കോട്ടയം: പാചക വാതക സിലിണ്ടറുകളുടെ ഡെലിവറി ജീവനക്കാര്‍ ഉപയോക്താക്കളില്‍ നിന്ന് അമിത തുക ഈടാക്കുന്നതിനെതിരെ അടിയന്തര നടപടി സ്വീകരിക്കാന്‍ ജില്ലാ വികസന സമിതി യോഗം തീരുമാനിച്ചു. ഗ്യാസ് ഏജന്‍സികളുടെ യോഗം വിളിച്ച് ഇത് സംബന്ധിച്ച് നിര്‍ദേശം നല്‍കുമെന്ന് ജില്ലാ കളക്ടര്‍ ചേതന്‍കുമാര്‍ മീണ അറിയിച്ചു.
ജില്ലയില്‍ ബാറുകളും കള്ളുഷാപ്പുകളും അനുവദിച്ച സമയം കഴിഞ്ഞും പ്രവര്‍ത്തിക്കുന്നതായി പരാതികളുയര്‍ന്ന പശ്ചാത്തലത്തില്‍ പോലീസും എക്‌സൈസും സംയുക്ത പരിശോധന ശക്തമാക്കണമെന്നും കളക്ടര്‍ നിര്‍ദേശം നല്‍കി.
തണ്ണീര്‍മുക്കം ബണ്ട് റോഡിലെ കുഴികള്‍ അടിയന്തരമായി അടയ്‌ക്കുക്കാന്‍ നടപടി വേണമെന്ന് കെ. ബിനിമോന്‍ എംഎല്‍എ യോഗത്തില്‍ ആവശ്യപ്പെട്ടു. വൈക്കം-വെച്ചൂര്‍ റോഡ് നവീകരണവുമായി ബന്ധപ്പെട്ട നടപടികള്‍ വേഗത്തിലാക്കണമെന്നും അദ്ദേഹം നിര്‍ദേശിച്ചു.
കോടിമത പുതിയ പാലത്തിന്റെ അപ്രോച്ച് റോഡ് നിര്‍മാണം സെപ്തംബര്‍ പത്തിനുള്ളില്‍ പുര്‍ത്തിയാക്കുമെന്ന് പൊതുമരാമത്ത് വകുപ്പ് ഉദ്യോഗസ്ഥര്‍ യോഗത്തെ അറിയിച്ചു.
