ന്യൂദല്ഹി: അദ്ധ്യാപക ദിനാശംസകള് നേര്ന്ന് രാഷ്ട്രപതി ദ്രൗപദി മുര്മു. വിദ്യാര്ത്ഥികളെ നല്ല മനുഷ്യരായി വളര്ത്തിയെടുക്കാനുള്ള കടമ അദ്ധ്യാപകര്ക്കുണ്ടെന്ന് രാഷ്ട്രപതി ആശംസാ സന്ദേശത്തില് പറഞ്ഞു. മാര്ഗനിര്ദേശത്തിലൂടെയും ഉപദേശങ്ങളിലൂടെയും പ്രതിഭകളെ വളര്ത്തിയെടുക്കുന്നതിലും സ്വഭാവശുദ്ധി രൂപപ്പെടുത്തുന്നതിലും അദ്ധ്യാപകര് നിര്ണായക പങ്ക് വഹിക്കുന്നുണ്ട്. കുട്ടികളുടെ സവിശേഷ കഴിവുകള് തിരിച്ചറിയാനും മികവിലേക്ക് മുന്നേറാന് അവരെ പ്രോത്സാഹിപ്പിക്കാനും അര്പ്പണബോധവും കരുതലുമുള്ള ഒരദ്ധ്യാപകന് സാധിക്കും. രാജ്യത്തെ കൂടുതല് ഉയരങ്ങളിലേക്ക് നയിക്കാന് പ്രാപ്തിയുള്ള ഒരു പ്രബുദ്ധ തലമുറയെ വാര്ത്തെടുക്കാന് അദ്ധ്യാപകര്ക്ക് സാധിക്കട്ടെ എന്നും രാഷ്ട്രപതി ആശംസിച്ചു.
അദ്ധ്യാപകര് തങ്ങളുടെ അറിവ് നിരന്തരമായി പുതുക്കിയും സാങ്കേതികവിദ്യ പ്രയോജനപ്പെടുത്തിയും നൂതനമായ അദ്ധ്യാപന രീതികള് സ്വീകരിക്കണം. വിദ്യാര്ത്ഥികളില് സ്വതന്ത്ര ചിന്ത വളര്ത്താനും അന്വേഷണാത്മകത പ്രോത്സാഹിപ്പിക്കാനും അദ്ധ്യാപകര് ശ്രദ്ധിക്കണം. സമൂഹത്തിന് നല്കുന്ന വിലപ്പെട്ട സംഭാവനകള്ക്ക് വേണ്ടി പ്രയത്നിക്കുന്ന എല്ലാ അദ്ധ്യാപകര്ക്കും നന്ദി രേഖപ്പെടുത്തുന്നുവെന്നും രാഷ്ട്രപതി ആശംസാ സന്ദേശത്തില് പറഞ്ഞു. പ്രഗത്ഭനായ എഴുത്തുകാരനും തത്വചിന്തകനുമായിരുന്ന മുന് രാഷ്ട്രപതി ഡോ. സര്വേപ്പള്ളി രാധാകൃഷ്ണന് പ്രഗത്ഭനായ അദ്ധ്യാപകന് കൂടിയായിരുന്നുവെന്ന് അനുസ്മരിച്ചുകൊണ്ട് രാഷ്ട്രപതി ആദരാഞ്ജലികളും അര്പ്പിച്ചു.
