ലുധിയാന: സൈനിക നീക്കങ്ങളുടെ ലൈവ് ദൃശ്യങ്ങള് പാക്സ്ഥാന് കൈമാറി ചാരപ്രവര്ത്തനം നടത്തിയ ഇരുപതുകാരനെ പോലീസ് പിടികൂടി. ഗുര്ദാസ്പൂര് സ്വദേശിയായ രച്പാല് സിങ് ആണ് പാകിസ്ഥാന് ഐഎസ്ഐ ഭീകര്ക്കായി ദൃശ്യങ്ങള് കൈമാറിയത്.
ചെരുപ്പ് കടയുടെ മറവില് സിസിടിവി ദൃശ്യങ്ങള് സ്ഥാപിച്ച് ലുധിയാന- ഫിറോസ്പൂര് റോഡിലൂടെയുള്ള സൈനിക നീക്കങ്ങളുടെ ലൈവ് ദൃശ്യങ്ങള് കൈമാറുകയായിരുന്നു.
ബദ്ദോവാള് കന്റോണ്മെന്റ് സ്ഥിതി ചെയ്യുന്നതിന് ആറ് കിലോമീറ്റര് അകലെയായി രച്പാല് മുറി വാടകയ്ക്കെടുത്ത് ചെരുപ്പ് കട തുടങ്ങി. അവിടെ നിരോധിത ചൈനീസ് സിസിടിവി ക്യാമറകള് സ്ഥാപിച്ച് അതിര്ത്തിക്കപ്പുറത്തുള്ള പാകിസ്ഥാന് ഏജന്റുമാര്ക്ക് 24 മണിക്കൂറും ലൈവ് ദൃശ്യങ്ങള് അയയ്ക്കുകയായിരുന്നു. ഈ കടയുടെ മുന്നിലൂടെയാണ് എല്ലാ സൈനിക വാഹനങ്ങളും കടന്നുപോയിരുന്നത്. മൊബൈല് ആപ്പുകള് വഴി ഈ ക്യാമറകളിലെ ദൃശ്യങ്ങള് തത്സമയം കാണാന് പാകിസ്ഥാനിലെ ഏജന്റുമാര്ക്ക് ഐഡിയും പാസ് വേര്ഡും നല്കുകയും ചെയ്തു.
സമാനമായ രണ്ട് ചാരന്മാരെ അടുത്തിടെ പത്താന്കോട്ടിലും കപൂര്ത്തലയിലും പിടികൂടിയിരുന്നു. പിന്നാലെ സൈനിക കേന്ദ്രങ്ങള്ക്ക് സമീപങ്ങളില് പോലീസ് നിരീക്ഷണം ശക്തമാക്കിയിരുന്നു. ഇയാളുടെ കട പതിവായി തുറന്നിരുന്നില്ല. കടയ്ക്ക് പുറത്ത് ഘടിപ്പിച്ചിരുന്ന സിസിടിവികള് ലുധിയാന- ഫിറോസ്പൂര് റോഡിന് അഭിമുഖമായാണ് സ്ഥാപിച്ചിരുന്നത്. ഇതെല്ലാം സംശയത്തിന് ഇടയാക്കിയതോടെ ഇയാളെ പോലീസ് നിരീക്ഷിച്ച് വരികയായിരുന്നു. കഴിഞ്ഞ രണ്ട് മാസത്തിനിടെ ഐഎസ്ഐ ഭീകരര് രച്പാലിന് പല തവണകളായി മൂന്ന് ലക്ഷം രൂപ നല്കി. കടയുടെ വാടകയ്ക്കായി മാസം 40,000 രൂപ വീതവും നല്കി. പണം കൈമാറാന് പാക് ഏജന്റുമാര് അതിര്ത്തി കടന്നുള്ള ലഹരിക്കടത്തുകാരെ ഉപയോഗിച്ചതായി പോലീസ് സ്ഥിരീകരിച്ചിട്ടുണ്ട്. പാക് ഏജന്റുമാരുമായി രച്പാലിനെ ബന്ധപ്പെടുത്തിയ ഇടനിലക്കാരനെക്കുറിച്ചും പോലീസിന് വിവരങ്ങള് ലഭിച്ചിട്ടുണ്ട്.
