ലുധിയാന: ദേശീയ യൂത്ത് അത്ലറ്റിക്സ് ചാമ്പ്യന്ഷിപ്പില് ഒരൊറ്റ ദിവസം രണ്ട് തവണ ദേശീയ റിക്കാര്ഡ് തിരുത്തിക്കുറിച്ചുകൊണ്ട് തമിഴ്നാടിന്റെ 17കാരന് സ്പ്രിന്റര് നീല് സംരാജ് ശ്രദ്ധേയ നേട്ടം സ്വന്തമാക്കി.
അണ്ടര്18 ആണ്കുട്ടികളുടെ 100 മീറ്റര് ഫൈനലില് 10.46 സെക്കന്ഡില് ഫിനിഷ് ചെയ്താണ് നീല് സ്വര്ണം നേടിയത്. പഞ്ചാബിലെ ലുധിയാനയില് നടന്ന മത്സരത്തിന്റെ സെമിഫൈനലില് 10.53 സെക്കന്ഡില് ഫിനിഷ് ചെയ്ത് നീല് പുതിയ അണ്ടര്18 ദേശീയ റിക്കാര്ഡ് കുറിച്ചിരുന്നു. തുടര്ന്ന് നടന്ന ഫൈനലില് ആ സമയം വീണ്ടും മെച്ചപ്പെടുത്തിയാണ് (10.46 സെക്കന്ഡ്) താരം സുവര്ണ നേട്ടത്തിലെത്തിയത്. ഇതോടെ രാജ്യത്തെ ഏറ്റവും വേഗമേറിയ അണ്ടര്18 അത്ലറ്റ് എന്ന ബഹുമതിയും നീല് സ്വന്തമാക്കി.
പശ്ചിമ ബംഗാളിന്റെ മെഹബൂബുല് അഹമ്മദ് (10.74 സെക്കന്ഡ്) വെള്ളിയും ദല്ഹിയുടെ പുഷ്പേന്ദ്ര കുമാര് (10.81 സെക്കന്ഡ്) വെങ്കലവും നേടി. മികച്ച പ്രകടനം പുറത്തെടുക്കാനായെങ്കിലും 10.40 സെക്കന്ഡില് താഴെ സമയം കണ്ടെത്തുക എന്നതായിരുന്നു തന്റെ പ്രധാന ലക്ഷ്യമെന്ന് മത്സരശേഷം നീല് പ്രതികരിച്ചു.
