മെസിയുടെ അര്ജന്റീന ദേശീയ ടീമിലെ യാത്രയ്ക്ക് വിരാമമായതിന് പിന്നാലെ വികാരനിര്ഭരമായ കുറിപ്പുമായി അടുത്ത സുഹൃത്തും മുന് ദേശീയ ടീം സഹതാരവുമായ റോഡ്രിഗോ ഡി പോള്. ഇന്സ്റ്റഗ്രാമിലൂടെയാണ് 39കാരനായ മെസ്സിക്ക് ഡി പോള് മെസ്സിയെപ്പറ്റി കുറിച്ചത്.
”നമ്മുടെ രാജ്യത്തോടുള്ള നിന്റെ നിബന്ധനകളില്ലാത്ത സ്നേഹം, ഒരിക്കലും കീഴടങ്ങാതിരിക്കാനായി നീ നിനക്കുള്ളില് തന്നെ നടത്തിയ പോരാട്ടങ്ങള്, ഓരോരുത്തരെയും നേരിടുമ്പോള് നീ പ്രകടിപ്പിച്ച കരുത്ത്, നിന്റെ നേതൃത്വം… അതിനുമപ്പുറം ദേശീയ ടീമിലെത്തിയ ഓരോ താരത്തെയും സ്വന്തം വീട്ടിലെത്തിയതുപോലെ തോന്നിപ്പിച്ച നിന്റെ മനുഷ്യത്വം,” ഡി പോള് കുറിച്ചു.
ദേശീയ ടീമിനായി മെസ്സി നടത്തിയ ത്യാഗങ്ങളെയും സഹതാരങ്ങളോടുള്ള അദ്ദേഹത്തിന്റെ കരുതലിനെയും ഡി പോള് പ്രത്യേകം ഓര്മിച്ചു.
”ഈ ടീമിലെ ഓരോ വ്യക്തിയോടും നീ കാണിച്ച കരുതല്, നിന്റെ ഓരോ ഇടപെടലുകളും ഓരോരുത്തരോടും നീ കാണിച്ച ചെറിയ ചെറിയ ശ്രദ്ധകളും… അതിന് വാക്കുകളില്ല. നന്ദി, ലിയോ. ചരിത്രത്തിലെ ഏറ്റവും മഹാനായ താരമാണ് നീ,” ”ഞങ്ങളെ ഇത്രയേറെ സന്തോഷിപ്പിച്ചതിന് നന്ദി. ഞങ്ങളുടെ മുഖത്ത് നീ വരുത്തിയ പുഞ്ചിരികളുടെ എണ്ണം എത്രയാണെന്ന് നിനക്ക് ഒരിക്കലും സങ്കല്പ്പിക്കാനാകില്ല. നീ അനശ്വരനാണ്. എന്നെന്നും.”
മെസ്സിയുമായുള്ള ഡി പോളിന്റെ സൗഹൃദത്തിന് അര്ജന്റീന ദേശീയ ടീമിലെ സുവര്ണകാലവുമായി അടുത്ത ബന്ധമാണുള്ളത്. കോപ്പ അമേരിക്ക, ഫൈനലിസിമ, ലോകകപ്പ് തുടങ്ങിയ കിരീടങ്ങള് നേടിയ അര്ജന്റീന ടീമില് ഇരുവരും നിര്ണായക സാന്നിധ്യങ്ങളായിരുന്നു.
മെസ്സിയുടെ ദേശീയ ടീം കരിയറിന് വിരാമമായെങ്കിലും, ഡി പോളുമായുള്ള സൗഹൃദത്തിന് പുതിയൊരു അധ്യായം ഇന്റര് മയാമിയില് തുടരുകയാണ്. ദേശീയ ടീമിലെ സഹതാരങ്ങളായിരുന്ന ഇരുവരും ഇപ്പോള് ക്ലബ് തലത്തിലും ഒരുമിച്ചാണ് കളിക്കുന്നത്.
അര്ജന്റീനയ്ക്കായി രണ്ട് പതിറ്റാണ്ടിലേറെ നീണ്ട മെസ്സിയുടെ യാത്രയെ ”ചരിത്രത്തിലെ ഏറ്റവും മഹത്തായ താരത്തിന്റെ യാത്ര” എന്നാണ് ഡി പോള് വിശേഷിപ്പിച്ചത്. മെസ്സിയുടെ വിടവാങ്ങലില് അര്ജന്റീന ആരാധകര്ക്ക് മാത്രമല്ല, അദ്ദേഹത്തോടൊപ്പം കളിച്ച സഹതാരങ്ങള്ക്കും എത്രമാത്രം വൈകാരികതയുണ്ടെന്ന് വ്യക്തമാക്കുന്നതാണ് ഡി പോളിന്റെ കുറിപ്പ്.
