വാവ്റെ(ബെല്ജിയം): ഹോക്കി ലോകകപ്പ് ഫൈനല് ഇന്ന്. ഭാരത സമയം വൈകീട്ട് 4.30ന് ബെല്ജിയത്തിലെ വാവ്റെ നഗരത്തില് ബെല്ഫിയസ് ഹോക്കി അരീനയില് നടക്കുന്ന കലാശപ്പോരാട്ടത്തില് നിലവിലെ ജേതാക്കളായ ജര്മനിയും സ്പെയിനും കിരീടത്തിനായി ഏറ്റുമുട്ടും. ഇതിന് മുമ്പായി ഉച്ചയ്ക്ക് രണ്ടിന് ഇതേ വേദിയില് മൂന്നാം സ്ഥാനത്തിനായുള്ള നെതര്ലന്ഡ്സ് അര്ജന്റീന മത്സരവും ഇതേ വേദിയില് നടക്കും.
ആതിഥേയരായ നെതര്ലന്ഡ്സിനെ 4-3ന് സെമിയില് തോല്പിച്ചാണ് സ്പെയിന് ഫൈനലില് പ്രവേശിച്ചിരിക്കുന്നത്. ജര്മനി സെമിയില് അര്ജന്റീനയെ കീഴടക്കിയത് 2-1നാണ്.
ആദ്യ റൗണ്ടില് പൂള് സിയില് നിന്ന് ഓസ്ട്രേലിയക്ക് പിന്നില് രണ്ടാം സ്ഥാനക്കാരായാണ് സ്പെയിന് രണ്ടാം റൗണ്ടിലേക്ക് മുന്നേറിയത്. മൂന്ന് കളികളില് രണ്ട് ജയവും ഒരു തോല്വിയും സഹിതം ആറ് പോയിന്റുമായാണ് രണ്ടാം റൗണ്ടില് പ്രവേശിച്ചത്. രണ്ടാം റൗണ്ടില് ജര്മനി ഉള്പ്പെട്ട പൂള് എഫിലായിരുന്നു സ്പെയിന്. ഓരോന്ന് വീതം ജയവും തോല്വിയും സമനിലയും നേടിക്കൊണ്ട് നാല് പോയിന്റോടെയാണ് സെമി ബെര്ത്ത് ഉറപ്പിച്ചത്. ഗോള് വ്യത്യാസത്തിന്റെ ആനുകൂല്യത്തില് ഓസ്ട്രേലിയയെ മറികടന്നായിരുന്നു സ്പെയിന്റെ സെമി പ്രവേശം. സ്പെയിന് ഗ്രൂപ്പ് ഘട്ടത്തില് വിജയിച്ച ഒരേയൊരു മത്സരം ജര്മനിക്കെതിരെയായിരുന്നു. രണ്ടാം റൗണ്ടിലെ ആദ്യ പോരാട്ടത്തില് 2-1നാണ് ജര്മനിയെ തോല്പ്പിച്ചത്.
ജര്മനി ഈ ലോകകപ്പില് തോല്വി അറിഞ്ഞ ഒരേയൊരു മത്സരം അതു മാത്രമാണ്. ആദ്യ റൗണ്ടില് രണ്ട് കളികള് ജയിച്ച അവര് ഒരു സമനില സഹിതം ഏഴ് പോയിന്റുമായി രണ്ടാം റൗണ്ടിലെത്തി. സ്പെയിനോട് പരാജയപ്പെട്ടെങ്കിലും ഓസ്ട്രേലിയക്കെതിരായ ജീവന് മരണ പോരാട്ടത്തില് 4-2ന്റെ ജയത്തോടെയാണ് ഗ്രൂപ്പ് ജേതാക്കളായി ഫൈനലിന് യോഗ്യത നേടിയത്. സെമിയില് അര്ജന്റീനയെ പരാജയപ്പെടുത്തിയ ജര്മനിക്ക് ഇന്ന് വിജയിച്ചുകൊണ്ട് നാലാം ലോക കിരീടമാണ് ലക്ഷ്യമിടുന്നത്. നിലവില് പാകിസ്ഥാന് മാത്രമാണ് ഹോക്കിയില് നാല് ലോക കിരീടങ്ങള് നേടിയിട്ടുള്ള ടീം. ജര്മനിയെ കൂടാതെ നെതര്ലന്ഡ്സ്, ഓസ്ട്രേലിയ ടീമുകളും മൂന്ന് തവണ വീതം ലോക കിരീടം ചൂടിയിട്ടുണ്ട്.
സ്പെയിന് ഇന്നത്തെ വിജയത്തിലൂടെ ലക്ഷ്യമിടുന്നത് ആദ്യ ലോകകപ്പ് നേട്ടമാണ്. മൂമ്പ് രണ്ട് തവണ ഫൈനലിലെത്തിയിട്ടുണ്ട്. പ്രഥമ ലോകകപ്പില് പാകിസ്ഥാനെതിരെയും 1998ല് നെതര്ലന്ഡ്സിനെതിരെയും.
