ചെന്നൈ: പ്രതിപക്ഷ പാര്‍ട്ടികളുടെ പ്രധാനമന്ത്രി മുഖം രാഹുല്‍ ഗാന്ധിയാണെന്ന് പറയാന്‍ വിസമ്മതിച്ച് നടന്‍ വിജയ്. ഈ വിഷയത്തില്‍ കോണ്‍ഗ്രസില്‍ നിന്നും ഭീഷണി ഉണ്ടായിട്ടും നടന്‍ വിജയ് മൗനം വെടിഞ്ഞിട്ടില്ല. ഇതാണ് കോണ്‍ഗ്രസിനെ അസ്വസ്ഥരാക്കുന്നത്.
പ്രതിപക്ഷ പാര്‍ട്ടികളുടെ പ്രധാനമന്ത്രി മുഖം രാഹുല്‍ ഗാന്ധിയെ അംഗീകരിച്ചില്ലെങ്കില്‍ വിജയ് സര്‍ക്കാരിനുള്ള പിന്തുണ പിന്‍വലിക്കുമെന്നാണ് കോണ്‍ഗ്രസ് ഇപ്പോള്‍ ഭീഷണി മുഴക്കിയിരിക്കുന്നത്. എന്നാല്‍ ഇതിനോട് ടിവികെ പാര്‍ട്ടി ഇതുവരെയും പ്രതികരിച്ചിട്ടില്ല. വിജയും ഇക്കാര്യത്തില്‍ മൗനം പാലിക്കുന്നു.
വിജയിനെ മെരുക്കാന്‍ പള്ളി വഴി ശ്രമം നടക്കുന്നതായി റിപ്പോര്‍ട്ടുകളുണ്ട്. കോണ്‍ഗ്രസിന് ക്രിസ്ത്രീയ ദേവാലയങ്ങളിലുള്ള അധികാരം ഉപയോഗിച്ച് വിജയിനെ രാഹുലിന് അനുകൂലമാക്കാനുള്ള ശ്രമങ്ങളാണ് ഇപ്പോള്‍ നടന്നുവരുന്നത്. അതേ സമയം പള്ളിയുടെ അടുത്തയാളായ ടിവികെയുടെ സാമ്പത്തിക ശക്തിയായ ലോട്ടറി രാജാവ് സാന്‍റിയാഗോ മാര്‍ട്ടിന്റെ മരുമകനും ടിവികെ മന്ത്രിസഭയിലെ മന്ത്രിയുമായി ആദവ് അര്‍ജുന തന്നെയാണ് വിജയ് പ്രധാനമന്ത്രിയാകണം എന്ന പ്രസ്താവന ആദ്യം ഇറക്കിയത്. ഇത് കോണ്‍ഗ്രസിന് മുഖത്തേറ്റ് അടിയായിരുന്നു.
2029ലെ ലോക് സഭാ തെരഞ്ഞെടുപ്പില്‍ അടുത്ത പ്രധാനമന്ത്രി ആരെന്ന ചോദ്യത്തിന് ഈയിടെ സിവോട്ടര്‍ നടത്തിയ സര്‍വ്വേയില്‍ രാഹുല്‍ ഗാന്ധിക്ക് കിട്ടിയത് 27 ശതമാനം വോട്ടോടെ രണ്ടാം സ്ഥാനം മാത്രമാണ്. ഒന്നാം സ്ഥാനം മോദി തന്നെ- അനുകൂലമായി നേടിയ 48 ശതമാനം വോട്ടുകള്‍ മോദിയെ അജയ്യനാക്കുന്നു. പക്ഷെ മൂന്നാം സ്ഥാനത്ത് 9 ശതമാനം വോട്ടുകളോടെ നടന്‍ വിജയ് എത്തിയത് ടിവികെയ്‌ക്ക് വലിയ ആത്മവിശ്വാസം പകര്‍ന്നിരുന്നു. ഇതോടെയാണ് പാര്‍ട്ടി വിജയ് പ്രധാനമന്ത്രിസ്ഥാനാര്‍ത്ഥിയാകണം എന്ന ആവശ്യം ഉന്നയിച്ചത്.
പക്ഷെ ഈ ആവശ്യം മുളയിലേ നുള്ളിയില്ലെങ്കില്‍ ഗാന്ധി കുടുംബത്തില്‍ നിന്നും പ്രധാനമന്ത്രി പദവി പുറത്തേക്ക് പോകുമെന്ന ഭയം ശക്തമാണ്. അതിനാലാണ് വിജയ് സര്‍ക്കാരിനെ അട്ടിമറിച്ചാലും രാഹുല്‍ ഗാന്ധിയുടെ പ്രധാനമന്ത്രി സ്ഥാനാര്‍ത്ഥി എന്ന സ്ഥാനത്തിന് ഉലച്ചില്‍ സംഭവിക്കരുതെന്ന് കോണ്‍ഗ്രസ് കരുതുന്നത്. വിജയിന് പിന്നാലെ മമത ബാനര്‍ജിയും പ്രതിപക്ഷ പ്രധാനമന്ത്രി സ്ഥാനാര്‍ത്ഥി പദവിക്ക് വിജയിന്റെ തൊട്ടുപിന്നിലായുണ്ട്.
