തിരുവനന്തപുരം: ശ്രീനാരായണ ഗുരുദേവന്റെ കണ്ണാടി പ്രതിഷ്ഠയുടെ നൂറാം വാര്ഷികാഘോഷങ്ങളുടെ ഉദ്ഘാടന ചടങ്ങിലേക്ക് ഗവര്ണര് രാജേന്ദ്ര വിശ്വനാഥ് ആര്ലേക്കറെ ക്ഷണിച്ച് എസ്എന്ഡിപി യോഗം ഭാരവാഹികള്.
ലോക്ഭവനിലെ സന്ദര്ശനവേളയില് കസവില് നൂല് നൂറ്റെടുത്ത ഷാളുകള് ഗവര്ണര്ക്ക് ഉപഹാരമായി നല്കി. എസ്എന്ഡിപി യോഗം ജനറല് സെക്രട്ടറി വെള്ളാപ്പള്ളി നടേശന്റെ ഓണസമ്മാനമായി 20 കിലോഗ്രാം ഭാരമുള്ള മഹാവിഷ്ണുവിന്റെ വെങ്കല പ്രതിമയും ഗവര്ണര്ക്ക് സമ്മാനിച്ചു. കണ്ണാടി പ്രതിഷ്ഠയുടെ നൂറാം വാര്ഷികത്തോടനുബന്ധിച്ച് നടക്കുന്ന മഹാസമ്മേളനത്തില് പദ്മഭൂഷണ് വെള്ളാപ്പള്ളി നടേശന് പ്രത്യേക ആദരവ് നല്കും.
വൈക്കം എസ്എന്ഡിപി യൂണിയന് പ്രസിഡന്റ് ബിനീഷ് പ്ലാത്താനം, പന്തളം എസ്എന്ഡിപി യൂണിയന് പ്രസിഡന്റും യുഎഇ യൂണിയനുകളുടെ കോര്ഡിനേറ്ററുമായ അഡ്വ. സിനില് മുണ്ടപ്പള്ളി, കരുനാഗപ്പള്ളി എസ്എന്ഡിപി യൂണിയന് സെക്രട്ടറി എ. സോമരാജന്, യുഎഇ ദുബായ് യൂണിയന് കണ്വീനര് സാജന് സത്യ, പ്രേമചന്ദ്രന് ഓച്ചിറ എന്നിവര് ഗവര്ണറെ സന്ദര്ശിച്ച സംഘത്തിലുണ്ടായിരുന്നു.
