ന്യൂദല്ഹി: വിദ്യാര്ത്ഥികളിലെ ലഹരിമരുന്ന് ആസക്തിയിലും അമിത സ്മാര്ട്ട്ഫോണ് ഉപയോഗത്തിലും അദ്ധ്യാപകര് അതീവ ജാഗ്രത പുലര്ത്തണമെന്ന് പ്രധാനമന്ത്രി നരേന്ദ്ര മോദി. കുട്ടികളുടെ സ്വഭാവത്തിലുള്ള മാറ്റങ്ങള് ശ്രദ്ധിക്കുകയും കാരണം കണ്ടെത്തി അവരെ ആ ശീലത്തില് നിന്ന് മറികടക്കാന് സഹായിക്കുകയും വേണം. കളികള്, കായിക വിനോദങ്ങള്, സര്ഗാത്മക പ്രവര്ത്തനങ്ങങ്ങള് എന്നിവയിലൂടെ കുട്ടികളിലെ ഇത്തരം ആസക്തികള്ക്ക് പരിഹാരം കാണണമെന്നും പ്രധാനമന്ത്രി പറഞ്ഞു. ദേശീയ അദ്ധ്യാപകദിനത്തില് ദേശീയ അദ്ധ്യാപക പുരസ്കാര ജേതാക്കളും വിദ്യാഭ്യാസ പ്രവര്ത്തകരുമായി ലോക് കല്യാണ് മാര്ഗിലെ വസതിയില് സംസാരിക്കുകയായിരുന്നു പ്രധാനമന്ത്രി.
അക്കാദമിക് പ്രകടനത്തിനപ്പുറം കുട്ടികളുടെ പെരുമാറ്റത്തിലും ദൈനംദിന ജീവിതത്തിലും അദ്ധ്യാപകര് അതീവ ശ്രദ്ധ പുലര്ത്തണമെന്നും പ്രധാനമന്ത്രി പറഞ്ഞു. ബാല്യത്തിന്റെ നിഷ്കളങ്കത സംരക്ഷിക്കണം. കുട്ടികളിലെ ജിജ്ഞാസയെ പരിപോഷിപ്പിച്ച് ശരിയായ രീതിയില് നയിക്കണം. കുട്ടികളിലെ മൊബൈല്ഫോണ് ഉപയോഗം വലിയ ആശങ്കയായി മാറിയിട്ടുണ്ട്. കുട്ടികള് എത്ര സമയം സ്ക്രീനില് ചെലവഴിക്കുന്നുണ്ടെന്നും രാത്രി വൈകിയും മൊബൈല് ഫോണ് ഉപയോഗിക്കുന്നുണ്ടോയെന്നും അദ്ധ്യാപകര് രക്ഷിതാക്കളോട് അന്വേഷിക്കണം. കായിക വിനോദങ്ങളിലും കളികളിലും സര്ഗാത്മക പ്രവര്ത്തനങ്ങളിലും താത്പര്യം വളര്ത്തിയെടുത്ത് അവരെ അതില് നിന്ന് മോചിപ്പിക്കണം.
കുട്ടികളെ ക്ലാസ് മുറികള്ക്ക് പുറത്തുള്ള യഥാര്ത്ഥ ലോകത്തെ നൈപുണ്യങ്ങളുമായും വിവിധ തൊഴില് രീതികളുമായി ബന്ധിപ്പിക്കുന്നത് കൂടിയാണ് ദേശീയ വിദ്യാഭ്യാസനയം. പാഠ്യപദ്ധതിക്കപ്പുറം തൊഴിലിന്റെ മാന്യത പോലുള്ള മൂല്യങ്ങള് കുട്ടികളില് വളര്ത്തിയെടുക്കാന് അധ്യാപകര് തയാറാകണമെന്നും പ്രധാനമന്ത്രി ആവശ്യപ്പെട്ടു. അദ്ധ്യാപന ജീവിതത്തിലെ അനുഭവങ്ങളും നവീന ആശയങ്ങളും ക്ലാസ് റൂം പഠനം കൂടുതല് ആകര്ഷകവും ഫലപ്രദവുമാക്കാന് സ്വീകരിച്ച വിവിധ സമീപനങ്ങളും അദ്ധ്യാപകര് പ്രധാനമന്ത്രിയോടും പങ്കുവച്ചു.
