന്ന പാക് ഭീകരനാണ് ഇയാള്. സൈന്യത്തിന്റെ ചിനാര് കോര്, ജമ്മുകശ്മീര് പോലീസ്, സിആര്പിഎഫ് എന്നിവ സംയുക്തമായി നടത്തുന്ന ഭീകരവിരുദ്ധ ഓപ്പറേഷന് അഷ്ദറിലാണ് ഇയാളെ വധിച്ചത്.
പൂഞ്ചില് വ്യോമസേനയുടെ വാഹനവ്യൂഹത്തിന് നേരെ പതിയിരുന്ന് ആക്രമണം നടത്തിയതിലും 2024ല് സൈന്യത്തിന് നേരെയുണ്ടായ ആക്രമണത്തിലും ഇയാള്ക്ക് പങ്കുണ്ടെന്നാണ് റിപ്പോര്ട്ട്. ഇയാളുടെ പ്രാദേശിക ബന്ധങ്ങളും പ്രവര്ത്തനങ്ങളും കണ്ടെത്താന് അന്വേഷണം നടക്കുന്നുണ്ട്. ‘നിങ്ങള്ക്ക് ഓടാം, പക്ഷേ ഒളിച്ചിരിക്കാന് കഴിയില്ലെന്ന്’. ഭീകരനെ വധിച്ച വാര്ത്ത സ്ഥിരീകരിച്ചുകൊണ്ട് സുരക്ഷാ സേന എക്സിലെ പോസ്റ്റിലൂടെ ദേശവിരുദ്ധര്ക്ക് മുന്നറിയിപ്പ് നല്കി.
