കൊച്ചി:ഫിഫ ലോകകപ്പ് ഫുട്ബോള് ഫൈനലിന്റെ ഭാഗമായി കൊച്ചി നഗരത്തില് സുരക്ഷാ ക്രമീകരണങ്ങള് ഒരുക്കി സിറ്റി പൊലീസ്. വിജയാഘോഷങ്ങള് അക്രമസംഭവങ്ങളിലേക്കോ ആരാധകര് തമ്മിലെ അടിപിടിയിലോ എത്തരുത്. ഇത്തരം നിയമവിരുദ്ധ പ്രവൃത്തികളില് ഏര്പ്പെടുന്നവര്ക്കെതിരെ കര്ശന നിയമനടപടികള് സ്വീകരിക്കും.
ഫിഫ ലോകകപ്പ് മത്സരങ്ങള്ക്ക് ശേഷം വിജയാഘോഷങ്ങളുടെ പേരില് ഹെല്മെറ്റ് ധരിക്കാതെ വാഹനമോടിക്കല്, ഡ്രൈവിംഗ് ലൈസന്സ് ഇല്ലാതെ വാഹനമോടിക്കല്, മദ്യപിച്ച് വാഹനമോടിക്കല്, അമിതവേഗത്തിലും അപകടകരമായും വാഹനമോടിക്കല്, വാഹനങ്ങളില് അനുവദനീയമായതിലധികം ആളുകളെ കയറ്റി യാത്ര ചെയ്യല്, അമിതശബ്ദത്തില് ഹോണ് മുഴക്കല് എന്നിവയുള്പ്പെടെ പൊതുജനങ്ങളുടെ സൈ്വര്യജീവിതത്തിന് തടസമുണ്ടാക്കുന്ന പ്രവണതകള് ശ്രദ്ധയില്പ്പെട്ടിട്ടുണ്ട്.
ഇത്തരം നിയമലംഘനങ്ങള് ഗുരുതര അപകടങ്ങള്ക്കും ജീവഹാനിക്കും കാരണമാകാമെന്നതിനാല് പൊതുസുരക്ഷ മുന്നിര്ത്തി വാഹനങ്ങള് പിടിച്ചെടുക്കുകയും കോടതിയില് ഹാജരാക്കുകയും ചെയ്യും. അപകടകരമായ വിധം വാഹനമോടിക്കുന്നവര്ക്കെതിരെ കര്ശന നിയമനടപടികളും സ്വീകരിക്കും.
ജനങ്ങളുടെ സുരക്ഷ ഉറപ്പാക്കുന്നതിനായി നഗരത്തിലെ എല്ലാ പ്രധാന കേന്ദ്രങ്ങളിലും അധിക പൊലീസ് ഉദ്യോഗസ്ഥരെ വിന്യസിച്ചിട്ടുണ്ട്. വാഹന പരിശോധനയും ശക്തമാക്കി. സ്ത്രീ സുരക്ഷ ഉറപ്പാക്കാന് നഗരത്തിലെ പ്രധാന സ്ഥലങ്ങളില് കൂടുതല് വനിതാ പൊലീസ് ഉദ്യോഗസ്ഥരെയും വിന്യസിച്ചു.
