തിരുവനന്തപുരം: രാജ്യവ്യാപകമായി നീറ്റ്-പിജി 2026 പരീക്ഷ വിജയകരമായി നടത്തി. നാഷണൽ ബോർഡ് ഓഫ് എക്സാമിനേഷൻസ് ഇൻ മെഡിക്കൽ സയൻസസ് (NBEMS) സംഘടിപ്പിച്ച പരീക്ഷ ഇന്ന് 339 നഗരങ്ങളിലെ 1,111 കേന്ദ്രങ്ങളിലാണ് നടന്നത്. പരീക്ഷയ്ക്ക് 2,73,096 പേരാണ് അപേക്ഷിച്ചിരുന്നത്. ഇതിൽ 2,65,980 പേർ പരീക്ഷ എഴുതി. 2,63,535 ഉദ്യോഗാർത്ഥികൾ പരീക്ഷ വിജയകരമായി പൂർത്തിയാക്കി.
പരീക്ഷയുടെ സുരക്ഷയും സുതാര്യതയും ഉറപ്പാക്കാൻ ശക്തമായ സുരക്ഷാ സംവിധാനങ്ങളും തത്സമയ നിരീക്ഷണവും ഏർപ്പെടുത്തിയിരുന്നു. പരീക്ഷാ നടത്തിപ്പിന് മേൽനോട്ടം വഹിക്കാൻ 2,527 ഫാക്കൽറ്റി അംഗങ്ങളെ സ്വതന്ത്ര നിരീക്ഷകരായി നിയോഗിച്ചു. ഡീൻമാർ, ഡയറക്ടർമാർ, മെഡിക്കൽ സൂപ്രണ്ടുമാർ, സീനിയർ പ്രൊഫസർമാർ എന്നിവരുൾപ്പെടെ 700-ലധികം മുതിർന്ന അധ്യാപകരെ ഫ്ലയിംഗ് സ്ക്വാഡ് അംഗങ്ങളായും നിയോഗിച്ചു.
പരീക്ഷയുടെ ഏകോപനത്തിനും നിരീക്ഷണത്തിനുമായി രാജ്യത്തുടനീളം 16 NBEMS പ്രാദേശിക കമാൻഡ് സെന്ററുകൾ പ്രവർത്തിച്ചു. പരീക്ഷാ കേന്ദ്രങ്ങളിൽ സ്ഥാപിച്ച ലൈവ് സിസിടിവി സംവിധാനങ്ങൾ ന്യൂഡൽഹിയിലെ ദ്വാരകയിലുള്ള NBEMS ആസ്ഥാനത്തെ കമാൻഡ് സെന്ററിൽ നിന്ന് നിരന്തരം നിരീക്ഷിച്ചു. NBEMS, TCS എന്നിവയിലെ 190 ഉദ്യോഗസ്ഥരുടെ പ്രത്യേക സംഘവും തത്സമയ നിരീക്ഷണത്തിനായി പ്രവർത്തിച്ചു.
NBEMS ആസ്ഥാനത്തെ കമാൻഡ് സെന്ററിൽ NBEMS, കേന്ദ്ര ആരോഗ്യ-കുടുംബക്ഷേമ മന്ത്രാലയം, BEL, ECIL, TCS എന്നിവയിലെ ഉദ്യോഗസ്ഥർ പരീക്ഷാ നടപടികൾ നിരീക്ഷിച്ചു.
ആൾമാറാട്ടം ഉൾപ്പെടെയുള്ള ക്രമക്കേടുകൾ തടയുന്നതിനായി പരീക്ഷാ കേന്ദ്രങ്ങളിൽ ഉദ്യോഗാർത്ഥികളുടെ ആധാർ അധിഷ്ഠിത പരിശോധനയും നടപ്പാക്കി. വിവിധ സർക്കാർ ഏജൻസികളുടെ സഹകരണത്തോടെയാണ് സുരക്ഷാ ക്രമീകരണങ്ങൾ പൂർത്തിയാക്കിയത്.
339 നഗരങ്ങളിലായി 1,111 കേന്ദ്രങ്ങളിൽ ഒരേസമയം പരീക്ഷ നടത്താൻ കഴിഞ്ഞത് പരീക്ഷാ അധികൃതർ, മെഡിക്കൽ സ്ഥാപനങ്ങൾ, അധ്യാപകർ, സുരക്ഷാ ഏജൻസികൾ, സാങ്കേതിക സംഘങ്ങൾ തുടങ്ങിയവരുടെ വിപുലമായ ഏകോപനത്തിന്റെ ഫലമാണെന്ന് NBEMS അറിയിച്ചു.
പരീക്ഷ വിജയകരമായി പൂർത്തിയാക്കാൻ സഹകരിച്ച ഉദ്യോഗാർത്ഥികൾക്കും വിവിധ വിഭാഗങ്ങളിലെ ഉദ്യോഗസ്ഥർക്കും സ്ഥാപനങ്ങൾക്കും NBEMS നന്ദി അറിയിച്ചു.
ജയ്പൂരിൽ സാങ്കേതിക തടസ്സം
രാജ്യത്തെ ഭൂരിഭാഗം പരീക്ഷാ കേന്ദ്രങ്ങളിലും പരീക്ഷ സുഗമമായി നടന്നെങ്കിലും രാജസ്ഥാനിലെ ജയ്പൂരിൽ സാങ്കേതിക തടസ്സം റിപ്പോർട്ട് ചെയ്തു. ജയ്പൂരിലെ ഐ.ഓൺ ഡിജിറ്റൽ സോൺ ഐ.ഡി.സി., സിതാപുര കേന്ദ്രങ്ങളിലെ രണ്ട് പരീക്ഷാ കേന്ദ്രങ്ങളിലാണ് വൈദ്യുതി വിതരണവുമായി ബന്ധപ്പെട്ട സാങ്കേതിക പ്രശ്നമുണ്ടായത്.
പരീക്ഷാ നടത്തിപ്പ് ഏജൻസിയായ TCS-ന്റെ ആഭ്യന്തര വൈദ്യുതി വിതരണ സംവിധാനത്തിലുണ്ടായ പ്രശ്നത്തെ തുടർന്ന് ഈ കേന്ദ്രങ്ങളിലെ 2,445 ഉദ്യോഗാർത്ഥികൾക്ക് പരീക്ഷ പൂർത്തിയാക്കാനായില്ല.
ബാധിക്കപ്പെട്ട ഉദ്യോഗാർത്ഥികൾക്ക് ന്യായമായ അവസരം ഉറപ്പാക്കുന്നതിനായി പുനഃപരീക്ഷ നടത്താൻ NBEMS തീരുമാനിച്ചു. സെപ്റ്റംബർ 5ന് വൈകിട്ട് 3 മണിക്ക് ജയ്പൂരിലാണ് പുനഃപരീക്ഷ നടത്തുക. പരീക്ഷാ കേന്ദ്രത്തിന്റെ വിശദാംശങ്ങളും മറ്റ് നിർദേശങ്ങളും ബന്ധപ്പെട്ട ഉദ്യോഗാർത്ഥികളെ പ്രത്യേകം അറിയിക്കും.
സംഭവത്തിൽ ഉദ്യോഗാർത്ഥികൾക്കുണ്ടായ ബുദ്ധിമുട്ടിൽ NBEMS ഖേദം പ്രകടിപ്പിച്ചു.
