കൊല്ലം: ഓണക്കാലത്ത് ലഹരിക്കും അനധികൃത മദ്യവില്പ്പനയ്ക്കുമെതിരെ കൊല്ലം ജില്ലയില് എക്സൈസ് നടത്തിയത് 800-ലേറെ റെയ്ഡുകള്. ആഗസ്റ്റ് മാസത്തില് മാത്രം 800ലേറെ റെയ്ഡുകള് നടത്തിയപ്പോള് പതിനായിരത്തിലേറെ വാഹനങ്ങള് പരിശോധനയ്ക്ക് വിധേയമാക്കി. സംസ്ഥാന എക്സൈസ് വകുപ്പിന്റെ സെര്ച്ച് എന്ജിന് ഫോര് എക്സൈസ് ക്രൈം (സീക്ക്) കണക്കുകളാണിത്.
ആഗസ്റ്റില് 178 അബ്കാരി കേസുകള് കണ്ടെത്തി. 127 പേരെ അറസ്റ്റ് ചെയ്തതിനു പുറമേ ആറ് വാഹനങ്ങളും പിടിച്ചെടുത്തു. എന്ഡിപിഎസ് നിയമപ്രകാരം 110 കേസുകള് രജിസ്റ്റര് ചെയ്തതില് 104 പേര് അറസ്റ്റിലായി. ആറ് വാഹനങ്ങളും പിടിച്ചെടുത്തു. പരിശോധനകളില് 1.2 കിലോ കഞ്ചാവ്, 16 ലിറ്റര് ചാരായം, 16.9 ലിറ്റര് ബിയര്, 4.9 ലിറ്റര് കള്ള്, 168.3 ലിറ്റര് അരിഷ്ടം, 325 ലിറ്റര് വാഷ് എന്നിവ പിടിച്ചെടുത്തു. 11 കഞ്ചാവ് ചെടികളും കണ്ടെത്തി. ആറ് ഗ്രാം ഹെറോയിന്, 0.218 ഗ്രാം എംഡിഎംഎ, 3.27 ഗ്രാം മെത്താഫെറ്റമിന്, 4.82 ഗ്രാം ഹൈബ്രിഡ് കഞ്ചാവ് എന്നിവയും പിടിച്ചെടുത്തിട്ടുണ്ട്.
പുകയില ഉത്പന്നങ്ങള്ക്കെതിരെയും നടപടി ശക്തമായിരുന്നു. 795 കേസുകള് രജിസ്റ്റര് ചെയ്തതില് 161 കിലോ പുകയില ഉത്പന്നങ്ങള് പിടിച്ചെടുത്തു. 10.59 ലക്ഷം രൂപ പിഴയായി ഈടാക്കിയതായി അസിസ്റ്റന്റ് എക്സൈസ് കമ്മീഷണര് നൂറുദ്ദീന് പറഞ്ഞു. മെഡിക്കല് ഷോപ്പുകള് ഉള്പ്പെടെയുള്ള സ്ഥാപനങ്ങളിലും നഗരത്തിലെ വിവിധ പ്രദേശങ്ങളിലും പ്രത്യേക പരിശോധനകള് നടത്തി. മദ്യക്കേസുകളില് അറസ്റ്റിലായവരില് കൂടുതലും മധ്യവയസ്കരാണെന്നും ലഹരിക്കേസുകളില് പ്രതികളാകുന്നത് കൂടുതലും യുവാക്കളാണെന്നും എക്സൈസ് ഉദ്യോഗസ്ഥര് പറഞ്ഞു.
ഓണക്കാലത്ത് പോലീസ്, ഫോറസ്റ്റ്, ആര്പിഎഫ്, ഫുഡ് സേഫ്റ്റി, ഡ്രഗ്സ്, മോട്ടോര് വാഹന, റവന്യൂ വകുപ്പുകളുടെ സഹകരണത്തോടെ സംയുക്ത റെയ്ഡുകളും നടത്തി. വാഹന പരിശോധനയും ശക്തമാക്കി. ആര്യങ്കാവ്, അച്ചന്കോവില് ചെക്ക്പോസ്റ്റുകളിലും കര്ശന പരിശോധന നടന്നു. വരും ദിവസങ്ങളിലും പരിശോധന കൂടുതല് ശക്തമാക്കുമെന്ന് എക്സൈസ് അറിയിച്ചു.
ജന്മഭൂമി ഓണ്ലൈന്